•  Introduksiyon 2

•  Kayamanan na Yaon sa Tataramon nin Diyos 3-5

  •  Pahayag 3

  •  Espirituwal na Kayamanan 4

  •  Pagbasa sa Bibliya 5

•  Magin Andam sa Ministeryo 6-14

  •  Pagpuon nin Pakikipag-ulay 7

  •  Pagdalaw Liwat 8

  •  Paggibo nin mga Disipulo 9

  •  Pagpaliwanag kan Saimong Paniniwala 10

  •  Pahayag 11

  •  Detalye 12

  •  Mga Setting 13

  •  Paggamit nin mga Video Asin Literatura 14

•  Pamumuhay Bilang Kristiyano 15-16

  •  Pag-adal sa Bibliya kan Kongregasyon 16

•  Kongklusyon 17

•  Komendasyon Asin Konseho 18

•  Oras 19

•  Dalaw kan Paraataman nin Sirkito 20

•  Semana nin Asembleya o Kumbensiyon 21

•  Semana kan Memoryal 22

•  Paraataman sa Pagtiripon na Pamumuhay Asin Ministeryo 23

•  Tsirman sa Pagtiripon na Pamumuhay Asin Ministeryo 24

•  Auxiliary Counselor 25

•  Dagdag na mga Klase 26

•  Mga Video 27

1. An mga instruksiyon na yaon digdi makakatabang sa gabos na may kabtang sa pagtiripon na An Satong Kristiyanong Pamumuhay Asin Ministeryo. Dapat na rebyuhon kan mga may kabtang an instruksiyon para sa kabtang ninda na yaon sa Workbook sa Pagtiripon na Pamumuhay Asin Ministeryo asin sa dokumentong ini bago sinda mag-andam kan saindang kabtang. Dagkahon an gabos na parahayag na magpartisipar sa pagpresentar nin mga asignasyon bilang mga estudyante. An mga aktibong nakikiasosyar sa kongregasyon puwedeng magpartisipar bilang estudyante kun sinda minauyon sa mga katukduan kan Bibliya asin namumuhay kauyon kan Kristiyanong mga prinsipyo. An mga kahagadan para makapa-enrol dapat na ipakipag-ulay kan paraataman sa Pagtiripon na Pamumuhay Asin Ministeryo sa siisay man na bako pang parahayag asin gusto nang magpa-enrol dangan ipaaram sa saiya kun kuwalipikado siya. Dapat na gibuhon ini kaiba kan nagba-Bible study saiya (o kaiba kan saiyang Saksing magurang). An mga kahagadan digdi kapareho kan mga kahagadan sa saro na gusto nang magin dai pa bawtisadong parahayag.—od kap. 8 par. 8.

2. Sarong minuto. Kada semana, pagkatapos kan pambukas na kanta asin pamibi, pupukawon kan tsirman sa Pagtiripon na Pamumuhay Asin Ministeryo an interes kan mga nagdadangog para sumubaybay sa programa. Dapat na magpokus an tsirman sa mga punto na papakinabangan na marhay kan kongregasyon.

 3. Pahayag: Diyes minutos. Yaon sa Workbook sa Pagtiripon na Pamumuhay Asin Ministeryo an tema saka an duwa o tulong panginot na punto. Iaasignar an pahayag na ini sa sarong elder o kuwalipikadong ministeryal na lingkod. Pag nakaiskedyul na punan an sarong libro sa Bibliya sa semanal na babasahon sa Bibliya, ipi-play an sarong video bilang introduksiyon. Puwedeng magsambit an ispiker nin mga punto hali sa video na konektado sa tema. Alagad, dapat niyang siguraduhon na matutukar niya an mga punto na naka-outline sa workbook. Sagkod na may oras pa, dapat man niyang gamiton an kaibanan kaiyan na artwork, na dinisenyo bilang kakomplemento kan materyal na tutukaron. Puwede siyang gumamit nin iba pang reperensiya basta makakatabang iyan sa pagpaliwanag kan mga punto sa outline.

 4. Espirituwal na Kayamanan: Diyes minutos. Hapot-simbagan ini na mayong introduksiyon o kongklusyon. Papanginutan ini nin sarong elder o kuwalipikadong ministeryal na lingkod. Dapat niyang ihapot sa mga nagdadangog an duwang hapot. Siya na an madeterminar kun baga ipapabasa niya o dai an sitadong mga teksto. An komento kan mga maaapod na magsimbag dapat na 30 segundos sana o mas halipot pa.

 5. Pagbasa sa Bibliya: Kuwatro minutos. An asignasyon na ini itatao sa sarong lalaking estudyante. Babasahon kan estudyante an nakaasignar na materyal na mayong introduksiyon o kongklusyon. An tsirman sa pagtiripon partikular nang interesado sa pagtabang sa mga estudyante na makabasa nin tama, may pakasabot, durudiretso, natural, may tamang pagduduon, modulasyon o pagburubago nin tono, asin tamang pagpundo nin dikit. May mga asignasyon na pagbasa sa Bibliya na mas halipot. An iba man mas halaba. Kaya kaipuhan na konsideraron kan paraataman sa Pagtiripon na Pamumuhay Asin Ministeryo an kakayahan kan mga estudyante pag itinatao an asignasyon na ini.

6. Kinse minutos. An seksiyon na ini kan pagtiripon dinisenyo tanganing tawan an gabos nin oportunidad na magsanay para sa ministeryo asin mapauswag an saindang kakayahan sa pakikipag-ulay, paghuhulit, asin pagtutukdo. Kun kinakaipuhan, an mga elder puwedeng tawan nin asignasyon bilang mga estudyante. Dapat na hinguwahon na iaplikar kan lambang estudyante an leksiyon na nasa parentesis kataid kan asignasyon na nasa Workbook sa Pagtiripon na Pamumuhay Asin Ministeryo. An leksiyon na iyan yaon sa brosyur na Pagtutukdo o Mamutan an mga Tawo. Kun minsan, may nakaiskedyul na sarong kabtang para sa pagtukar. Itatao an kabtang na iyan sa sarong elder o kuwalipikadong ministeryal na lingkod.—Hilingon an  parapo 15 kun paano ipepresentar an mga kabtang na pagtukar.

 7. Pagpuon nin Pakikipag-ulay: An asignasyon na ini puwedeng itao sa sarong lalaki o babaying estudyante. An assistant saka an may kabtang dapat na magkaparehong lalaki o magkaparehong babayi o magkapamilya. An estudyante asin assistant puwedeng nakatukaw o nakatindog.—Para sa dagdag na impormasyon manungod sa detalye asin setting kan asignasyon na ini, hilingon an  parapo 12 asin  13.

 8. Pagdalaw Liwat: An asignasyon na ini puwedeng itao sa sarong lalaki o babaying estudyante. An assistant saka an may kabtang dapat na magkaparehong lalaki o magkaparehong babayi. (km 5/97 p. 2) An estudyante asin assistant puwedeng nakatukaw o nakatindog. Dapat na ipahiling kan estudyante kun ano an sasabihon pag nagdadalaw liwat sa saro na dati na niyang nakaulay.—Para sa dagdag na impormasyon manungod sa detalye asin setting kan asignasyon na ini, hilingon an  parapo 12 asin  13.

 9. Paggibo nin mga Disipulo: An asignasyon na ini puwedeng itao sa sarong lalaki o babaying estudyante. An assistant saka an an may kabtang dapat na magkaparehong lalaki o magkaparehong babayi. (km 5/97 p. 2) An estudyante asin assistant puwedeng nakatukaw o nakatindog. Dapat na ipahiling sa kabtang na ini na nagpuon na an pag-adal sa Bibliya. Dai na kaipuhan an introduksiyon o kongklusyon apuwera na sana kun iyan an leksiyon na inasignar saiya na papauswagon niya. Dai kaipuhan na basahon nin makusog an gabos na inasignar na materyal, pero puwede man iyan na gibuhon.

 10. Pagpaliwanag kan Saimong Paniniwala: Kun an kabtang sarong pahayag, dapat na itao ini sa sarong lalaking estudyante. Kun an kabtang sarong demonstrasyon, puwedeng itao ini sa sarong lalaki o babaying estudyante. An assistant saka an may kabtang dapat na magkaparehong lalaki o magkaparehong babayi o magkapamilya. An estudyante dapat na makatao nin malinaw asin mataktikang simbag sa temang hapot gamit an mga impormasyon sa itinaong reperensiya. Mantang ipinepresentar kan estudyante an saiyang kabtang, nasa saiya na kun sasambiton niya o dai an publikasyon na pinagkuanan nin reperensiya.

 11. Pahayag: An asignasyon na ini itatao sa sarong lalaking estudyante asin iaatubang bilang pahayag sa kongregasyon. Kun an pahayag basado sa sarong punto sa apendise A kan brosyur na Mamutan an mga Tawo, dapat na iduon kan estudyante kun paano magagamit sa ministeryo an (mga) teksto. Halimbawa, puwede niyang ipaliwanag kun nuarin puwedeng gamiton an teksto, kun ano an kahulugan kan teksto, asin kun paano iyan ipapaliwanag sa kaulay niya. Kun an pahayag basado sa sarong punto kan saro sa mga leksiyon sa brosyur na Mamutan an mga Tawo, dapat na magpokus an estudyante sa kun paano iyan magagamit sa ministeryo. Puwede niyang banggiton an halimbawa na yaon sa punto 1 kan leksiyon o an arin man sa iba pang mga teksto na nasa leksiyon, kun makakatabang iyan.

   12. Detalye: An impormasyon sa parapong ini asin sa kasunod na parapo aplikado sa mga asignasyon na “Pagpuon nin Pakikipag-ulay” asin “Pagdalaw Liwat.” Apuwera kun may ibang instruksiyon, an pasuhan kan estudyante iyo na maghiras nin simpleng katotoohan sa Bibliya na makakatabang sa kaulay niya asin na makapagwalat nin punto na mapag-uulayan ninda sa sunod. Dapat na magpili an estudyante nin tema na napapanahon saka epektibo sa teritoryo. Nasa saiya kun iiintrodusir niya o dai an sarong publikasyon o video na yaon sa satong Toolbox sa Pagtutukdo. Imbes na magdemonstrar nin tinuom na presentasyon, dapat na hinguwahon kan estudyante na pauswagon an marahay na mga kuwalidad sa pakikipag-ulay, arog kan pagpahiling nin personal na interes asin pagigin natural.

   13. Mga Setting: An nakaasignar na setting dapat na maibagay kan estudyante sa lokal na mga kamugtakan. Halimbawa:

1.  (1) Pagharong-harong: Kaiba sa setting na ini an paghuhulit sa harong-harong—in person man iyan, paagi sa telepono, o paagi sa surat—asin pagdalaw liwat sa saro na nakaulay sa pagharong-harong.

2.  (2) Impormal na Pagpapatotoo: Sa setting na ini, ipapahiling kan estudyante kun paano niya gagamiton na oportunidad an sarong ordinaryong pag-uulay para makapagpatotoo. Puwedeng kaiba diyan an pagsabi nin sarong punto sa Kasuratan sa mga nakakaulay niya sa trabaho, sa eskuwelahan, sa mga pagtaraid, sa pampublikong lunadan, o sa iba pang lugar mantang ginigibo an pang-aroaldaw na mga aktibidad.

3.  (3) Pagpapatotoo sa Publiko: Puwedeng kaiba sa setting na ini an pagpapatotoo paagi sa cart, pakikipag-ulay sa mga tawo sa mga lugar nin negosyo, pagpapatotoo sa tinampo, sa mga parke, paradahan, o sain man na lugar na matawo.

 14. Paggamit nin mga Video Asin Literatura: Depende sa mga kamugtakan, nasa estudyante kun magamit siya nin video o literatura. Kun an kabtang kan estudyante may kaibang video o kun magdesisyon siya na ipahiling an sarong video, dapat niyang iintrodusir asin ipakipag-ulay iyan pero dai na ipi-play.

15. Pagkatapos nin kanta, an sunod na 15 minutos kan seksiyon na ini igwa nin saro o duwang kabtang na dinisenyo tanganing tabangan an mga nagdadangog na iaplikar an Tataramon nin Diyos. Kun dai man nin espesipikong sinabi, puwede ining iasignar sa mga elder o kuwalipikadong mga ministeryal na lingkod, apuwera sa kabtang na lokal na mga pangangaipo, na sa elder iinaasignar. Kun an kabtang sarong pagtukar, an ispiker puwedeng magpalataw nin dagdag na mga hapot apuwera sa mga hapot na yaon sa workbook. Dapat na halipot sana an introduksiyon niya tanganing matawan nin igong panahon an pagtukar sa panginot na mga punto asin makapartisipar an mga nagdadangog. Kun igwa nin interbiyu, mas marahay kun nasa stage an iniinterbiyu imbes na nasa tukawan siya, kun posible iyan.

  16. Pag-adal sa Bibliya kan Kongregasyon: Treynta minutos. Iaasignar ini sa kuwalipikadong elder. (Kun dikit an elder, puwedeng gumamit nin kuwalipikadong mga ministeryal na lingkod, kun kinakaipuhan.) An grupo nin kamagurangan an mapili kun sairisay an kuwalipikadong magkondukta kan Pag-adal sa Bibliya kan Kongregasyon. An mga naaprubaran dapat na may kakayahan na makapagkondukta sa epektibong paagi tanganing matapos nin tama sa oras an pag-adal, maiduon an panginot na mga teksto, asin matabangan an gabos na masabutan an praktikal na pakinabang kan mga puntong tinutukar. Makakatabang sa mga naaprubaran na magkondukta an pagrepaso sa ipinublikar na instruksiyon manungod sa pagkondukta nin mga kabtang na hapot-simbagan. (w23.04 p. 24, kahon) Pag lubos nang napaluwas an mga punto sa nakaiskedyul na pag-aadalan, dai na kaipuhan na pahaluyon pa an pag-adal. Kun posible, iba-ibang konduktor asin tagabasa an gamiton kada semana. Kun sabihon kan tsirman sa Pagtiripon na Pamumuhay Asin Ministeryo na pahaliputon an pag-adal, magibo nin paagi an konduktor kun paano iyan papahaliputon. Puwedeng dai na niya ipabasa an ibang mga parapo.

17. Tres minutos. Rerepasuhon kan tsirman sa Pagtiripon na Pamumuhay Asin Ministeryo partikularmente an kapaki-pakinabang na mga punto sa pagtiripon. Dapat man niyang sabihon kun ano an mga tutukaron sa sunod na semana. Kun may oras pa, puwede niyang ipaisi an pangaran kan mga estudyanteng may kabtang sa sunod na semana. Apuwera na sana kun may ibang instruksiyon, an ano man na kinakaipuhan na mga paisi asin ano man na kinakaipuhan na mga surat sa kongregasyon dapat na basahon kan tsirman durante kan saiyang kongklusyon. An mga impormasyon na arog kan normal na mga areglo sa paglilingkod sa langtad asin iskedyul sa paglinig dai dapat ipaisi sa plataporma kundi dapat na ipaskil sa information board. Kun kulang an itinalaan na oras sa kongklusyon para maitao an mga paisi o mabasa an mga surat, dapat na pakiulayan kan tsirman an mga may kabtang sa Pamumuhay Bilang Kristiyano na pahaliputon an kabtang ninda kun kinakaipuhan. (Hilingon an  parapo 16 asin  19.) Tatapuson an pagtiripon paagi sa kanta asin pamibi.

18. Pagkatapos kan kada asignasyon kan estudyante, an tsirman sa Pagtiripon na Pamumuhay Asin Ministeryo igwa sana nin mga sarong minuto para magtao nin komendasyon asin konseho basado sa nakaasignar na leksiyon. Pag iniintrodusir kan tsirman an kabtang kan estudyante, dai niya babanggiton kun sain na leksiyon tatawan nin konseho an estudyante. Pero, pagkatapos kan kabtang kan estudyante, asin pagkatao nin angay na komendasyon, puwedeng banggiton kan tsirman kun sain tatawan nin konseho an estudyante asin sabihon kun taano ta mahusay niyang nagibo iyan o mabuot na ipaliwanag kun taano asin paano dapat tawan kan estudyante nin urog pang atensiyon an puntong iyan. Puwedeng komentuhan man kan tsirman an iba pang aspekto kan demonstrasyon kun sa hiling niya papakinabangan iyan kan estudyante o kan mga nagdadangog. Pagkatapos kan pagtiripon o sa ibang panahon, puwede siyang magtao nin dagdag pang nakakatabang na pribadong konseho basado sa brosyur na Mamutan an mga Tawo, brosyur na Pagtutukdo, o librong Paadalan sa Pagmiministro, iyan man manungod sa leksiyon na iinasignar sa estudyante o sa ibang leksiyon.—Para sa dugang na impormasyon dapit sa papel kan tsirman sa Pagtiripon na Pamumuhay Asin Ministeryo asin kan auxiliary counselor, hilingon an  parapo 19,  24, asin  25.

19. Dai dapat sumobra sa oras an arin man na kabtang, pati na an mga sasabihon kan tsirman sa Pagtiripon na Pamumuhay Asin Ministeryo. Dawa nakalaag sa Workbook sa Pagtiripon na Pamumuhay Asin Ministeryo an lawig kan kada kabtang, kun nakobrehan na an mga punto kan materyal, dai na kaipuhan na magdagdag nin impormasyon para lang magamit an itinalaan na oras. Kun sumobra sa oras an mga kabtang, dapat na magtao nin pribadong konseho an tsirman sa Pagtiripon na Pamumuhay Asin Ministeryo o an auxiliary counselor. (Hilingon an  parapo 24 asin  25.) An bilog na programa, kaiba na an mga kanta asin pamibi, dapat na 1 oras asin 45 minutos.

20. Kun dalaw kan paraataman nin sirkito sa kongregasyon, an programa gigibuhon uyon sa nakasurat sa Workbook sa Pagtiripon na Pamumuhay Asin Ministeryo apuwera sa minasunod: An kabtang na Pag-adal sa Bibliya kan Kongregasyon sa seksiyon na Pamumuhay Bilang Kristiyano sasalidahan nin 30 minutos na pahayag sa paglilingkod kan paraataman nin sirkito. Bago kan pahayag sa paglilingkod, rerepasuhon kan tsirman sa Pagtiripon na Pamumuhay Asin Ministeryo an katatapos pa sanang programa, sasambiton an mga tutukaron sa sunod na semana, babasahon an kinakaipuhan na mga paisi asin surat, dangan iiintrodusir an paraataman nin sirkito. Pagkatapos kan pahayag sa paglilingkod, tatapuson kan paraataman nin sirkito an programa paagi sa kanta na pinili niya. Puwede siyang mag-asignar nin ibang brother para sa pantapos na pamibi. Mayong gigibuhon na dagdag na mga klase sa lengguwahe kan kongregasyon pag dalaw kan paraataman nin sirkito. Kun may grupo, puwede sindang magsagibo kan sainda man na pagtiripon dawa dalaw kan paraataman nin sirkito sa host congregation. Minsan siring, an grupo dapat na umiba giraray sa host congregation durante kan pahayag sa paglilingkod kan paraataman nin sirkito.

21. Pag semana nin asembleya o kumbensiyon, mayo nin pagtiripon an kongregasyon. Dapat na ipagirumdom sa kongregasyon na an nakaiskedyul na mga tutukaron sa pagtiripon sa semanang iyan dapat na pag-adalan nin personal o bilang pamilya.

22. Pag an Memoryal mataon sa ordinaryong aldaw kan semana, Lunes sagkod Biyernes, mayong nakaiskedyul na Pagtiripon na Pamumuhay Asin Ministeryo.

23. Sarong elder na pinili kan grupo nin kamagurangan an maglilingkod bilang paraataman sa Pagtiripon na Pamumuhay Asin Ministeryo. Paninimbagan niya na siguraduhon na an pagtiripon na ini magin organisadong marhay asin magibo sigun sa mga instruksiyon na ini. Dapat na igwa siyang marahay na komunikasyon sa auxiliary counselor. Pag igwa nang Workbook sa Pagtiripon na Pamumuhay Asin Ministeryo, iaasignar kan paraataman sa Pagtiripon na Pamumuhay Asin Ministeryo an gabos na kabtang sa midweek na pagtiripon para sa duwang bulan. Kaiba digdi an mga asignasyon na bakong para sa mga estudyante asin mga tsirman sa midweek na pagtiripon na kabilang sa mga naaprubaran kan grupo nin kamagurangan, pati na an mga asignasyon kan mga estudyante. (Hilingon an  parapo 3-16 asin  24.) Sa pagtao nin asignasyon sa mga estudyante, dapat niyang konsideraron an saindang edad, eksperyensiya, asin katalingkasan sa pagtaram sa temang tutukaron. Arog man kaiyan an dapat niyang konsideraron sa pagtao nin iba pang mga kabtang kan pagtiripon. An mga asignasyon dapat na itao kisiyera tulong semana bago an petsa kan asignasyon. Dapat na gamiton an form na Our Christian Life and Ministry Meeting Assignment (S-89) para sa mga asignasyon kan mga estudyante. Dapat na siguraduhon kan paraataman sa Pagtiripon na Pamumuhay Asin Ministeryo na mailaag sa information board an kopya kan iskedyul kan mga asignasyon para sa bilog na pagtiripon. Puwedeng mag-asignar an grupo nin kamagurangan nin saro pang elder o ministeryal na lingkod para magtabang saiya. Pero, mga elder sana an dapat na gamiton para mag-asignar nin mga kabtang na bakong para sa mga estudyante.

24. Kada semana, sarong elder an maglilingkod bilang tsirman sa bilog na Pagtiripon na Pamumuhay Asin Ministeryo. (Kun dikit an elder, puwedeng gumamit nin kuwalipikadong mga ministeryal na lingkod, kun kinakaipuhan.) Siya an maandam kan introduksiyon saka kongklusyon. Siya man an maintrodusir kan gabos na kabtang, asin depende sa kun pira an elder sa grupo nin kamagurangan, puwedeng sa saiya man iasignar an ibang kabtang sa pagtiripon, lalo na an mga kabtang na mapahiling man sana nin video na mayo man nin pagtukar. An mga sasabihon niya sa pag-ultanan kan kada kabtang dapat na haliputon sana. An grupo nin kamagurangan an mapili kun sairisay na elder an kuwalipikado sa katungdan na ini. An kuwalipikadong mga elder aasignaran na magin tsirman sa pana-panahon. Depende sa kamugtakan kan kongregasyon, an paraataman sa Pagtiripon na Pamumuhay Asin Ministeryo puwedeng mas parating gamiton bilang tsirman kisa sa iba pang kuwalipikadong mga elder. Kun an sarong elder kuwalipikadong magkondukta sa Pag-adal sa Bibliya kan Kongregasyon, posibleng marhay na kuwalipikado man siya na magin tsirman sa pagtiripon. Alagad, tandaan tabi na an elder na maglilingkod bilang tsirman kaipuhan na magtao nin mamumuton asin nakakatabang na komendasyon asin nin konseho, kun kinakaipuhan, sa mga estudyanteng may kabtang. Paninimbagan man kan tsirman na siguraduhon na matapos sa itinalaan na oras an pagtiripon. (Hilingon an  parapo 17 asin  19.) Kun gusto kan tsirman saka kun igwa man sanang lugar, puwedeng maglaag sa entablado nin sarong standing microphone tanganing pag iniintrodusir na niya an kada masunod na kabtang nagpoposisyon na sa podyum an brother na may kabtang. An tsirman puwede man tumukaw sa atubangan nin sarong lamesa sa stage durante kan asignasyon na Pagbasa sa Bibliya asin kan seksiyon na Magin Andam sa Ministeryo. Makakatipid ini nin oras.

25. Sagkod na posible, marahay na itao sa sarong elder na eksperyensiyadong ispiker an katungdan na ini. Paninimbagan niya na magtao nin pribadong konseho, kun kinakaipuhan, sa ano man na kabtang kan mga elder asin ministeryal na lingkod, kaiba na an mga kabtang sa Pagtiripon na Pamumuhay Asin Ministeryo, pampublikong pahayag, asin pagkondukta o pagbasa sa Pag-adal sa Torrengbantayan o Pag-adal sa Bibliya kan Kongregasyon. (Hilingon an  parapo 19.) Kun dakul an elder sa kongregasyon na mahusay magpahayag asin magtukdo, puwede sindang magsurusaralida bilang auxiliary counselor kada taon. An auxiliary counselor dai man kaipuhan na magtao nin konseho pagkatapos kan kada kabtang.

26. Depende sa bilang nin mga estudyante, an mga kongregasyon puwedeng magkaigwa nin dagdag na mga klase para sa mga asignasyon nin mga estudyante. An kada dagdag na klase dapat na igwa nin kuwalipikadong parakonseho, mas marahay kun elder. Kun kinakaipuhan, puwede ining iasignar sa kuwalipikadong marhay na ministeryal na lingkod. An grupo nin kamagurangan an madesisyon kun siisay an iaasignar asin kun baga masurusaralida an mga inasignaran digdi. Dapat na sunudon kan parakonseho an instruksiyon sa  parapo 18. Kun may dagdag na klase, papadumanon sa second hall an mga estudyante pagkatapos kan kabtang na Espirituwal na Kayamanan sa seksiyon na Kayamanan na Yaon sa Tataramon nin Diyos. Dapat na magbalik sinda sa main hall pagkatapos kan kabtang kan huring estudyante sa pagtiripon.

27. May piniling mga video na gagamiton para sa pagtiripon na ini. An mga video para sa midweek na pagtiripon magigin available sa JW Library^® app asin puwedeng ma-access gamit an iba-ibang gadyet.

© 2023 Watch Tower Bible and Tract Society of Pennsylvania

S-38-BI 11/23