Ol Niu Memba Blong Hed Kampani

LONG Sarede, Oktoba 2, 1999, wan spesel mesej i kamaot long Miting we Watch Tower Bible and Tract Society of Pennsylvania i mekem evri yia. Olgeta 10,594 man we oli stap long miting ya, no we oli stap lesin long hem tru long telefon laen, oli glad bigwan blong harem se i gat fo niu memba long Hed Kampani blong ol Witnes blong Jeova. Ol niufala memba ya, oli ol Kristin we tabu spirit i makemaot olgeta. Nem blong olgeta Samuel F. Herd; M. Stephen Lett; Guy H. Pierce; mo David H. Splane.

• Samuel Herd i statem wok blong paenia long 1958. Mo stat long 1965 i go kasem 1997, hem i lukaot long wok blong ol seket mo distrik asembli. Afta long taem ya, hem mo woman blong hem, Gloria, tufala i kam memba blong Betel blong Yunaeted Stet. Long ples ya, Brata Herd i wok long Sevis Dipatmen. Hem i givhan tu long wok blong Sevis Komiti.

• Stephen Lett i statem wok blong paenia long Desemba 1966. Stat long 1967 kasem 1971, hem i wok long Betel long Yunaeted Stet. Long Oktoba 1971, hem i mared wetem Susan, mo tufala i joen long wok blong spesel paenia. Long 1979 i go kasem 1998, hem i mekem wok blong seket elda. Stat long Epril 1998, hem mo Susan, tufala i kam memba blong Betel blong Yunaeted Stet. Long ples ya hem i wok long Sevis Dipatmen mo i givhan tu long wok blong Tijing Komiti.

• Guy Pierce i mared mo i gat pikinini blong lukaot fastaem, nao biaen, hem mo woman blong hem, tufala i statem wok blong paenia long Epril 1982. Hem i mekem wok blong seket elda long 1986 go kasem 1997, nao hem mo waef blong hem, Penny, tufala i kam memba blong Betel long Yunaeted Stet. Brata Pierce i bin mekem wok long Pesonel Komiti.

• David Splane i statem wok blong paenia long Septemba 1963. Hem i joen long klas namba 42 long skul blong Gilead, mo i mekem wok blong misinari long Senegal, Afrika. Biaen, hem i wok 19 yia olsem seket elda long Kanada. Hem mo waef blong hem, Linda, tufala i joenem Betel blong Yunaeted Stet long 1990. Long ples ya, Brata Splane i wok long Sevis Dipatmen mo Raeting Dipatmen Stat long 1998, hem i bin givhan tu long wok blong Raeting Komiti.

Antap long ol fo niufala memba ya, ol narafala brata we oli stap naoia long Hed Kampani i gat C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, mo D. Sydlik. Yumi evriwan i prea se Jeova i gohed blong blesem mo givim paoa long Hed Kampani, we naoia i kam bigwan moa, taem hem i gohed blong lukaot long wok we ol man blong God oli stap mekem raon long wol mo givim ol samting we oli nidim long saed blong spirit.