SƐ NYIMPA bi dzi Nyankopɔn nokwar na nsɔhwɛ bi a no mu yɛ dzen to no, na ohu dɛ sɛ ɔkɔ do dzi nokwar mpo a orinnya hwee mmfi mu a, ana ɔbɔkɔ do asom Nyankopɔn anaa? Dɛm asɛmbisa yi soɛree wɔ ɔbarimba bi a wɔfrɛ no Job n’asetsena mu no, na oyii ano.

Nna Job yɛ Abraham no busuanyi, na aber a nna Israelfo no wɔ Egypt no na ɔtsenaa ase. Nna ɔtse beebi a ndɛ wɔfrɛ no Arabia no. Da kor bi, ɔsor abɔfo nyina kegyinagyinaa Nyankopɔn enyim, na etuatsewnyi Satan so kopuei hɔ bi. Jehovah kae ma abɔfo no nyina tsee dɛ, Job yɛ no somfo a odzi nokwar, na ɔgye no dzi. Jehovah kaa pen dɛ sɛ ɔhwɛ asaase do a, nyimpa biara nnyi hɔ a odzi no nokwar tse dɛ Job. Naaso Satan kaa dɛ Nyankopɔn ehyira Job na ɔabɔ noho ban, ɔno ntsi na Job som no no. Satan dze kaa ho dɛ, sɛ Job n’egyapadze nyina fi ne nsa a, ɔbɛkasa etsia Nyankopɔn.

Nyankopɔn maa Satan kwan dɛ ɔmma Job n’egyapadze na ne mba nyina mfi ne nsa, na ekyir yi ɔmaa Satan kwan ma ɔbɔɔ Job yarba. Nna Job nntse ase dɛ Nyankopɔn ama kwan ma nsɔhwɛ a ɔtse dɛm ato no. Naaso, nna onnyim dɛ ɔyɛ Satan na ɔdze ɔhaw no nyina aba no do. Iyi nyina mu no, Job anndan n’ekyir amma Nyankopɔn.

Job n’anyɛnkofo bi kɛseraa no. Nna hɔn suban nnyɛ koraa. Nsɛm a wɔkekaa kyerɛɛ Job nyina, wɔakyerɛw wɔ Job nwoma no mu. Nna wɔpɛ dɛ wɔma Job nya noho ntseasee dɛ ɔayɛ bɔn bi esie, ntsi na Nyankopɔn rotwe n’aso no. Wɔdze kaa ho mpo dɛ Nyankopɔn nngye n’asomfo nndzi, na hɔn asɛm mpo mmfa noho. Naaso, Job ammfa n’asowa amma dɛm nsusui hun no. Job dze ahotodo kaa dɛ papa mu o, bɔn mu o, ɔbɔkɔ do ara edzi Nyankopɔn nokwar ekesi owu mu!

Naaso mfom a Job dzii nye dɛ, nna ɔpɛ dɛ ɔma obiara hu dɛ ɔnnyɛɛ bɔn biara. Ntsi ɔkekaa nsɛm bi a nna ɔnnsɛ dɛ ɔka. Dza nna ɔrokɔ do nyina, nna aberantsɛ bi a wɔfrɛ no Elihu ritsie. Ntsi ekyir yi, ɔno so dze n’ano too asɛm no mu bi. Ɔkaa dɛ, ɔwɔ dɛ obiara gye to mu dɛ Jehovah Nyankopɔn na ɔfata dɛ odzi hɛn do tum, na iyi ho hia koraa sen dɛ obi bɛkyerɛ dɛ n’asɛm yɛ dɛw. Osiandɛ Job ennhu dɛm nokwasɛm yi ntsi, Elihu kasaa n’enyim. Job n’anyɛnkofo a nna hɔn suban nnyɛ no so, Elihu kasaa hɔn paa.

Ekyir yi, Jehovah Nyankopɔn nye Job kasae, na ɔtseen n’adwen. Jehovah twee Job n’adwen kɔr abɔdze a ɔyɛ nwanwa no do, na ɔmaa Job hun dɛ, sɛ wɔdze nyimpa toto Nyankopɔn ne kɛseyɛ ho a, nyimpa nndu ho hwee koraa. Job fi ahobrɛadze mu gyee ntsea a Nyankopɔn dze maa no no too mu. Osiandɛ Jehovah yɛ “tsimbɔbɔr nye ehumbɔbɔr” ntsi, ɔsaa Job yarba, ɔmaa ne nsa kaa n’egyapadze a ɔhweree no, na ɔdze bɔɔ ho ebien mpo. Afei so, ɔmaa Job woo mba du. (James 5:11) Osiandɛ Job kɔr do dzii nokwar aber a Satan sɔɔ no hwɛe no ntsi, ɔmaa asɛm a Satan kaa dɛ, sɛ nsɔhwɛ a no mu yɛ dzen to nyimpa a, wobɛdan hɔn ekyir ama Nyankopɔn no yɛɛ ator.

​—Ofi Job nwoma no mu.