Püküja wamüin tü alatakat pümüin

Jemeisü taya soʼu 1979 chaa Estados Unidos. Wanaa sümaa apünüin juya taya ooʼulaajiraashii na kachonniikana taya. Shiajeseʼe epijaka taya tü teikat sümüiwaʼa wanaapünaa sümaa tü nakuwaʼipakat na judíokana. Oʼunapuʼusü taya suluʼu tü koleejia napülajatkat na judíokana kanüliaka yeshivás. Wanaa sümaa akaratshin touyase akolojooshii waya Israelmüin. Kibutz sünülia tü koleejia toʼunapuʼukalü aluʼu, müsü sünülia eere kepiain na apünajüliikana. Wanee juya süchikijee akolojooshii waya Méxicomüin.

Mayaainjeʼe nnojoluin eein pejepünaa sünain wepia nekirajüle na judíokana ayatüsia taaʼinrüin tü ekirajünakalü anain taya: achuwajaapuʼusü taya weela saawanoʼulüin, taashajeʼerüin tü Torákat [tü ashajuushi kojutuka namüin na judíokana], tashatapuʼuin tanüiki toʼuraajüinjatpa suluʼu tü kanüliakat sidur, shia wanee karaloʼuta süpüla oʼuraajaa. Kamalainpuʼusü tamüin taküjain süchiki namüin na koleejiajiraakana tamaa shiain tü iküleesia shiimainsükat kaluʼukat taya, nnojotpuʼusü taashajeʼerüin tü Bibliakat, tü süchikimaajatkat niʼyataain jee nikirajaaka anain Jesucristo, nnojo paashajeʼerüin shia suulia mojuin pukuwaʼipa sutuma mapuʼusü tü teikat tamüin.

¿Jamüsü paashajeʼeraka tü Bibliakat mapa?

Wanaa sümaa poloo akaratshin touyase, aleʼejüsü taya Estados Unidosmüin süpüla tajaʼttirüin tü tekirajaakalü anain suluʼu eʼikülee miyoʼu. Nnojoleerü anain pukuwaʼipa nnojorüle punoujain nünain Jesús, nümaka tamüin wanee taʼaleewain anoujashi.

Tamaka nümüin: na wayuu anoujakana nünain Jesús emeejünüshii naya.

¿Eeiria paashajeʼerüin tü Bibliakat Nuevo Testamento?

Nnojo.

¿Jamaka maka pünüiki mayaa sümaa nnojo eein paashajeʼerayain shia? Shia maka anüiki tü wayuu matüjainsatkalüirua.

Japüittaasü taaʼin süka wanaawain tü tanoujakat nümaa. Taapakat tü Bibliakat, talüʼüjaka shia piichipaʼamüin süpüla taashajeʼerüin shia

¿Jamüsü saaʼin pümüin tü paashajeʼerakat?

Ponusü maʼin taaʼin tü taashajeʼerakat süka nashajalain shia wayuu judío. Sümaʼinruʼu taashajeʼerüin shia tayaawata aaʼulu niain Jesús wanee wayuu kamaneekai maʼin, nnojoika yaletüin aaʼin, aisü nüpüla wayuu otta nnojotsü müliain shia nutuma. Toʼunaka suluʼumüin tü biblioteekakat süpüla taashajeʼerüin karaloʼutairua aashajaaka nüchiki Jesús. Nnojotpejeʼe tanoujain sutuma sünain niain Jesús chi nüneekajalakai Maleiwa. Eeshi eekai niaʼinña neʼe Jesús Maleiwa naashin, nnojotpejeʼe müin shia saaʼin tamüin. Eesü mapülee tanüiki: «¿Jaraiche chi nuʼuraajapuʼukai amüin Jesús? ¿Niachejeʼe neʼe niakaʼiya neʼe?». Otta müshia Jesús outushi nia, mapejeʼe sünüiki tü Bibliakat nüchiki Maleiwa: «Pia matüjainkai outaa». a

¿Kasakaʼa paaʼinrüin?

Matüjainsat oʼtchejawaa tü shiimainkat tatüjawee aaʼulujeseʼe shia, oʼuraajüsü taya teʼiraluʼu nümüin Maleiwa. Nnojotsü taaʼinrüin shia sükajee tü karaloʼutakat sidur. Kettaapa toʼuraajüin, ataletünüsü soʼu tepia natuma piamashii aküjaliikana pütchi nüchiki Jehová. Süchikijee naashajaain tamaa napütüin tapüla wanee poyeeto. Shiʼipaʼaya taashajaain namaa jee taashajeʼerüin tü karaloʼuta naapakat tamüin tayaawata aaʼulu shiimain maʼin tü nanoujakalü anain suluʼujeeinjatü shia Bibliakat. Jamüshiijaʼa na Aküjaliikana Pütchi nnojotsü nanoujain anain niaʼinña neʼe Jesús chi Maleiwakai otta tü nüpülainkat, nüchon nia Maleiwa b, nia chi nukumajatüjüikaʼaya palajana suulia kasa süpüshuaʼa. c

Ouyantaasü joo taya mapa tachikuaʼaya Méxicomüin. Ayatakaʼaya tekirajaain tü pütchikat aküjünatüjütkalia nüchiki chi Mesíaskai namaa na Aküjaliikana Pütchi. Wainma maʼin tekirajaaka anain. Mayaapejeʼe müin shia, ayatüsia wainmajüin taaʼin, tasakirapuʼuin taaʼin: «¿Nia neʼe Jesús nümüiwaʼa ekeraajakai anain tia pütchi aküjünatüjütkalia? ¿Mesíayaatapa neʼe nia süpüla nemeejüin wayuu?».

¿Kasakaʼa punoujain atuma?

Nekirajüin taya na Aküjaliikana pütchi sünain shikeraajüin tü pütchi aküjünatüjütkalia nünain Jesús. Jamüsüjaʼa 700 juya süpülapünaa jemelin chi Mesíaskai nüküjatüjülia Miqueas chainjachin jemelin nia Belén. d ¿Jara atüjaatüjütka saaʼu jalainjachin jemelin chi Mesíaskai? Ashajüshi Isaías süchiki outajachin chi Mesíaskai maʼaka naaʼin wanee kaʼruwarai otta nojoitüneechin saʼaka washinnuu. e Süpüshuaʼaya tia pütchi aküjünatüjütkalia ekeraajüsü nünain Jesús.

Wanee kasa kapüleeka maʼin tamüin tatüjaain saaʼu shia jaralin na nutuushinuukana Jesús. Jamüsaʼa tü Bibliakat süküjain niainjachin David nutuushi chi Mesíaskai. f Na judíokana yaawasü natuma nachikimaajatü na natuushinuukana, nnojorülejeʼe müin shia nnojoishi atüjaanüin aaʼu Jesús nüpüshin nia David. Aküjünüsüjeʼe alawaain tü nümakat natuma na nüʼünüükana, nnojotsü naaʼinrüin tia süka lotoshoonoin tü aküjünakat nüchiki otta müshiʼiya na wayuukana aʼwaatüshii maʼin sünain naküjain nüchoin nia David. g

Soʼu tü juyakat 70, 37 juya süchikijee outuin Jesús, na surulaat romanokana najaʼttirüin Jerusalén otta müsia nachikimaajatü napüshuaʼa na nutuushinuukana Jesús amülouisü. Müsüjeseʼe süpüla sütüjaanüin aaʼu jaralin na nutuushinuukana chi Mesíaskai eeʼiyataatüjüiya nia süpülapünaa sajaʼttinnüin Jerusalén.

¿Jamakaʼa joo pukuwaʼipa mapa?

Suluʼu Deuteronomio 18:18, 19, nüküjatüjülia Maleiwa eejeechi wanee wayuu maʼaka naaʼin Moisés suluʼu nünüikimaainjachin nia chaa Israel, müshia nia: «Chi wayuu nnojoikai aapaain sümaa tanüiki nüküjeetka tanülialuʼu, süsaleechi nia sünainjee tia tatuma». Süka tekirajaain maʼin sünain tü Bibliakat, ayaawataa aaʼu niain Jesús chi Mesíaskai.