Sunouteʼerüin nakuwaʼipa tü Bibliakat

«Wainma kasa tatüjaweeka aaʼu» (RAUDEL RODRÍGUEZ RODRÍGUEZ)

JUYA JEMEIKA OʼU NIA: 1959

NUUMAINKA: CUBA

TÜ NAAʼINRAPUʼUKAT: POLIITIKO MOJULAAPUʼUKAI MAʼIN

TAKUWAʼIPAPUʼUKA: Jemeishi taya La Habana (Cuba), kepiashi taya suluʼu wanee barrio eere maʼletsein wayuu otta müsia joutsü atkeʼeraa na jimaʼaliikana suluʼu kaaye. Jimaʼaliiwaʼaya taya kamalainsü maʼin tamüin tü yudokot sümaa asheʼejirawaa.

Süka anain maʼin tanootain suluʼu tü koleejiakat natütülüin taaʼin na kachooinkana taya süpüla toʼunuin suluʼu tü eʼiküleekat miyoʼu. Yalaala tanouja anainrü choʼujaain sunouteʼennüin sukuwaʼipa aluwatawaa eere kepiain taya müshijeseʼe teʼrüijaain wayumüin. Washuta aaʼuchi wanee pulusiia nümaa wanee koleejiajiraakai tamaa süpüla waʼluwajüin tü naʼapülakat. Wayaajaka nia otta aikaasü nikii watuma, sünainjee tia püreesashii waya atumawaa jee aküjünüsü wamüin woʼutunajanüin aaʼin. Outataachijeʼe taya atumawaa wanaa sümaa 20 neʼe touyase.

Wanaa sümaa suttuin taya jülüja müsü taaʼin jameerüin takuwaʼipa neʼipajee na eʼitajanakana taya süpüla nnojoluinjatüin jaʼyain taaʼu mmoluin taya otta müsia wainma kasa tasakiraka anain taaʼin maʼaka saaʼin jamüin müliaka waya jee müinjatüle neʼe wakuwaʼipa mayaa.

SUNOUTEʼERÜIN TAKUWAʼIPA TÜ BIBLIAKAT: Shiasaʼa mapa suʼwanajanaʼala sümaka nnojoluin woʼutunajanain aaʼin, püreesainjana neʼe waya soʼu 30 juya. Teʼraajaka mapa waneinnua Aküjalii pütchi püreesakana saaʼujee nanoula. Ponokalaka maʼin taaʼin meimmoluin naaʼin jee jimatüin naaʼin. Mayaainjeʼe püreesain naya atumawaa saaʼujee kasa mojusü nnojotka naaʼinrüin nnojoishii jashichin naya.

Naküjain tamüin na Aküjaliikana Pütchi tü keeʼireekat naaʼin Maleiwa napüleerua na wayuukana. Neeʼiyatüin tamüin sükajee tü Bibliakat paʼaraiiseerüin tü mmakat, eere nnojoleerüin wayuu mojulaasü otta nayeenain neʼe na wayuu lotokana akuwaʼipa kepiain saaʼu süpüla kaʼikat süpüshuaʼa (Salmo 37:29).

Kamalainsü maʼin tamüin tü nekirajaakalü anain nnojotpejeʼe wanaawain tü takuwaʼipakat namaa. Jülüja müsü taaʼin iseerüin tachiki tooʼulaain suulia poliitika jee müsia taaʼinrüin tü sümakat tü Bibliakat süchiki nnojoluinjachin jashichin taya. Tekirajaka sünain tü Bibliakat süka taaʼin tamüiwaʼa. Mayaasü tajaʼttirüin taashajeʼerüin tü Bibliakat tayaawataka saaʼu nayain neʼe na aküjaliikana pütchi nüchiki Jehová müin akuwaʼipa maʼaka naaʼin na anoujashii eejanakana nükalioʼu Cristo.

Sutumajee tekirajaain sünain tü Bibliakat tayaawatüin saaʼu tanouteʼerajatüin takuwaʼipa jee tayaawatüinjatüin saaʼu tanüikipala süka yarüttapuʼuin maʼin shia. Tooʼulaainjachin suulia akaijaa tawaako jee nnojoluinjachin sünainpünaain taya poliitika. Tountapejeʼe taaʼinrüin tia süka nükaalinjain taya Jehová mayaainjeʼe kapüleein shia tamüin.

Ayatayülia kapüleein tamüin tachecherüin taaʼin suulia taashichijaain müsüjeseʼe tachuntashaatain nümüin Maleiwa süpüla nükaaliijainjachin taya süpüla tachecherüinjatüin taaʼin. Jalouisü maʼin tamüin tü sümakat Proverbios 16:32, eere sümüin: «Chi wayuu nnojoika kaashichijaaralin anaʼleeshia maʼin nuulia chi eekai katchin otta chi achechetkai naaʼin nuulia chi ashutakai soʼu wanee pueulo».

Woutiisashi taya soʼu 1991, chayaa suluʼu tü kaatsetkat suluʼu wanee tanque. Waneemüin juya süchikijee kojuyashii waya sünain wojuʼitüin suluʼujee tü katseetkat jee aluwataanüshi taya Españamüin eere eejanain na tapüshikana. Tantapa joo chaʼayaa Españamüin outkajaashi taya namaa na Aküjaliikana pütchi, kamaneeshii maʼin naya tamüin mataashi kakaliaichikai neʼraajüin taya jee nakaalinjain taya süpüla anainjatüin taaʼin.

TÜ KASA ANASÜ TEʼRAKAT: Anasü maʼin taaʼin jooluʼu, aʼyataashi nümüin Maleiwa sümaa taʼwayuuse otta tachonnii. Aküjashi maʼin taya pütchi sümaa tekirajüin na wayuukana sünain tü Bibliakat. Eesü jülüjawaire taaʼin tü alatakat tamüin wanaa sümaa 20 touyase, outataaichijeʼe taya, talatapejeʼe maʼin taaʼin süka nnojoluin müin shia. Nnojotsü shiain neʼe sutuma katüin toʼu, shia sutuma tatüjaain saaʼu eejeerüin kasa anasü mapeena. Kasataalejeseʼe süntüin maalü tü kasa anasükat, tü kaʼi nnojoleetkalü oʼu eein kasa mojusü jee outaa (Alateetkat Mapeena 21:3, 4).