PELAJAR 25

Baka Ni Aku Ulih Ngelaban Tebiat Ngeluchu?

“Kenyau ari umur lapan taun, aku udah berengkah ngeluchu. Nyau kelama, baru meh aku nemu nama runding Petara pasal tebiat aku tu. Aku nguji ngetuka ulah tu, tang selalu enda mujur. Nya ngasuh aku berasai besalah. Aku nanya diri, ‘Nadai jaku Petara ulih rinduka orang ke baka aku.’”—Luiz.

LEBUH nuan akil baligh tauka maya mansang nyadi nembiak, pengingin seks nya amat kuat. Ketegal tu, mayuh nembiak ngeluchu ba timpuh tu. a Tang sida enda ngasaika tu penanggul ti besai. Indah, bisi ke ngumbai, “Ukai nya aku ngemediska sapa-sapa.” Tang ajar Bup Kudus bisi nerangka kebuah kitai patut nyeliahka diri ari tebiat tu. Rasul Paul nulis, “Buai abis pengingin perengka tubuh kita, . . . pengingin seks ke enda ditagang.” (Kolosi 3:5) Tebiat ngeluchu enda ulih muai pengingin seks, tang meransang nya. Kelimpah ari nya, peratika kesan negatif ke bukai:

● Ngeluchu meransang sesiku orang mentingka diri empu. Iya semina berunding deka ngemuaska pengingin seks diri empu aja.

● Tebiat ngeluchu mega ngasuh orang nya ngumbai orang bukai semina utai kena iya ngulihka ati ti puas ba seks.

● Ketegal orang ke ngeluchu semina berundingka diri empu, tu ngujungka kaul iya enggau kaling pengidup iya rusak.

Nya alai, anang meh ngeluchu ketegal deka ngemuaska pengingin diri empu ba seks. Tang, bebendar meh nagang diri. (1 Tesalonika 4:4, 5) Titihka meh lalau ari Bup Kudus, ke ngasuh kitai nyeliahka diri ari situasi ke ulih meransang pengingin seks ti salah. (Jaku-Dalam 5:8, 9) Baka ni enti nuan udah lama ngembuan tebiat tu, tang lalu bedau ulih ngetuka nya? Nuan engka udah putus asa. Nya meh asai ati siku nembiak ke benama Pedro. Ku iya, “Aku berasai pedis ati tiap kali aku enda ulih ngelaban pengingin aku ke salah tu. Aku ngasaika Petara sigi enda ngampunka aku. Nya kebuah aku tusah ka besampi ngagai Iya.”

Kati nuan mega baka Pedro? Enti au, anang meh putus asa. Mayuh orang udah mujur ngelaban pengingin tu, lalu nuan pan ulih!

Putarka Asai Ati Nuan ke Besalah

Iya ke amat, enti nuan bisi berasai besalah ketegal ngeluchu, nya manah. Nama kebuah? Bup Kudus madahka, “Penusah ati kita ke sejalai enggau peneka Petara” ulih ngasuh nuan keran agi deka ngetuka tebiat tu. (2 Korint 7:11) Taja pia, enti nuan kelalu balat nyalahka diri, nuan mega deka lemi semengat lalu deka nyerah kalah aja.—Jaku-Dalam 24:10.

Nya alai, nuan patut ngembuan runding ti masuk akal. Ngeluchu siti tebiat ti kamah, sereta ngasuh nuan berundingka diri empu, lalu “nyadi ulun mayuh macham pengingin enggau pengelantang diri.” (Titus 3:3) Pia mega, ngeluchu ukai sebagi ari pengawa seks ti enda bemoral. (Jude 7) Reti iya, enti nuan bisi tebiat ngeluchu, nuan agi ulih diampunka seagi nuan bebendar ngelaban nya, lalu enda putus asa.

Enti nuan udah bebendar ngelaban nya, tang agi enda mujur, nuan engka berasai malu sereta asa ati. Tang munyi ku jaku ba Jaku-Dalam 24:16 ke madah, “Orang ke lurus ati nyangka rebah tujuh kali, lalu sida angkat baru; tang orang ke jai deka alah laban penusah.” Nya alai, anang meh ngalahka diri. Uji peratika, nama utai ke meransang nuan bisi pengingin ti salah tu, udah nya baka ni nuan ulih nyeliahka diri ba maya bukai.

Giga meh awak beratika pemesai pengerindu sereta pengasih Petara. Raja David mega kala alah laban pengingin diri. Lalu ku iya madah, ‘Baka apai ke nelap enggau anak diri, baka nya meh Jehovah nelap enggau orang ke nangika Iya. Iya nemu utai ti udah dikena ngaga kitai. Iya ingatka kitai tu endang amau.’ (Masmur 103:13, 14) Amat, Jehovah ingatka kitai enda sempurna sereta Iya sanggup ngampunka kitai. (Masmur 86:5) Tang anang enda ingat, Iya agi dekaka nuan naka ulih ngelaban pengelemi diri. Nama chara kena nuan muai tebiat ti enda manah tu?

Nama jenis pemerindang ke dipilih nuan? Kati nuan meda wayang, program TV, tauka laman web ke meransang nuan bisi pengingin seks ti salah? Lebuh penulis Masmur besampi, ku iya, “Anang ngasuh mata aku merening ngagai utai ti ngasuh aku sumbung.” Tauka, enti nitihka Salin Dunya Baru, anang merening ngagai utai ke nadai guna.—Masmur 119:37.

Mejal diri berundingka utai bukai. Siku menyadi ke benama William madahka, “Sebedau tinduk, bacha meh sesiti utai ke ulih negapka pengarap. Tu amat penting kena nuan ngelimpangka runding diri ari utai ke salah.”—Pilipi 4:8.

Padahka ngagai orang ke ulih dipechaya lalu pinta meh bantu ari sida. Nuan engka malu deka nyebut utai tu. Tang tu siti chara ti amat penting kena nuan ngetuka tebiat ti enda manah tu. Siku lelaki ke benama David madah, “Aku madahka penanggul aku ngagai apai aku. Aku agi ingat nama utai ke disebut iya. Enggau nelap iya madahka aku, ‘Aku amat temegahka nuan.’ Iya faham, pekara tu enda senang ba aku. Jaku apai ngeringka pengeran aku deka ngetuka tebiat tu.”

“Udah nya, apai pan nunjukka aku beberapa iti ayat Bup Kudus kena meransang aku. Iya ngasuh aku andal, aku ulih berubah lalu muai tebiat ti enda manah tu. Ba maya ti sama, iya mega nunjukka nama asil ti enda manah enti aku enda ngetu ari tebiat tu. Apai meransang aku ngelaban tebiat nya dalam sesiti timpuh. Enti aku bisi ati deka ngereja nya baru, iya ngingatka aku anang putus asa. Tang, aku ulih terus nyeliahka tebiat nya dalam siti timpuh ke panjai, nitihka kemampuan aku. Iya mega besemaya, deka berandauka pekara tu enggau aku ba maya bukai.” Ari pengalaman tu, David nyimpulka, “Aku bulih penguntung ti besai ketegal aku madahka penanggul tu ngagai sesiku orang.”

PELAJAR KE NANGKANKA TU

Kati seks bibas nya pekara ti biasa? Peda meh nama saut iya.

[Nota kaki]

BATANG AYAT

“Rari ari pengingin ke dikembuan maya agi nembiak, tang bebendar meh ngulihka pengelurus, pengarap, pengerindu, sereta pengelantang, begulai enggau sida ke ngangauka Tuan enggau ati ti tuchi.”—2 Timoti 2:22.

TIP

Bebendar meh besampi sebedau pengingin ti salah nya nyadi kuat agi. Pinta meh Jehovah meri nuan “kuasa” kena ngelaban penguji.—2 Korint 4:7.

KATI NUAN NEMU . . . ?

Amat senang alai kitai alah laban pengingin seks ti salah. Tang, semina lelaki enggau indu ti sejati ke ulih nagang diri, kelebih agi maya sida kediri aja.

PELAN AKU!

Aku ulih fokus ngagai utai ti beresi enti aku

Ari ke alah diuji, aku deka

Ba topik tu, aku deka nanya apai indai aku

NAMA RUNDING NUAN?

● Nama kebuah penting amat alai kitai ingat, Jehovah nya Petara ti rindu “ngampun”?—Masmur 86:5.

● Taja pan Petara udah meri nuan bisi pengingin seks, tang Iya ka nuan nemu nagang diri. Ari tu, Iya andalka nuan ulih ngereja nama?

[Blurb]

“Ati aku enda ngukum aku agi pengudah aku mujur muai tebiat tu. Aku pan nemu Jehovah gaga ati enggau aku, lalu nya meh utai ti pemadu penting ba aku!”​—Sarah

[Gambar]

Enti sesiku orang labuh maya benung belumba, iya agi ulih angkat baru lalu neruska lumba nya. Sama mega, enti nuan bisi pengingin deka ngereja tebiat ti enda manah ke suba, nuan ulih ngelaban nya. Anang ngumbai usaha nuan nadai guna