1. Nama utai ke didinga Paul pasal bala menyadi Kristian ba Korint ke ngasuh iya berasai lantang agi?

BA taun 55 M., rasul Paul ninga pasal bala menyadi ba Korint ke bekelikuh enggau pangan diri. Iya rinduka sida baka seiku apai ke rinduka anak. Nya alai, iya ngirum surat kena ngemetulka sida. (1 Kor. 1:11; 4:15) Paul mega ngasuh kaban iya Titus ngabas sida lalu udah nya betemu enggau iya ba penyangkai kapal ba Troas kena madahka utai ti nyadi. Beberapa bulan udah nya, Paul nganti penatai Titus ba Troas kena nemu baka ni gaya bala menyadi ba Korint. Tang sayau amat, Titus enda datai. Ketegal nya, Paul mupuk ngagai Masedonia. Iya gaga ati lebuh betemu enggau Titus enda lama udah nya ba dia. Titus madahka iya, bala menyadi Kristian ba Korint nitihka jaku lalau Paul lalu deka betemu enggau iya. Lebuh Paul ninga nya, iya “berasai lantang agi.”—2 Kor. 2:12, 13; 7:5-9.

2. (a) Nama utai ke ditulis Paul ngagai bala menyadi ba Korint pasal pengarap enggau pengaga? (b) Nama tanya ke deka disaut kitai?

² Enda lama udah nya, Paul nulis siti agi surat ngagai bala menyadi ba Korint. Iya madahka sida: “Ukai reti nya kami merintah pengarap kita, tang bekereja enggau kita ke pengaga kita, laban kita bediri tegap ulih pengarap kita.” (2 Kor. 1:24) Nama reti utai ku Paul? Nama ulih dipelajarka bala tuai gempuru ari jaku nya?

3. (a) Nama reti ku Paul lebuh iya nulis: “Ukai reti nya kami merintah pengarap kita, tang . . . kita bediri tegap ulih pengarap kita”? (b) Baka ni tuai gempuru kemayaharitu nunda teladan Paul?

³ Paul madahka dua iti kualiti ti beguna ke enda tau enda bisi ba orang Kristian—pengarap enggau pengaga. Bekaul enggau pengarap, Paul nulis: “Ukai reti nya kami merintah pengarap kita, tang . . . kita bediri tegap ulih pengarap kita.” Paul nemu bala menyadi ba Korint nyembah Petara enggau tetap ati ketegal pengarap sida empu ngagai Petara, ukai ketegal iya tauka orang bukai. Iya andal, sida amat rinduka Petara lalu deka ngereja utai ti betul. Nya alai, Paul enda ibuh sereta enggai merintah pengarap bala menyadi iya. (2 Kor. 2:3) Kemayaharitu, tuai gempuru nunda Paul sereta pechaya bala menyadi bisi pengarap ngagai Petara sereta nyembah Iya enggau tuju ati ti manah. (2 Tes. 3:4) Tuai gempuru enda ngaga atur ti terit ngagai eklisia, tang sida nulung bala menyadi ngaga pemutus ngena prinsip Bup Kudus lalu nitihka iring ari gerempung Jehovah. Kemayaharitu, bala tuai gempuru enda merintah pengarap bala menyadi sida.—1 Pet. 5:2, 3.

4. (a) Nama reti ku Paul lebuh iya nulis: “Kami bekereja enggau kita ke pengaga kita”? (b) Baka ni tuai gempuru kemayaharitu nunda teladan Paul?

⁴ Paul mega nulis: “Kami bekereja enggau kita ke pengaga kita.” Sapa orang ke sama bekereja enggau kita? Sida nya meh orang ke bebendar bekereja enggau Paul nulung eklisia ba Korint. Baka ni kitai nemu? Ba surat ti sama ngagai eklisia ba Korint, Paul bisi nyebut dua iku ari sida. Dia Paul nulis: “Jesus . . . udah ditusui Silas, Timoti enggau aku empu ngagai kita.” (2 Kor. 1:19) Paul mega bisi nyebut pasal orang ke “sama bekereja” ke bukai, baka Apollos, Akuila, Prisila, Timoti, enggau Titus. (Rom. 16:3, 21; 1 Kor. 3:6-9; 2 Kor. 8:23) Nyadi, lebuh Paul nulis: “Kami bekereja enggau kita ke pengaga kita,” iya benung madah ngagai eklisia ba Korint pasal iya enggau orang ke sama bekereja enggau iya ke deka ngereja sebarang utai kena nulung eklisia nyembah Petara enggau gaga ati. Pia mega enggau bala tuai gempuru kemayaharitu. Sida deka ngereja sebarang utai ngambika bala menyadi ulih ‘nyembah Jehovah enggau ati ti gaga.”—Mas. 100:2; Plp. 1:25.

5. Nama utai ke ditanya ngagai sekeda bala menyadi Kristian?

⁵ Baru-baru tu, sekeda bala menyadi Kristian ke ransing ari serata dunya bisi nanya tanya tu, “Nama jaku tauka utai ke digaga seiku tuai gempuru ke ngasuh nuan lantang ati agi?” Lebuh kitai berandauka saut sida, perundingka jaku tauka utai ti digaga tuai gempuru ke udah ngasuh nuan lebih agi lantang ati. Peratika mega baka ni kitai ulih ngasuh eklisia kitai lantang ati agi. *

6, 7. (a) Baka ni bala tuai gempuru ulih neladan Jesus, Paul enggau nembiak Petara ke bukai? (b) Nama kebuah bala menyadi berasai gaga ati lebuh kitai ingatka nama sida?

⁶ Mayuh bala menyadi Kristian berasai gaga ati lebuh tuai gempuru ngayanka pengibuh ngagai sida. Siti chara tuai gempuru ngereja nya, iya nya neladan David, Elihu, enggau Jesus. (Bacha 2 Samuel 9:6; Jop 33:1; Luke 19:5.) Tiga iku nembiak Jehovah tu ngayanka pengibuh ngagai orang bukai lebuh sida ngena nama orang nya. Paul mega nemu kebuah ingat sereta ngena nama bala menyadi nya amat beguna. Iya ngujungka siti ari surat iya enggau meri tabi basa ngagai lebih ari 25 iku menyadi Kristian, nyengkaum Persis, seiku menyadi Kristian indu. Paul madah: “Aku ngirumka tabi basa ngagai Persis, pangan ke dikerinduka aku.”—Rom. 16:3-15.

⁷ Sekeda tuai gempuru tusah deka ingatka nama. Tang, lebuh tuai gempuru bebendar ngereja nya, sida baka ke benung madah, ‘Nuan berega ba aku.’ (P-sut. 33:17) Bala menyadi berasai gaga ati lebuh tuai gempuru ngangauka nama sida maya belajarka majalah Menara Jaga tauka gempuru bukai.—Banding John 10:3.

8. Baka ni Paul neladan Jehovah enggau Jesus?

⁸ Paul mega ngayanka pengibuh ngagai bala menyadi lebuh iya muji sida. Tu siti ari chara tuai gempuru ulih nulung bala menyadi nyembah Petara enggau gaga ati. Ba surat iya ngagai bala menyadi ba Korint, Paul nulis: “Aku suah temegahka kita.” (2 Kor. 7:4) Jaku puji tu tentu negu ati bala menyadi ba Korint. Paul mega muji bala menyadi ba endur bukai. (Rom. 1:8; Plp. 1:3-5; 1 Tes. 1:8) Pengudah iya nyebut menyadi Persis dalam surat ngagai eklisia ba Rome, Paul nambah: ‘Iya udah bebendar bekereja ke Petara.’ (Rom. 16:12) Gambarka asai ati menyadi indu ke tetap ati nya! Paul neladan Jehovah enggau Jesus lebuh iya meri puji ngagai orang bukai.—Bacha Mark 1:9-11; John 1:47; Pem. 2:2, 13, 19.

9. Nama kebuah bala menyadi gaga ati enti sida muji pangan diri ba eklisia?

⁹ Kemayaharitu bala tuai gempuru nemu madahka asai terima kasih ngagai bala menyadi nya amat beguna. (J-lam. 3:27; 15:23) Tiap kali tuai gempuru muji bala menyadi, iya ngayanka diri ibuhka sida sereta meratika utai ke digaga sida. Bala menyadi ba eklisia patut ninga jaku peransang nya ari bala tuai gempuru. Seiku menyadi indu ke beumur lebih ari 50 taun madahka, iya jarang nerima puji ari orang ke sama gawa enggau iya. Orang dia enda ibuhka orang bukai sereta bepekit enggau pangan diri. Nyadi, lebuh tuai gempuru madahka terima kasih ngagai iya ketegal utai ti udah dikereja iya ba eklisia, iya berasai amat gaga ati. Ku iya madahka: “Aku ulih ngasaika pengerindu Apai aku ti di serega.” Seiku menyadi lelaki ke ngemesaika dua iku anak iya kediri madahka, seiku tuai gempuru baru-baru tu madahka diri beterima kasih ke utai ti udah digaga iya. Jaku ari tuai gempuru amat meransang iya terus bebendar gawa ke Jehovah! Endang terang, lebuh tuai gempuru muji bala menyadi, nya ulih nulung sida terus nyembah Petara enggau gaga ati sereta “enda nemu lembut tulang”—Isa. 40:31.

10, 11. (a) Baka ni tuai gempuru ulih neladan Nehemiah? (b) Baka ni tuai gempuru ulih negapka pengarap bala menyadi lebuh iya ngabas sida?

¹⁰ Nama chara bukai ti beguna ke ulih dikena tuai gempuru ngayanka pengerindu sida ngagai bala menyadi sereta nulung sida nyembah Petara enggau gaga ati? Enggau jampat nulung sida ke begunaka peransang. (Bacha Surat Kereja Rasul 20:28.) Enggau tu, sida neladan nembiak Petara ke tetap ati ba jeman Bup Kudus. Ambika chunto, Bup Kudus madahka Nehemiah meda sekeda bala menyadi bansa Judah berasai lemi semengat. Nya alai, iya enggau jampat meransang sida. (Neh. 4:14) Kemayaharitu, bala tuai gempuru mega deka ngereja utai ti sama. Lebuh bala menyadi berasai lemi semengat, bala tuai gempuru deka meransang sida. Sida ngabas bala menyadi ba rumah lalu bekunsika “berekat,” iya nya jaku ke ulih negapka pengarap. (Rom. 1:11) Baka ni tuai gempuru ulih ngereja nya?

¹¹ Seiku tuai gempuru patut berunding enggau manah pasal orang ke deka diperansang iya, sebedau iya ngabas sida. Ambika chunto, iya ulih nanya diri empu: Nama penanggul ke ditapi menyadi nya? Nama ulih dipadah aku ngambika ulih meransang iya? Nama ayat tauka chunto ari Bup Kudus ke ulih meransang iya? Enti tuai gempuru berunding dulu pasal tanya tu sebedau ngabas bala menyadi, iya ulih nyebut utai ti bisi reti lalu ukai bejaku ngapa. Lebuh iya ngabas sida, tuai gempuru nya deka nejuka bala menyadi bejaku lalu iya deka ninga utai ke dipadah sida. (Jas. 1:19) Seiku menyadi indu madah: “Aku berasai lantang lebuh tuai gempuru ninga enggau manah.”—Luke 8:18.

12. Sapa begunaka peransang ba eklisia? Nama kebuah?

¹² Sapa begunaka peransang ari tuai gempuru? Rasul Paul ngasuh bala tuai gempuru ‘ngayanka pengibuh . . . ngagai semua bala menyadi ba eklisia.’ Au, semua bala menyadi ba eklisia begunaka peransang, indah orang ke udah lama nyadi penginjil enggau pengerintis. Nama kebuah sida begunaka peransang? Taja pan pengarap sida tegap, tang kekadang sida enda ulih napi penusah ari dunya ti jai tu kediri empu. Aram kitai meda baka ni Raja David bulih bantu ari kaban iya.

13. (a) Kemaya Isi-benop milih deka nyerang David? (b) Baka ni Abisai ulih nyelamatka David ba maya ti ngena?

¹³ Enda lama pengudah David ti biak dipilih nyadi raja, iya ngelaban Goliat, seiku gerasi, ari peturun Repaim. David enggau berani munuh gerasi tu. (1 Sam. 17:4, 48-51; 1 Ban. 20:5, 8) Betaun udah nya, lebuh perang entara orang Israel enggau Pilistin, David belaban enggau seiku agi gerasi. Nama gerasi nya Isi-benop, ke mega datai ari peturun Repaim. (2 Sam. 21:16) Tang, kali tu, gerasi nya nyauka munuh David. Nama kebuah? Tu ukai ketegal David nya kurang berani. Bup Kudus madahka: “David berasai lelak.” Lebuh Isi-benop beratika David majak lelak, iya nemu “nya meh maya iya patut munuh Raja David.” Tang, sebedau utai nya nyadi, “Abisai anak Seruiah datai nyaup David, ngelaban lalu munuh orang nya.” (2 Sam. 21:15-17) Au, David nyauka mati! Iya tentu berasai terima kasih laban Abisai peratika iya lalu enggau jampat datai nulung iya lebuh iya nyauka dibunuh! Nyadi, nama ulih dipelajarka kitai ari cherita tu?

14. (a) Nama ulih nulung kitai mengkang tetap ati taja pan napi penusah ti besai? (b) Baka ni tuai gempuru ulih nulung orang mengkang tetap ati sereta gaga ati baru? Beri siti chunto.

¹⁴ Ba serata dunya, nembiak Jehovah terus nyembah Petara taja pan Sitan enggau orang bukai nguji ngenusahka sida. Sekeda ari kitai napi penusah ti besai baka gerasi, tang kitai andalka Jehovah enggau pengabis ati, sereta ulih mengkang tetap ati taja pan napi penusah, sama baka David ke bisi pengering kena munuh “Goliat.” Tang, bisi maya kitai ngasaika diri enda chukup pengering ngelaban dunya Sitan ti jai tu. Tu meh maya kitai begunaka peransang ari bala tuai gempuru ngambika ulih nyadi kering sereta gaga ati baru. “Seiku tuai gempuru beratika aku kurang pengering lalu datai berandau enggau aku. Kami berandauka ayat Bup Kudus, lalu aku berasai amat diperansang. Aku nitihka jaku lalau iya lalu bulih berekat.” Ku iya nambah: “Tuai gempuru nya amat bepengerindu! Iya nemu aku berasai lemi lalu iya sanggup nulung aku!” Endang ngagaka ati lebuh nemu kitai bisi bala tuai gempuru ke ibuhka kitai sereta seruran nulung kitai, baka Abisai ke seruran sedia deka ‘nulung’ David.

15, 16. (a) Nama kebuah bala menyadi amat rinduka Paul? (b) Nama kebuah kitai rinduka bala tuai gempuru ke bisi pengibuh?

¹⁵ Bala tuai gempuru megai tanggung pengawa ti berat. Kadang-kadang, sida enda ulih tinduk jenak laban sida irauka bala menyadi Kristian, sereta engka dani laun malam besampi ke sida tauka meri sida bantu. (2 Kor. 11:27, 28) Tang, bala tuai gempuru gaga ati ngereja utai ti diguna ari sida, baka ke digaga Paul. Iya nulis surat ngagai eklisia ba Korint: “Aku gaga ati ngabiska semua utai aku, nyengkaum aku empu, kena nulung kita.” (2 Kor. 12:15) Ketegal Paul rinduka bala menyadi iya, iya sanggup ngelengkaka mayuh utai kena ngeringka sida. (Bacha 2 Korint 2:4; Plp. 2:17; 1 Tes. 2:8) Nya meh kebuah bala menyadi amat rinduka Paul!—SKR. 20:31-38.

¹⁶ Kemayaharitu kitai pan rinduka bala tuai gempuru kitai lalu beterima kasih ngagai Jehovah laban ngena sida ngibun kitai. Kitai gaga ati laban sida ngayanka pengibuh ngagai tiap iku kitai sereta ngabas kitai kena meri peransang. Lalu, kitai beterima kasih laban sida seruran besedia deka nulung kitai lebuh kitai ngasaika diri nadai agi pengering napi penusah kediri empu. Bala tuai gempuru endang bebendar ‘gawa ke pengaga kitai.’