Shingdu labau hpe tsun dan mai na kun?

1979 ning Amerikan mungdan hta ngai hpe shangai wa ai. Ngai 3 ning daram hta nu yan wa hka mat ai. Anu gaw ngai hpe Ju htunghking hte maren bau maka wa nna, Yetshi-bet ngu ai Ju jawng de sa kau ai. Ngai 7 ning du ai shaloi, Isrel hta laning mi nga nna hkibut ngu shaga ai Ju ni hpaw da ai jawng hta lung wa ai. Hpang hta, anu hte ngai Meksiko de htawt mat ai.

Dai hta Ju nawku jawng n nga tim, Ju htunghking ni hte maren ngai matut nga ai. Laban nhtoi hta hpayawng deng shachyi ai, Tora hti ai, sitda ngu ai kyu hpyi laika hti na kyu hpyi ai. Jawng hta, manang ni hpe nye a nawku htung gaw shawng nnan na nawku htung re ngu chyahkring hkring tsun dan ai. Yesu Hkristu a magam bungli hte sharin achyin ai lam ni hpe madung hku na tsun da ai Ga Shaka Ningnan hpe gaw kalang mung n hti ga ai. Kaja nga yang, dai hta lawm ai sharin achyin lam ni a shingkang ka-up hkrum na tsang ai majaw anu n hti shangun ai re.

Ga Shaka Ningnan hpe hti na matu hpa majaw dawdan wa ai?

Asak 17 ning daram hta, jawng shangut na matu Amerikan de bai wa ai. Dai hta shi hkum shi Hkristan re ngu na tsun ai manang langai gaw, Yesu n lawm yang ngai na prat gaw n hkum tsup ai ngu na shi tsun ai.

“Yesu hpe kamsham ai ni gaw hkalem hkrum nga ai re” ngu ngai bai htai ai.

“Ga Shaka Ningnan hti ga ai i?” ngu na shi san ai.

“N hti ga ai” ngu ngai bai htai ai.

“Hpa mung n chye ai lam langai hte seng nna tinang a mu mada lam hpe tsun ai gaw hpaji n rawng ai lam n re i?” ngu shi tsun ai.

Dai ga gaw nye myit hpe ram ram hkra mat shangun ai. Tinang n chye ai lam langai a ntsa tinang a mu mada ai lam tsun ai gaw, hpaji n rawng ai lam re ngu na ngai nan hkam la da ai majaw re. Nau n kam ai sha, shi na Chyum Laika hpe nta de la mat nna Ga Shaka Ningnan hpe hti hpang wa ai.

Ga Shaka Ningnan hpe hti ai shaloi nang gara hku hkamsha ai?

Ga Shaka Ningnan hpe ka ai ni gaw, Ju ni re ngu ai hpe chye dat ai shaloi grai mau mat ai. Ngai grau hti magang Yesu gaw matsan dum chye ai, shagrit shanem ai, masha ni hpe karum ya mayu ai, tingkyeng akyu n tam ai Ju masha langai re ai hpe asan sha grau chye na wa ai. Ngai laika dum de sa na pyi Yesu a lam ka da ai laika ni hpe shap hti wa ai. Raitim, dai laika ni gaw Yesu gaw Meshia (Karai Kasang aya tang da ai Hkawhkam) re ai hpe ngai kam wa hkra sakse n lu madun ai. Shara nkau hta Yesu gaw Karai Kasang re ngu na ka da ai. Dai gaw nye a matu lachyum n nga ai. Yesu kadai kaw akyu hpyi ai? Shi hkum shi kun? Hpang langai gaw, Chyum Laika hta Karai Kasang gaw ‘si na n re’ * ngu na tsun da tim, Yesu gaw si wa ai.

Dai ga san ni hte seng na mahtai hpe gara hku tam mu wa ai?

Tengman ai lam ngu ai gaw, shawng hpang rap ra nga ra ai. Tengman lam hpe mu tam na matu ngai daw dan kau ai. Dai majaw, myiprui hkrat na hkamsha lam nga manga hpe Karai Kasang kaw akyu hpyi tsun dan ai. Ndai gaw akyu hpyi laika buk n lawm ai sha shawng nnan lang akyu hpyi ai re. Akyu hpyi ngut na kade n na yang, ngai na nta chyinghka hpe Yehowa Sakse num lahkawng wa akawk ai. Shanhte gaw Chyum Laika hkaja na matu, karum lam lu shangun ai laika buk langai jaw mat wa ai. Hpang hta dai laika buk hte sha shanhte hte Chyum Laika hpe bawng ban wa ai. Shanhte a makam masham gaw Chyum Laika ntsa madung tawn ai hpe ngai kam wa ai. Ga shadawn, Yehowa Sakse ni gaw Yesu hpe hkap la ai. Raitim, masum raitim langai kaw na Karai hku na n re ai. “Karai Kasang a Kasha” * “Karai Kasang hpan tawn da ai a npawt nhpang” * re ngu ai hpe hkap la ai.

Kade n na yang Meksiko de ngai bai htawt wa ai. Dai hta Yehowa Sakse ni hte Meshia hte seng ai myihtoi ga ni hpe matut hkaja wa ai. Tau hkrau tsun da ai lam ni ndai daram law hkra nga ai hpe mu dat ai shaloi, mau n ma byin mat ai. Raitim, ngai matut nna ntsen ai myit naw nga taw ai. ‘Yesu langai chyu sha ndai labau yawng hte tup hkrat byin ai wa rai kun? Yesu gaw dingsang masu jahpai taw ai n mai byin ai kun?’ ngu na ngai myit hkrup ai.

Dai ntsen ai myit gara hku mat mat ai kun?

Kadai mung n mai masu jahpai ai myihtoi ga ni hpe Sakse Hkam ni gaw madun wa ai. Ga shadawn, myihtoi Mihka gaw Yuda mung Betlehem mare hta Meshia shangai wa na * ngu na, shaning 700 jan tau hkrau tsun wa ai. Tinang gara kaw shangai na ngu ai hpe kadai hkang lu ai? Esaia gaw Meshia gaw tara tawt lai ai wa zawn n gawn n sawn di hkrum nna sat hkrum na re. Raitim, si ai hpang sahti zawn lup hkrum na re * ngu tau hkrau tsun wa ai. Dai tau hkrau tsun da ai lam yawng gaw Yesu hta hpring tsup wa ai.

Laksan hku na dan leng ai lam langai gaw Yesu a rusai labau re. Chyum Laika hta, Meshia gaw Hkawhkam Dawi a aru arat kaw na yu hkrat wa na re * ngu tsun da ai. Moi aten na Ju ni gaw, mung masha ni madu ai rusai labau hte tinang a rusai labau hpe jahpan tawn da ai. Lama na, Yesu gaw Dawi a aru arat kaw na n re ai nga yang, shi a hpyen ni gaw n re ai lam hpe masha yawng chye hkra ndau shana na re. Raitim, Yesu gaw Dawi a aru arat re ai hpe shanhte tsep kawp n lu ningdang ai. Masha hpawng pyi “Dawi a Kasha” * ngu na shaga wa ai.

Yesu si na 37 ning na ai aten, A.D. 70 hta Roma hpyen dap gaw Yerusalem hpe jahten kau ai shaloi, rusai labau hte seng ai jahpan ni hten za mat ai. Dai majaw, rusai labau hte tup hkrak byin lu na matu, Meshia gaw A.D. 70 garai n du shi yang paw pru wa ai rai na re.

Dai lam chye na lu ai majaw hpa akyu lu la shangun ai kun?

Tara Jahprang 18:18, 19 hta, Karai Kasang gaw Israela amyu masha ni kaw na Mawshe zawn myihtoi paw pru shangun na ngu tsun wa ai. “Nye a mying ningsang hte htawn tsun ai nye a ga hpe, kadai wa n madat yang, dai wa hpe ngai deng na we ai” ngu Karai Kasang tsun ai. Chyum Laika buk ting hpe atsawm hkaja ngut ai shaloi, Nazaret mare masha Yesu gaw dai myihtoi re ngu ai hpe tsep kawp kam mat ai.