Ndaka zwaligwa mu nzana wa ka be uli ku Saxony, mu shango ya ka be i dangwa German Democratic Republic (GDR). Mu nsha wedu kwa ka be ku na mbakiso ne ludo, ngono bazwadzi bangu ba ka ndi diya mazwibato a no tolegwa pezhugwi. GDR ya ka be i li shango ye Bukomanisi, bunji gwe bathu be Saxony, ba ka be be tolela budumili pasi. Imi nda ka be ndi tola kuti a kuna Ndzimu. Zwithu zwi bili zwa nda ka be ndi duma mu zwili kwazo, zwa ka laula buchilo gwangu makole a li 18: ku sa dumila mu Ndzimu ne Bukomanisi.

Ini cha nda ka be ndi da kwazo ne kwe Bukomanisi? Ne kuti nda ka be ndi da nkumbulo we kuti bathu bose ba no lizana. Pezhugwi kwa ichecho, nda ka be ndi duma kuti bathu ba ka fanila thubukanyiwa fungwa ne ku lizana, ne kuti ichecho cha ka be chowo pedzisa bufumi ne bushayi gwa ka pindilila. Ngono a shingila gubungano le bathu baptshwa le Bukomanisi. Nda kati ndi na makole a li 14, a shinga mu project i no thokomela mituthu ku kubunganya maphepha a ka shingisiwa kuti a shingisiwe kakale. Batungamili be toropo ingwe mu Aue ba ka shathila kwazo nshingo wa nda ka be ndi thama, ba ka pelela be ndipa mbayilo. Nenguba nda ka be ndili nchechana, nda ka pelela ndi zibgwa ne mapolotiki mangwe makulu e GDR. Nda ka be ndi zwidwa ndi ti ndi na mazwimisilo a ka lulwama ne kuti zwithu zowo ndi yendila zwibuyanana.

Ngono chinyolocho shango i ka ndi pitukila. Ne 1989 Guma le Berlin li ka kolomogwa kose ne Communist bloc ye Eastern Europe. Zwithu zwi sa ka lulwama zwi ka shingikala ne ku tobedzana. Ndaka dwa ndi zwibonegwa kuti ku sheteka kwe ndulamo mu GDR kwa ka be ku li pangwe ne pangwe. Ha ti lakidzila, bathu ba ka be ba si mu litabi gwe Bukomanisi ba ka be be tolegwa pasi. Apa i chithu cha ka be chinga shingikala? Apa a te iswi Makomanisi ta ka be ti ti bathu ba ka fanila ku lizana koga? Apa Bukomanisi ya ka be ili zila ye ku chebela bathu koga? Nda ka dziyidzika mu nkumbulo.

Ndizo nda ka shandukila zwithu zwi no zha kutanga mu buchilo gwangu, ndi ka tangisa ku zwidiya ku mba ne ku drowa. Ne kuti nda ka khona ku zwidiya ku academy ye mba, kwa ka be ku nga pelela kuti ndi yende ku university, nda ka be ndi na mazwimisilo e ku be nyambi ye ku mba ne ku drowa. Pezhugwi kwa ichecho nda ka shandukila mazwibato a no tolegwa pezhugwi a nda ka diyiwa ndi chi ngwana. Cha ka be ya be chithu chikulu mu buchilo gwangu ya kabe ya chi be ku da mizipo ne ku dana ne banana banjinji. Ngono bunyambi gwe ku mba ne buchilo gwe ku zwilawula, a kuzo tapudza ku dziyidzika mu nkumbulo. Ne zwitshwantsho zwa nda ka be ndi drowa zwa ka be zwi chisa. Buchilo gwangu gwa ka be gwa ka linga ngayi? Ngono nda ka be ndi chililani?

Nda kati ndi bona dabilo dze buzo dza nda ka be ndi nadzo, ku ka ndi chenamisa. Lingwe zhuba tili ku academy ndi na bangwe, ta ka be ti zuwa ne kwe buchilo. Mandy * wa ka be a li nngwe we bana be ikwele kakale a li nngwe we Bafakazi ba Jehova. Zhuba ilelo a ka ndi lakidza zila ya ka tambunuka. A ka be e ti “Andreas, ha u shaka dabilo dze dzibuzo ne kwe buchilo ne kwa gwa ka linga, u zwidiye Baibili kwa ka nginilila.”

Nda kabe ndi sola, ngono ku na ku shaka ku ziba ku kulu mu ndili. Mandy wa ka ndi lakidza Daniele ndima 2, ngono cha nda ka bala cha ka ndi chenamisa. Buporofiti igogu go leba ne ku tobedzana kwe mibuso mikulu ye shango, bogoromente ba nowo be ne masimba mu shango ku swikila mu misi ya ngwenu. Mandy wa ka ndi lakidza buporofiti gungwe mu Baibili gu no leba ne kwa ka linga buchilo gwedu. Nda ka pelela ndi dabigwa dzibuzo dzangu! Ngono ndi yani wa ka kwala buporofiti igogu, ne kuti ndi yani wa ka be a nga lebela mbeli buchilo ne zila ya ka tambunuka zwingapa? Apa ikoku ku nga dwa ku dwa kuti Ndzimu uyapo kene?

Mandy wa ka ndi zibisa Horst na Angelika, Bafakazi ba ka lobolana ba ka ndi batsha ku hwisisa Dama le Ndzimu. Nda ka zwibonela chinyolocho kuti Bafakazi ba Jehova ndibo koga budumili gu no shingisa ne ku zibisa bathu zina le Ndzimu, Jehova. (Pisalema 83:18; Matewu 6:​9) Ndaka zwidiya kuti Jehova Ndzimu u no thembesa bathu kuti ba nga chilila chose mu shango ye Paradaisi. Pisalema 37:9 ikati: “Ibabo bano lindila Yahwe banowo thuwa shango.” Ichechi chaka ndi lakidza kuti thembeso iyeyi ya ka zhuligwa nngwe ne nngwe u no gwisa chila ne milayo ye Ndzimu se kwa kwa ka kwagwa mu Baibili.

Ne kwa ka jalo, kwa ka be kwa ka ndi simila ku shandula buchilo gwangu ku yendidzana ne Baibili. Ku dwilila kwangu mu ku mba ne ku drowa kwa ka thama kuti ndi zwitolele pezhugwi, ndizo kwa ka be ku sheteka kuti ndi zwidiye ku zwiyesa pasi. Ne kwa ka jalo, kwa ka be ku si ku lelu kuti ndi lechedze mazwibato e ku zwilawula. Ndo shatha seni kuti Jehova u na moyonlefu, mahwilangoni, ne ku hwisisa ibabo ba no gwisa ku shingisa chino diyiwa ne Baibili!

Bukomanisi ne ku sa dumila mu Ndzimu kwa ka laula cha nda ka be ndi li icho mu makole a li 18 e buchilo gwangu. Baibili ya ka shandula buchilo gwangu chinga kwa ipapo. Cha nda ka zwidiya cha ka pedza ku dziyidzika kwangu mu nkumbulo ne kwe buchilo gwangu kwa gwa ka linga ne ku ziba cha ndi no chilila. Ne 1993, nda ka dubikiwa ku be nngwe we Bafakazi ba Jehova, ngono ne 2000, ndi ka lobola Tabitha, ndumili u na malebeswa. Ta ka shingisa chibaka chinjinji ku diya bathu Baibili. Bunji gwe bathu ba ta ka shangana nabo ba ka be be dumila cha nda ka tongo dumila mu chili, ba ka be be lawugwa ne Bukomanisi ne ku sa dumila mu Ndzimu. Ndo shathila kwazo ku ba lakidza se kwa ba nga ziba Jehova.

Nda ka ti ndi tangisa ku shingidzana ne Bafakazi ba Jehova, bazwadzi bangu a ba zo da dumbu. Chinga kwa ipapo, ne kwa ka jalo, ba ka bona se kwa ku shingidzana ne Bafakazi ba Jehova kwa ka shandula buchilo gwangu. Ndo shathila kuti ba no zwidiya Baibili kakale ba no shanganila mu zwidiyo zwe Bukirisiti zwe Bafakazi ba Jehova.

Imi na Tabitha to shathila ndobolo ya ka naka ne kuti to gwisa ku shingisa ndayilo ye Baibili mu bathu ba ka lobolana. Ha ti lakidzila, ku hwa ndayilo yayo ne kwe ku thembeka mu ndobolo ko dwilila ku simisa ndobolo yedu.—Bahebera 13:4.

Ngwenu ha ndi cha zwibuzwa kuti ndo chililani kakale buchilo gwangu gwa ka linga ngayi. Ndo zwiwa kuti ndi nngwe we badumili be nsha we shango yose ba nonga imi, ba no shathila mbakiso ye malebeswa ne ku hwanana. Mu nsha iwoyo to zwilinga ti li bathu ba no lizana. I nkumbulo wa nda ka be ndi hwanana nawo kwazo, ndi yemula ku u shingikadza mu buchilo gwangu.