N nase na ilha di São Domingos, na Repúblika Dominikana. Nos é kuatu fidju i mi é kel más novu. Nha mai ku nha pai tinha bon skóla i es kria pa nu ten un bon idukason. Kuatu anu antis di N nase nha mai ku nha pai konxe uns misionáriu di Igreja Mórmon i es fika dimiradu kantu es odja modi ki es ta bistiba dretu i es éra idukadu. Nton, nha mai ku nha pai disidi lógu ma nos família ta sérba un di kes primeru na kel ilha ki ta sérba di Igreja di Jizus Kristu di kes Santu di Últimus Dia ô Igreja Mórmon.

Sima N ba ta kria, N bira ta gosta txeu di kes kuza ki es ta fazeba na igreja i di kes konsedju ki es ta daba sobri vida na família i sobri bon konportamentu. N tinha orgulhu di ser Mórmon i N krê sérba misionáriu.

Kantu N tinha 18 anu, nha família muda pa Mérka asi pa N pode fazeba un bon kursu. Nha tiu ku nha tia, ki éra Tistimunha di Jeová, bai vizita-nu más ô ménus un anu dipôs na Flórida i es konvida-nu pa nu sisti un kongrésu djuntu ku es. N fika dimiradu pamodi tudu algen staba ta sigi leitura di kes testu na Bíblia i es ta tomaba nóta. Nton N pidi papel ku kanéta pa N faze mésmu kuza.

Dipôs di kongrésu nha tiu ku nha tia fla-m ma dja ki N krê sérba misionáriu, es pode djudaba mi prende más sobri Bíblia. N gosta di kel ideia pamodi N konxeba livru di Mórmon más txeu di ki Bíblia.

Óras ki mi ku nhas tiu ta papiaba sobri Bíblia pa tilifóni, sénpri es ta flaba mi pa N konpara nhas krénsa ku kel ki Bíblia ta inxina. Es kria pa N provaba nha kabésa kal ki éra verdadi.

N ta setaba txeu di kes kuza ki Igreja Mórmon ta inxina, má N ka sabia dretu si es staba di akordu ku kel ki Bíblia  ta fla ô nau. Nha tia manda-m revista Nhos Korda! di 8 di novenbru di 1995, ki é publikadu pa Tistimunhas di Jeová, i kel revista ta papiaba di relijion Mórmon. N fika spantadu kantu N da kónta ma N ka konxeba un monti di kes kuza ki Igreja Mórmon ta inxina. Pur isu, N disidi faze más piskiza na site ofisial di Mórmon asi pa N djobeba si kel ki revista Nhos Korda! staba ta fla éra verdadi. N odja ma kel ki kel revista staba ta fla éra verdadi ka sô na kel site, má tanbê kantu N vizita muzeu di Mórmon na Utah, ki ta fika na Mérka.

Antis N ta atxaba ma livru di Mórmon ku Bíblia staba di akordu ku kunpanheru. Má kantu N kumesa ta lé Bíblia más dretu, N da kónta ma txeu di kes kuza ki Igreja Mórmon ta inxina é diferenti di kel ki Bíblia ta inxina. Pur izénplu, Bíblia ta fla na Ezequiel 18:4 ma alma ta móre. Má, livru di Mórmon ta fla na Alma 42:9 ma “alma nunka ka pode móre.”

Alén di kes diferénsa li, N xinti kasábi pamodi kel ki Igreja Mórmon ta inxina ta da ideia ma Mérka é kel país más inportanti. Pur izénplu, es ta inxina ma jardin di Éden ta fikaba na konselhu di Jackson, na stadu di Missouri, na Mérka. I kes proféta di igreja ta fla ma óras ki Reinu di Deus ben governa Téra, Deus ta ben faze kel-li através di govérnu di Mérka.

N ta fikaba ta pergunta nha kabésa kuzê ki ta ben kontiseba ku otus país sima kel país na undi ki N nase. Un dia di noti un jóven di Igreja Mórmon ki staba ta studa pa ser misionáriu txoma-m i nu pâpia sobri kel asuntu li. N pergunta-l klaru ma si el ta baba pa géra si el ta lutaba kóntra otus algen di Igreja Mórmon. N fika spantadu kantu el fla-m ma sin! N piskiza más dretu kuzê ki Igreja Mórmon ta inxina. Tanbê N pâpia ku kes xéfi di Igreja Mórmon i es fla-m ma ka ta daba pa sabe respósta pa nhas pergunta pamodi es éra un mistériu ki es ta ben ntendeba más tardi.

N fika diziludidu ku kel splikason li, ki N pergunta nha kabésa si N krê sérba misionáriu mê. N da kónta ma N krê sérba misionáriu pa N djuda otus algen, má kel-li éra un kuza ki N pode fazeba na otu organizason. Otu motivu ki ta poba mi krê ser misionáriu é pamodi N kria pa otus algen ruspetaba mi sima es ta fazeba ku kes misionáriu di Igreja Mórmon. Má N ka sabia mutu kuza sobri Deus, nbóra dja N leba alguns párti di Bíblia txeu bês, N ka ta daba el valor di verdadi. N ka tinha ninhun ideia di kal ki éra vontadi di Deus pa Téra i pa kes algen ki ta mora na el.

Kantu N studa Bíblia ku Tistimunhas di Jeová, N prende kal ki é nómi di Deus, kuzê ki ta kontise ku kes algen ki móre, modi ki Deus ta ben uza Jizus pa kunpri se promésas i un monti di otus kuza. Ti ki enfin N staba ta prende sobri kel livru li ki ka ten konparason, i N gostaba di pâpia ku otus algen sobri kes verdadi ki N staba ta prende. Sénpri N sabe ma Deus izisti, má gósi N pode pâpia ku el na orason sima nha midjór amigu. N bira Tistimunha di Jeová kantu N batiza na dia 12 di julhu di 2004, i 6 mês dipôs N kumesa ta prega pa ténpu interu.

N trabadja duránti sinku anu na sédi mundial di Tistimunhas di Jeová, ki ta fika na Brooklyn, na Nova York, na Mérka. N fika kontenti di djuda na faze Bíblia i publikasons ki ten bazi na el pa djuda milhons di algen na mundu interu. I ti inda N gosta txeu di djuda otus algen prende sobri Deus.