Désdi mininu sénpri N gosta txeu di naturéza. Nha família sénpri ta ba pasiaba na kes florésta i lagus uma bunitu ki tinha na vólta di nos sidadi, Jyväskylä, na séntru di Finlándia. N gosta txeu di animal tanbê. Kantu mi éra mininu, N ta krê brasaba tudu gatu ku katxor ki N ta odjaba! Sima N ba ta kria, N ta fikaba xatiadu óras ki N ta odjaba algen ta maltrata animal. Ku ténpu, N pasa ta faze párti di un organizason, ki ta lutaba pa direitus di animal i la N konxe alguns algen ki ta pensaba sima mi.

Nu ta fazeba txeu kanpanha pa direitus di animal. Nu ta distribuiba informasons di monti manera i nu ta organizaba marxa kóntra kes lója ki ta bendeba kuzas di péli i laboratórius ki ta fazeba testi ku animal. Ti nu kria un organizason novu pa proteje animal. Nu ta izajeraba na manera ki nu ta difendeba nos obijetivus, i pur isu nu ta tinha txeu prublémas ku autoridadis. N podu na kadia i N lebadu pa tribunal txeu bês.

Alén di luta pa direitus di animal, N ta preokupaba ku otus prubléma na mundu. Ku ténpu, N bira ta faze párti di txeu organizason sima Amnistia Internacional i Greenpeace. Kuza más inportanti di nha vida éra apoia kes atividadi li. N ta lutaba pa póbri, pa kes algen ki tinha fómi, i pa kes algen más koitadu.

Má poku-poku, N da kónta ma N ka ta konsigiba muda mundu. Nbóra kes organizason konsigi rezolve alguns prubléma más pikinoti, ta parseba ma kes prubléma más grandi sta ta fikaba kada bês más piór. Éra sima si kes forsa di mal staba ta kontrola mundu interu i ningen ka ta nportaba ku nada. N xinti ma N ka ta konsigiba faze nada.

Pamodi N staba tristi i diziludidu, N kumesa ta pensa na Deus i na Bíblia. Dja N studaba Bíblia ku Tistimunhas di Jeová antis. N ta gostaba di ses bondadi i di manera ki es ta preokupaba ku mi, má simé N ka staba priparadu pa muda nha manera di vive. Má di es bês kuzas éra diferenti.

N panha nha Bíblia i N kumesa ta le-l. Kel-li konsola nha korason. N atxa txeu pártis na Bíblia ki ta inxina-nu trata animal ku bondadi. Pur izénplu, Provérbios 12:10 ta fla ma ‘algen justu ta toma kónta di kes animal mansu di sel.’ Tanbê N da kónta ma Deus é ka kulpadu pa prublémas di mundu. Má, nos prublémas sta ta piora pamodi maioria di algen ka ta sigi kuzê ki el ta fla. Kantu N prende sobri amor i paxénxa di Jeová kel-la mexe txeu ku mi. — Salmo 103:8-14.

Más ô ménus na kel ténpu la, N skrebe ta pidi livru O Que a Bíblia Realmente Ensina?. Poku ténpu dipôs un kazal Tistimunhas di Jeová ben nha kaza i es oferese-m un studu di Bíblia, i N seta. Tanbê N kumesa ta bai runion na Salon di Reinu. I N kumesa ta ama kel ki N staba ta prende na Bíblia.

N konsigi faze txeu mudansa na nha vida pamodi Bíblia. N para di fuma i bebe dimás. N muda nha aparénsia i nha manera di pâpia. I N muda nha manera di pensa sobri autoridadi. (Romanos 13:1 ) Tanbê N larga kel stilu di vida ki N tinha ki éra rei di mariadu.

Mudansa más difísil pa mi éra bira ta ten un ideia dretu sobri kes organizason di direitus di ómi i di animal. Kel-li ka kontise di noti pa manxe. Primeru, N xinti sima ki N staba ta trai kes organizason ki N larga, má N prende ma Reinu di Deus é úniku speransa pa mundu. Pur isu N disidi poi Reinu na primeru lugar i djuda otus prende sobri el. — Mateus 6:33.

Kantu N ta lutaba pa direitus di ómi ku animal N ta pensaba ma tinha dôs grupu di algen, dretu ku mau. I N staba prontu pa aji kóntra kes ki N ta atxaba ma éra mau. Má pamodi Bíblia N ka ta xinti ódiu fórti pa otus más. Envês di kel-li, N ta tenta ten amor pa tudu algen. (Mateus 5:44 ) Un di kes manera ki N ta mostra kel amor li pa otus, é óras ki N ta pâpia ku es di notísias sábi di Reinu di Deus. N ta fika kontenti di odja modi ki kel trabadju li ta djuda algen ten pas filisidadi i un speransa di verdadi.

Gósi N ta xinti pas ku nha kabésa, pamodi N ta dexa asuntus na mô di Jeová. N ten sertéza ma el, ki é Kriador, ka ta dexa animal ku umanus ta maltratadu pa tudu ténpu. Nen el ka ta dexa nos Téra ki é bunitu distruídu. Má ka ta dura através di se Reinu, el ta ben konpo tudu kes kuza ki dja stragadu. (Isaías 11:1-9 ) N ta fika txeu kontenti di sabe kes kuza li i tanbê di djuda otus ten fé na es. Gósi N ka ta atxa más ma N ten ki muda mundu.