As pafɛkt man, Jizɔs nɔ bin de gɛt bɔku pan di prɔblɛm dɛn we ɔda pipul dɛn bin de gɛt ɛn di tin dɛn we bin de wɔri dɛn. Bɔt pan ɔl dat, i bin de rili fil wetin ɔda pipul dɛn bin de fil. I bin rɛdi fɔ put ɔda pipul dɛn yon biznɛs bifo in yon, fɔ du tin dɛn fɔ dɛn we dɛn nɔ bin de tink se i go du. Fɔ tru, sɔri-at bin muv am fɔ ɛp ɔda pipul dɛn. Tink bɔt di ɛgzampul dɛn insay Chapta 32, 37, 57, 99.

Pipul dɛn we ol difrɛn ej bin de fil fri fɔ tɔk to Jizɔs bikɔs i nɔ bin de mek lɛk se i bizi ɔ tink se i impɔtant pas dɛn. Pipul dɛn bin de fil fri fɔ de wit Jizɔs bikɔs dɛn bin de si se i bisin bɔt dɛn. Fɔ lan bɔt dis, rid Chapta 25, 27, 95.

Jizɔs bin de pre to in Papa ɔltɛm ɛn wit ɔl in at. I bin de pre we i de in wan ɛn we i de wit pipul dɛn we de wɔship Gɔd di rayt we. I bin de pre bɔku tɛm, nɔto jɔs we i de it. I bin de pre fɔ tɛl in Papa tɛnki, fɔ prez am, ɛn fɔ aks am fɔ dayrɛkt am bifo i disayd fɔ du siriɔs tin dɛn. Tink bɔt di ɛgzampul dɛn we de na Chapta 24, 34, 91, 122, 123.

Jizɔs bin de put ɔda pipul dɛn biznɛs bifo in yon di tɛm dɛn we i bin nid fɔ blo ɛn rilaks. I nɔ bin de put wetin in want bifo ɔda pipul dɛn. Ɛn dis na fayn ɛgzampul i sɛt fɔ wi fɔ falamakata gud gud wan. Lan bɔt dis ɛgzampul insay Chapta 19, 41, 52.

Jizɔs nɔ bin jɔs tich se wi nid fɔ fɔgiv, bɔt i bin sɛt di ɛgzampul bay we i bin de fɔgiv in disaypul dɛn ɛn ɔda pipul dɛn. Tink gud gud wan bɔt di ɛgzampul dɛn we de na Chapta 26, 40, 64, 85, 131.

Di Baybul bin dɔn tɔk se bɔku Ju dɛn nɔ go biliv di Mɛsaya ɛn in ɛnimi dɛn go kil am. Dat fɔ dɔn mek Jizɔs nɔ du bɔku tin fɔ pipul dɛn. Bɔt Jizɔs nɔ bin du dat. Bifo dat, i bin gɛt zil fɔ ɛp pipul dɛn fɔ wɔship Gɔd di rayt we. I sɛt ɛgzampul fɔ ɔl in disaypul dɛn fɔ gɛt zil pan ɔl we pipul dɛn et dɛn ɔ de ivin mek dɛn sɔfa. Rid Chapta 16, 72, 103.

Bɔku we dɛn de we Jizɔs bin bɛtɛ pas mɔtalman dɛn we nɔ pafɛkt. Fɔ ɛgzampul, i bin sabi aw fɔ du tin ɛn i bin gɛt sɛns. Bikɔs i bin pafɛkt, dat bin mek i ebul fɔ du bɔku tin, ɛn i bin ebul fɔ tink di rayt we pas ɛnibɔdi we bin de arawnd am. Bɔt pan ɔl dat, i bin ɔmbul we i bin de wok fɔ ɔda pipul dɛn. Yu go lan lɛsin dɛn bɔt dis na Chapta 10, 62, 66, 94, 116.

Jizɔs bin de peshɛnt wit in apɔsul dɛn ɛn ɔda pipul dɛn ɔltɛm, we dɛn nɔ bin de falamakata in ɛgzampul ɔ du wetin i tɛl dɛn. Ɛnitɛm we nid de, i bin de peshɛnt fɔ tich pipul dɛn di sem tin so dat dɛn go kam nia Jiova mɔ ɛn mɔ. Rid bɔt sɔm ɛgzampul dɛn we Jizɔs bin peshɛnt na Chapta 74, 98, 118, 135.