Xitechpouili kentsi tlen monemilis.

Nitlakatki ipan xiuitl 1979, ipan Estados Unidos. Kema nijpiayaya eyi xiuitl, notatauaj kiixpolojkej nopa amatl kampa nesiyaya mosenkajtokej. Nonana nechiskaltik kej momajtokej kichiuaj judíos, uan nochipa niajki ipan escuelas judías tlen nojkia kinixmatij kej yeshivás. Kema nijpiayaya chikome xiuitl tiajkej Israel. Nopa escuela kampa niauiyaya eltoya ipan se kibutz, kiampa kiixmatij kampa itstokej katli milchiuaj. Kema panok se xiuitl tiajkej México.

Maske nechka nochaj amo onkayaya niyon se sinagoga, nochipa nijchijki kej nimomajtoya nijchiua: ipan sábado, nijtlatiyaya velas uan nijpouayaya nopa Torá [amochtli tlen judíos tlauel kipatiitaj]. Uan kema nimomaijtouayaya, nijtekiuiyaya se sidur, o amochtli kampa ijkuilijtoya nochi tlamaijtoli. Nechpaktiyaya nikiniljuis katli ininuaya nimomachtiyaya noreligión eliyaya katli achtoui pejki. Na amo kema nijpojtoya Nuevo Testamento kampa kiijtoua kenijkatsa tlajtolmoyajki uan tlamachtik Jesucristo; pampa nonana nechiljuijtoya tlaj nijpouaskia nechkuapoloskia.

¿Kenke pejki tijpoua Nuevo Testamento?

Kema nikaxitik 17 xiuitl, sampa nitlakuepilik Estados Unidos, kiampa nijtlamiltik tlen nimomachtiyaya. Se nouampo nechiljuik tlaneltokayaya ipan Jesús uan tlaj na amo nijneltokayaya Jesús amo niyolpakiskia ipan nonemilis.

Na nijnankilik: “Katli tlaneltokaj ipan Jesús kinkajkayajtokej”.

Ya kiijtok: “¿Tijpojtok Nuevo Testamento?”.

“Amo”, nikiljuik.

“Uajka, ¿kenke kiampa tikijtoua? Amo kinamiki tikijtos se tlenijki tlaj amo tijmati, kiampa kichiuaj katli uiuitikej”.

Nechyololinik tlen nechiljuik pampa nojkia kiampa nimoiljuiyaya. Maske nipinajki, nijselik nopa Biblia uan nijuikak nochaj, kiampa nijpouaskia Nuevo Testamento.

¿Kenijkatsa tikitak tlen tijpojki?

Nimosentlachilik kema nijmatki nopa Nuevo Testamento kiijkuilojtoyaj judíos. Kema nijpojtiauiyaya, nikitstiauiyaya Jesús eliyaya se tlakatl katli teikneliyaya, amo moueyimatiyaya, kinpaleuiyaya maseualmej uan amo kinekiyaya kinkajkayauas. Niajki biblioteca uan nijpojki se keski amochtli kampa kamanaltiyaya tlen Jesús. Yon se nechpaleuik ma nikita tlaj ya eliyaya Mesías. Se keskij kiijtouayayaj Jesús eliyaya toTeotsij, uan na amo kiampa nimoiljuiyaya. Nimotlajtlaniyaya: “¿Ajkia kinojnotsayaya Jesús kema momaijtouayaya? ¿Ya monojnotsayaya iselti?”. Nojkia, Jesús mijki, uan Biblia kiijtoua tlen toTeotsij: “Nochipa tiitstok”. *

¿Tlake tijchijki?

Tlen Biblia tlamachtia amo moixnamiki uan na nimosentlalijtoya nijmatis tlen nelnelia melauak. Yeka, nimomaijtok ika nochi noyolo uan nichokak, nama amo nijtekiuik no sidur. Kema tlanki nimomaijtoua, nechkaltajtakanijkej omej Jehová itlajtoltemakauaj. Tikamanaltikej uan nechkauilijtejkej se pilamochtsi. Nopa pilamochtsi uan tlen timokamanaljuijkej nechpaleuik ma nijkuamachili nochi tlen kineltokaj uala ipan Biblia. Se neskayotl, Jehová itlajtoltemakauaj amo kiijtouaj Jesús eli se Trinidad, kiijtouaj eli “iKone toTeko Dios” * uan “katli toTeotsij achtoui kichijchijki”. *

Teipa, sampa niajki México uan nojua nimomachtik se keski tlajtolpanextili tlen Mesías ininuaya Jehová itlajtoltemakauaj. ¡Onka tlauel miak! Maske kiampa, nojua amo nijneltokayaya. Nimotlajtlaniyaya: “¿Moaxitik ni tlajtolpanextili san ipan Jesús? ¿Uan tlaj san kinkajkayajki maseualmej kema kiijtok eliyaya Mesías?”.

Uajka, ¿tlake mitspaleuik xitlaneltoka ipan Jesús?

Jehová itlajtoltemakauaj nechnextilijkej tlajtolpanextili tlen amo ueltoskia moaxitis ipan se akajya katli san tekajkayaua. Se neskayotl, kema poliuiyaya kipano 700 xiuitl, Miqueas kiijtok Mesías tlakatiskia altepetl Belén. * ¿Ajkia ueli kitlapejpenia kanke tlakatis? Isaías kiijkuilok Mesías kimiktiskiaj kej se akajya katli kichijtoya tlen amo kuali uan kitlalpachoskiaj kampa kintlalpachouaj tlatominpianij. * Nochi ni tlajtolpanextili moaxitik ipan Jesús.

Tlen kichijki ma nijneltoka eli kema nijpojki ajkia inijuantij elkej Jesús iuejkapantatauaj. Biblia kiijtoua Mesías eliskia David iteipaixui. * Judíos miak xiuitl kiijkuilojtoyaj ajkia eliyayaj ininuejkapantatauaj. Uajka, tlaj Jesús amo eliskia David iteipaixui ikualankaitakauaj nima kiijtojtoskiaj. Inijuantij amo tleno kiijtojkej pampa tlen mochijtiajki eliyaya melauak. Nojkia, miakej maseualmej kiiljuiyayaj: “Ta tlen tiiteipaixui Tlanauatijketl David”. *

Ipan xiuitl 70, kema ya panotoya treinta y siete xiuitl mijki Jesús, tlateuianij tlen Roma kixolejkej Jerusalén, uan ixpolijki amatl kampa ijkuilijtoya ajkia inijuantij eliyayaj ininuejkapantatauaj. Uajka, Mesías monekiyaya asis kema ayamo asiyaya xiuitl 70, kiampa kimatiskiaj ajkia inijuantij elkej iuejkapantatauaj.

¿Uan tlake panok teipa?

Ipan Deuteronomio 18:18, 19, toTeotsij kiijtok kichiuaskia ma kisa se teokamanalojketl ipan Israel kej Moisés, uan kiniljuik: “Tlen ueli tlakatl tlen axkikakis notlajtol tlen nopa teokamanalojketl kiijtos nopampa na, na nijtlatsakuiltis”. Kema kuali nimomachtik nochi tlen Biblia kiijtoua, nechpaleuik nikitas Jesús, katli euayaya Nazaret, eliyaya nopa teokamanalojketl.