TLAUEL miakej Cristo itokilijkauaj amo iljuichiuaj ipan Navidad. ¿Moyolkokouaj pampa ayokmo iljuichiuaj ipan nopa tonali? ¿Kinekiskiaj nojua kichiuasej se tlamantli tlen kichiuayayaj ipan nopa iljuitl? ¿Moiljuiaj ininkoneuaj kejuak kinpoloua nopa iljuitl? Ma tikitakaj tlake kiijtouaj se keskij Jehová itlajtoltemakauaj tlen miak altepemej.

Kiilnamikij Jesús. “Kema ayamo nieliyaya se tlen Jehová itlajtoltemakauaj, san kemantika niauiyaya iglesia. Maske kena niauiyaya ipan Navidad uan Pascua, amo nochipa kiampa nijchiuayaya. Nojkia, ipan nopa iljuitl amo kema nimoyoliljuiyaya ipan Jesús. Nama ayokmo niiljuichiua ipan Navidad, uan ompa ipan se semana nimosentilia ipan tlanechikoli, uan nikinmachtia maseualmej ika Biblia ajkia eli Jesús” (EVE, AUSTRALIA).

Momajmakaj miak tlamantli. “Nelia tlauel niyolpaki kema nechmakaj se tlenijki kema amo nimoiljuijtoya. ¡Tlauel niyolpaki pampa amo nijchiayaya! Uan nojkia nechpaktia nikijkuilos se tlenijki o nitlaixkopinas uan nikinmakas sekinok. Kiampa, inijuantij uan na, tlauel tiyolpakij” (REUBEN, IRLANDA DEL NORTE).

Kinpaleuiaj sekinok. “Tlauel techpaktia tijchiuasej tlakualistli uan tikinuikilisej katli mokokouaj. Kemantika tikinchijchiuiliaj se tlamantli tlen tsopelik, nojkia tikinuikiliaj xochitl o seyok tlamantli pampa tijnekij kuali ma kiyolmatikaj. Uan ni uelis tijchiuasej ipan tlen ueli tonali ipan se xiuitl” (EMILY, AUSTRALIA).

Mosentiliaj ika ininchampoyouaj. “Kema timosentiliaj ipan se tonali kema amo timotetsoptokej, konemej kinpaleuia kuali ma kinixmatikaj inintiojuaj, ininauiuaj, ininueyitatauaj uan ininmachikniuaj. Kema timopaxalouaj ipan tlen ueli tonali, tochampoyouaj kiitaj nelnelia tikinikneliaj uan amo tiauij tikinitaj san pampa kiampa timomajtokej o pampa onka se iljuitl” (WENDY, ISLAS CAIMÁN).

Kinekij kuali itstosej: “Ipan Navidad tlauel nimotekiuiyaya uan amo nijpiayaya tonali nimoyoliljuis ipan tlaseuilistli. Ipan Biblia nijyekojtok kenijkatsa itstosej maseualmej teipa, uan nopa nechpaleuijtok kuali ma nijyolmati. Nijmati teipa nokoneuaj kuali itstosej” (SANDRA, ESPAÑA).