Ka ɛ nwo edwɛkɛ kile yɛ.

Bɛwole me wɔ ɛvolɛ 1979 wɔ United States. Mɔɔ menlile ɛvolɛ nsa la yɛɛ me awovolɛ bɔle ewole a. Me mame vale Dwuuma amaamuo ne tetele me na ɔmaanle mengɔle yeshivas anzɛɛ Dwuuma sukulu ne mɔ bie. Mɔɔ menlile ɛvolɛ nsuu la yɛziale yɛhɔlile ɛvolɛ ko wɔ Israel, na mengɔle sukulu wɔ ɛleka bie mɔɔ bɛfɛlɛ ɛkɛ ne kibbutz la. Akee me nee me mame yɛdule yɛhɔle Mexico.

Ɛnee nyianusua ɛnle ɛleka mɔɔ yɛwɔ la, noko ɛnee medi Dwuuma amaamuo ne azo. Ɛnee mesɔ kyɛnɛlɛ wɔ Ɛnwomenlelielɛ kenle, mekenga yɛ Torah ne na medua siddur anzɛɛ asɔneyɛlɛ buluku zo meyɛ asɔne. Ɛnee meta meka mekile me gɔnwo mɔ wɔ sukulu kɛ me ɛzonlenlɛ ne a le kpalɛ a. Ɛnee metɛkengale mɔɔ bɛta bɛfɛlɛ ye Ngyekyeleɛ Fofolɛ ne mɔɔ ka Gyisɛse Kelaese ɛzonlenlɛ gyima ne nee ye ngilehilelɛ nwo edwɛkɛ la ɛlɛ. Nɔhalɛ nu, me mame bɔle me kɔkɔ kɛ memmakenga ɔluakɛ ɛnee ɔsulo kɛ nuhua edwɛkɛ ne bahakyi me adwenle.

Duzu ati a ɛzile kpɔkɛ kɛ ɛbagenga Ngyekyeleɛ Fofolɛ ne a?

Mɔɔ menlile ɛvolɛ 17 la, menziale mengɔle United States mengɔndoale me sukulu ne azo. Wɔ ɛkɛ ne, me gɔnwo bie mɔɔ se ɔle Kilisienenli la hanle hilele me kɛ meannwu Gyisɛse a me ɛbɛlabɔlɛ ɛnrɛli munli.

Membuale ye kɛ, “Menli mɔɔ die Gyisɛse di la ɛminli.”

Ɔbizale me kɛ, “Wɔgenga Ngyekyeleɛ Fofolɛ ne ɛlɛ ɔ?”

Menganle kɛ, “Kyɛkyɛ.”

Ɔhanle kɛ, “Saa ye zɔhane a, se ɛnee ɛlɛka mɔɔ ɛnze la?”

Ye edwɛkɛ ne hanle me kpalɛ, ɔluakɛ ɛnee dahuu mebu ye kɛ ɔnle kpalɛ kɛ mebaha edwɛkɛ mɔɔ menze nwolɛ ɛhwee la. Ɛhye ati membɛlɛle me nwo aze, menvale ye Baebolo ne mengɔle sua nu na membɔle ɔ bo mengengale Ngyekyeleɛ Fofolɛ ne.

Kɛzi mɔɔ ɛgengale la hanle wɔ ɛ?

Ɔzinle me nwo kɛ menwunle kɛ Dwuuma a hɛlɛle Ngyekyeleɛ Fofolɛ ne la. Eza mɔɔ megua zo melɛkenga la, menwunle kɛ Gyisɛse le Dwuunli mɔɔ le atiakunlukɛnlɛma, ɔbɛlɛ ɔ nwo aze na ɔkulo kɛ ɔboa menli na tɛ kɛ asɛɛ ɔsisi bɛ. Mengɔnliele mbuluku mɔɔ ka ɔ nwo edwɛkɛ bɔbɔ la wɔ mbulukuzielɛleka. Noko, mbuluku ɛhye mɔ anu biala ammaa meannwu ye kɛ ɔdaye a ɔle Mɛzaya ne a. Bie mɔ bɔbɔ hanle kɛ ɔle Nyamenle​—edwɛkɛ mɔɔ menea a ndelebɛbo ɛnle nu la. Ɛnee nwane a Gyisɛse zɛlɛle ye a​—ɔzɛlele ɔ nwo ɔ? Yeanga ye zɔ, Gyisɛse wule. Noko, Baebolo ne ka kɛ: ‘Nyamenle ɛnwu.’ *

Kɛzi ɛnyianle zɔhane kpuya ne mɔ anwo mualɛ ɛ?

Nɔhalɛ le kokye, na ɛnee mekulo kɛ menwu nɔhalɛ ne. Ɔti menzunle na menvile me ahonle nu menzɛlɛle Nyamenle, ɛhye a le mekɛ mɔɔ limoa mɔɔ meanva me siddur ne meanyɛ asɔne a. Menwiele asɔne ne yɛ la yeangyɛ yɛɛ mendele kɛ bɛlɛbɔ me anlenkɛ ne anu a. Ɛnee Gyihova Alasevolɛ nwiɔ bie ɔ. Bɛmaanle me bɛ mbuluku mɔɔ bɛfa bɛsukoa Baebolo ne la ko. Buluku ɛhye nee debie mɔɔ me nee Alasevolɛ ne mɔ hɔle zo zukoale la maanle menwunle kɛ bɛ diedi ne gyi Baebolo ne azo. Kɛ neazo la, Alasevolɛ ne mɔ ɛmbu Gyisɛse kɛ ɔboka Nsa-Ko Nyamenle nwo, emomu bɛbu ye kɛ ɔle “Nyamenle Ara” * yɛɛ “Nyamenle abɔdeɛ mɔlebɛbo.” *

Yeangyɛ biala menziale mengɔle Mexico, na me nee Alasevolɛ ne mɔ hɔle zo zukoale Mɛzaya ne anwo ngapezo dɔɔnwo wɔ ɛkɛ. Ɔzinle me nwo kɛ menwunle ɔ nwo ngapezo dɔɔnwo la! Noko, ɛnee me adwenle nu tɛyɛ me kesee. Mendwenlenle nwo kɛ: ‘Asoo Gyisɛse angomekye a ngapezo ɛhye mɔ fale ɔ nwo a?’ na ‘Saa ɔ nye fuu a ɔbɔle ye ɛbɛla kɛ mɔɔ ngapezo ne mɔ kile la ɛ?’

Duzu a maanle ɛhakyile wɔ adwenle a?

Alasevolɛ ne mɔ hilele me ngapezo ngakyile mɔɔ awie ɛnrɛhola ɛnrɛmaa bie ɛnrɛra nu la. Kɛ neazo la, mɔɔ ngapezonli Maeka hanle kɛ bɛbawo Mɛzaya ne wɔ Bɛtelɛhɛm mɔɔ wɔ Dwudiya la, ɔbole ɛvolɛ ɛya 700 na yeara nu. * Nwane a bahola ahile ɛleka mɔɔ bɛbawo ye a? Ayezaya hɛlɛle kɛ bɛbahu Mɛzaya ne kɛ ɛtanevolɛ mɔɔ bɛmbu ye bie la, noko bɛbazie ye wɔ sukoavolɛma avinli *. Ngapezo ɛhye mɔ amuala luale Gyisɛse anwo zo rale nu.

Daselɛ mɔɔ li awieleɛ la a le abusua mɔɔ Gyisɛse vi nu la. Baebolo ne hanle kɛ Mɛzaya ne bavi Belemgbunli Devidi abusua nu. * Kɛmɔ ɛnee tete Dwuuma yɛ abusua mɔɔ awie vi nu la anwo kɛlɛtokɛ la ati, saa Gyisɛse ɛnvi Devidi abusua nu a anrɛɛ ye agbɔvolɛ baha ye wɔ bagua nu! Noko bɛangola bɛanyɛ zɔ, ɔluakɛ ɛnee bɛdie bɛto nu kɛ Gyisɛse vi Devidi abusua nu. Menli dɔɔnwo bɔbɔ vɛlɛle ye “Devidi Ara.” *

Wɔ ɛvolɛ 70 Y.M.​—Gyisɛse wule la ye ɛvolɛ 37 anzi​—Wulomu sogyama zɛkyele Gyɛlusalɛm, na bɛ abusua nwo kɛlɛtokɛ ne minlinle anzɛɛ zɛkyele. Ɔti, saa bɛbanwu abusua mɔɔ Mɛzaya ne vi nu a, ɛnee ɔwɔ kɛ ɔba kolaa na ɛvolɛ 70 Y.M. adwu. *

Kɛzi ɛhye mɔɔ ɛnwunle ye la hanle wɔ ɛ?

Bɛhanle bɛdole ɛkɛ ne wɔ Ditilɔnomi 18:18, 19 kɛ Nyamenle baye ngapezonli mɔɔ le kɛ Mosisi la wɔ Yizilayɛma avinli. Nyamenle hanle kɛ mebamaa “awie mɔɔ andie me edwɛkɛ ne mɔɔ ɔbaha wɔ me duma nu la abu nwolɛ mgbonda.” Baebolo ne amuala mɔɔ menzukoale ye kpalɛ la maanle menliele menlile kɛ Gyisɛse mɔɔ vi Nazalɛte la a le ngapezonli zɔhane a.