Een poa Joa trigj wieren de Elren veleicht de ieeschte, waut to äaren Sän ooda äare Dochta von Sex räden. Un dee kunnen daut soo bie sacht doonen, doano woo oolt äa Kjint wia un waut daut fäld to weeten.

Oba daut haft sikj jeendat. No een Buak no, hieren un seenen nu mau rajcht kjliene Kjinja Sachen von Sex, un daut mau rajcht emma dolla uk en Bieekja, Films un Tellewizhen-Programs, waut fa Kjinja sent (The Lolita Effect). Es daut, soo aus daut nu es, toom gooden ooda toom schlajchten fa Kjinja?

Kjinja kjennen aulawäajen soont bejäajnen, waut met Sex to doonen haft. En äa Buak Talk to Me First schrift Deborah Roffman: “Menschen räden von Sex un eena sitt un hieet doavon en Aunjebots, Films, Bieekja, Leeda ooda Tellewizhen, wan äwa Fon jeschräwen woat, en Komputa-Gäms, un en dien Fon un Komputa. Un wäajen dit jleewen Jugentliche un mau rajcht Kjinja, daut Sex daut gaunz wichtichste em Läwen es.”

Wuarom es daut soo? Jeschafta vekjeepen Kjleeda fa Kjinja, waut oppreizent sent, un doawäajen kjrieen de Kjinja de orrajchte Iedee, daut et sea wichtich es, woo an lat. Een Buak sajcht, daut Jeschaftsmana daut weeten, daut Kjinja wellen, daut äare Frind an sellen jleichen, un daut dee daut nodoonen wellen, waut äare Frind doonen. Un daut nutzen Jeschaftsmana ut toom äare Sachen vekjeepen (So Sexy So Soon). Bie de Jeschaftsmana jeit daut bloos doarom, de Kjinja daut entojankren, äare Sachen to kjeepen.

Daut es nich jenuach, bloos von Sex to weeten. Krakjt soo aus doa een Unjascheet es tweschen weeten, woo eene Koa schauft un een gooda Foara to sennen, es doa uk een Unjascheet tweschen waut von Sex weeten un dit weeten to brucken toom goode Entscheidungen moaken.

Waut eena doonen saul: Vondoag dän Dach es daut noch needja aus jeemols ea, daut jie june Kjinja halpen, “doarenn jeeeft” to sennen, “tweschen goot un schlajcht to unjascheeden” (Hebräa 5:14, PB).

Rät met june Kjinja. Daut mott junt dietlich sennen, daut et june Veauntwuatunk es, to june Kjinja von Sex to räden, krakjt endoont wan jie junt uk schämen (De Lia ut de Schreft: Spricha 22:6).

Rät bloos een bät opp eemol von Sex. Enne Städ bloos een Mol met june Kjinja lang von Sex räden, rät leewa to dee doavon, wan eene Jeläajenheit oppkjemt, biejlikj wan jie toop wua hanfoaren ooda wan jie toop waut doonen. Toom june Kjinja halpen, daut dee junt daut sajen, waut dee denkjen, stalt dee Froagen. Un enne Städ to froagen: “Jleichst du soone Aunjebots to seenen?”, wudd jie leewa kjennen froagen: “Woosoo jleefst du, daut de Jeschafta soone Bilda aus dit brucken toom äare Sachen aunbeeden?”. Wan jun Kjint ieescht jeauntwuat haft, kjenn jie froagen: “Woo denkjst du doaräwa?” (De Lia ut de Schreft: 5. Mose 6:6-7).

Lieet june Kjinja daut, waut fa dee äa Ella paussent es. Ea de Kjinja bat de Schooljoaren sent, lieet dee de Nomes von äa Jeschlajcht un uk, woo dee sikj fa soone Menschen beschitzen kjennen, waut dee wellen mesbrucken. Wan de Kjinja ieescht jrata woaren, kjenn jie dee opp eene eefache Wajch von Sex vetalen. Un wan daut ieescht Jugentliche sent, dan motten dee aul vestonen, waut Sex es un uk woo Gott doaräwa denkjt.

Lieet june Kjinja, waut rajcht un orrajcht es. Lieet june Kjinja von kjlien aun, de Woarheit to sajen, daut rajchte to doonen un aundre to respakjten. Dan woat daut uk leichta sennen, met de Kjinja von Sex to räden. Un lajcht dee daut uk dietlich ut, waut jie denkjen, waut rajcht un orrajcht es. Wan jie jleewen, daut et orrajcht es, Sex to haben verem befrieen, dan sacht jun Kjint daut. Un sajcht daut uk wuarom daut orrajcht es un schoden deit. Een Buak sajcht: “Jugentliche, waut weeten, daut äare Elren daut nich fa rajcht talen, wan Jugentliche Sex haben, woaren lang nich soo leicht Sex haben” (Beyond the Big Talk).

Siet een goodet Biespel. Doot daut, waut jie june Kjinja lieren. Doo jie biejlikj lachen, wan Menschen Spos moaken äwa Sex? Bruck jie oppreizende Kjleeda? Doo jie schmeichlen? Wan jie soowaut doonen, dan woaren june Kjinja veleicht nich horchen, wan jie dee lieren, waut rajcht un orrajcht es (De Lia ut de Schreft: Reema 2:21).

Habt eene goode Enstalunk. Sex es een Jeschenkj von Gott, fa eenen Maun un eene Fru, waut toop befriet sent. Daut kaun dee sea schaftich moaken (Spricha 5:18-19). Lajcht june Kjinja daut ut, daut wan dee ieescht befriet sent, dan woaren dee uk kjennen eene Freid aun dit Jeschenkj haben, un onen aul de Trubbels, waut doavon komen, wan eena verem befrieen Sex haft (1. Timotäus 1:18-19).