Ine ndabalwa mucisa ca Saxony, mu dziko yakuti mu ndzidzi unoyu ikhacemerwa Republika Dhemokratika ya Alemanya (RDA). Ife tikhafunana kakamwe panyumba pathu, pontho anyakubala anga akhandipfundzisa makhaliro adidi. Nakuti dziko yathu ikhali Yacikomunista, anthu azinji a cisa ca Saxony nee akhaona uphemberi ninga cinthu cakufunika, pontho ine, nee ndikhakhulupira kuti Mulungu alipo. Kutomera mu uwana wanga mpaka mu ndzidzi ukhali ine na pyaka 18, ine ndikhaphedzera Cikomunista, pontho nee ndikhakhulupira kuti Mulungu alipo.

Ine ndikhakomerwa kakamwe na nsoka Wacikomunista thangwi iwo ukhapfundzisa kuti anthu onsene ndi sawasawa. Kusiyapo pyenepi, ine ndikhafuna kakamwe kuti pinthu pigawiwe sawasawa kuna anthu onsene, toera pakhonde kuoneka anthu akupfuma kakamwe peno akutcerenga kakamwe. Buluka penepo ndatoma kuphedzera nsoka wa aphale akuti akhali Akomunista. Pikhali ine na pyaka 14, ndikhali na nsambo wakulokota matsamba adatayiwa mbandicita nawo pinthu. Atongi a mu nzinda wa Aue ukhali ine, akomerwa kakamwe na basa ikhacita ine na matsamba anewa, pontho iwo andipasa miyoni. Maseze ndikhali mwana, mbwenye pyenepi pyandicitisa kuti atsogoleri a ndale a dziko ineyi andidziwe. Ndikhaona ninga ndikucita pinthu pyadidi, pontho ndikhadikhira kukhala na umaso wadidi.

Mbwenye mwakukhonda dikhira pinthu pyacinja kakamwe mu umaso wanga. Mu caka 1989 Mpanda wa Berlin wagwa, pontho mautongi mazinji Acikomunista agwambo. Kusiyapo pyenepi, ine ndadzindikira kuti dziko yathu ikhacita pinthu pizinji pyakusowa ulungami. Mwacitsandzo, anthu akuti nee akhaphedzera nsoka Wacikomunista nee akhatsalakanwa mwadidi. Natenepa ine ndikhabvundzika kuti thangwi yanji pyenepi pisacitika? Kodi nsoka Wacikomunista nee usalonga kuti anthu onsene asafunika kutsalakanwa munjira ibodzi ene? Thangwi yanji nee akucita pinalonga iwo? Pyenepi pikhandidzudzumisa kakamwe.

Buluka penepo, ndasiya kuphedzera nsoka Wacikomunista mbanditoma kupfundza kuimba na kupintari. Ine ndikhapfundza kuimba pa Xikola inango, mbwenye ndikhafuna kupitiriza kupfundza nyimbo ku universidhadhe toera ndidzakhale nyakuimba na nyakupintari wakubvekera. Pyenepi pyandicitisa kusiya makhaliro onsene adidi adapfundziswa ine na anyakubala anga. Mu ndzidzi unoyu, cinthu cakufunika kakamwe cikhali kusendzeka, pontho pyenepi pikhaphatanizambo kubanyira atsikana angasi mu ndzidzi ubodzi ene. Maseze ndikhacita pikhafuna ine, ndikhasendzeka, ndikhaimba na kupintari, mbwenye pyenepi nee pyandiphedza toera kumalisa kudzudzumika kwanga. Pinthu pikhapintari ine pikhapangiziratu kuti ndikhali wakudzudzumika peno wakugopa. Natenepa ndikhabvundzika: Ninji pinadikhira ine ntsogolo? Ndi cipi cifuniro ca umaso?

Ine ndadzumatirwa kakamwe pidagumana ine mitawiro ya mibvundzo yanga. Ntsiku inango pikhali ine kuxikola tikhacedza na anyakupfundza anango kuti munthu asafunika kucitanji toera akhale na umaso wadidi. M’bodzi wa anyakupfundza anewa akhali ntsikana akhacemerwa Mandy, a iye akhali m’bodzi wa Mboni za Yahova, pontho pidandipanga iye ntsiku ineyi pyandiphedza kakamwe. Iye alonga: “Andreas, iwe ungafuna kudziwa kuti unacitanji toera ukhale na umaso wadidi ntsogolo, usafunika kuleri mwadidi Bhibhlya.”

Ine ndikhapenula pidalonga iye, ngakhale tenepo ndanyerezera kuleri Bhibhlya. Mandy andipanga kuti ndileri Dhanyeli kapitulu 2, pontho pidaleri ine pyandiphedza kakamwe. Profesiya ineyi isalonga pya mautongi mazinji akuti mbadakhala na mphambvu pa dziko yonsene, pontho mbadapitiriza mpaka lero. Mandy andipangizambo mavesi anango analonga thangwi ya pinafuna kucitika ntsogolo. Pyenepi pyandiphedza toera kugumana mitawiro ya mibvundzo yanga! Natenepa ine ndabvundzika: Maprofesiya anewa asalonga pinthu pyadidi kakamwe, mphapo mbani adaalemba? Kodi alipodi Mulungu kunja kuno?

Mandy aphemba banja ibodzi, m’bale Horst na mulongo Angelika, akuti ndi Mboni za Yahova toera andiphedze kubvesesa Bhibhlya. Mwakukhonda dembuka, ine ndadzindikira kuti basi ene ndi Mboni za Yahova zakuti kazinji kene zisaphatisira dzina ya Mulungu, Yahova, pontho asaphedza anango toera adziwe dzina ineyi. (Masalmo 83:18; Mateu 6:9) Ndapfundzambo kuti Yahova Mulungu asapasa anthu cidikhiro cakukhala m’maso mparaizu pa dziko yapantsi. Bukhu ya Masalmo 37:9 isalonga: “Ale anadikhira Yahova anadzapaswa dziko yapantsi.” Ine ndatsandzaya kakamwe pidadziwa ine kuti anthu onsene anabvera Mulungu anakwanisa kukhala na umaso kwenda na kwenda.

Mbwenye pikhali pyakunentsa kuna ine kucinja umaso wanga toera ubverane na pinalonga Bhibhlya. Pakutoma ndikhafuna kupfundza kukhala wakucepeseka, thangwi kuimba na kupintari kukhadandicitisa kukhala wakudzikuza. Pontho pikhali pyakunentsa kuna ine toera kusiya umaso wanga waulukwali. Ndisapereka takhuta kuna Yahova thangwi yakukhala wakupirira na wantsisi, pontho asaona kuwangisira kunacita ife toera kunkomeresa!

Mpaka pikhali ine na pyaka 18 ndikhaphedzera kakamwe nsoka Wacikomunista, pontho nee ndikhakhulupira kuti Mulungu alipo. Mbwenye kutomera mu ndzidzi unoyu bwera kuno, Bhibhlya iri kucinja umaso wanga. Pinapfundza ine pisandiphedza toera ndikhonde kudzudzumika na pinafuna kucitika ntsogolo, pontho pisandiphedza toera kudziwa cifuniro ca umaso. Mu caka 1993, ndabatizwa ninga m’bodzi wa Mboni za Yahova, pontho mu caka 2000 ndamanga banja na mulongo waphinga kakamwe anacemerwa Tabitha. Ife tisamala ndzidzi uzinji mbatikaphedza anango toera kubvesesa pinalonga Bhibhlya. Azinji a iwo akhalimbo na maonero ninga anga akuti Mulungu nee alipo, pontho akhaphedzerambo nsoka Wacikomunista. Ndiri wakutsandzaya kakamwe thangwi yakuaphedza kudziwa Yahova.

Pidatoma ine kupfundza Bhibhlya na Mboni za Yahova, anyakubala anga nee akomerwa. Mbwenye iwo adzadzindikira kuti kupfundza Bhibhlya kusandiphedza toera kusiya makhaliro anga akuipa. Ndiri wakutsandzaya kakamwe thangwi cincino iwo asaleri Bhibhlya, pontho asaenda ku misonkhano ya Mboni za Yahova.

Ine na nkazanga Tabitha tiri akutsandzaya thangwi tisawangisira kubvera uphungu wa m’Bhibhlya unalonga thangwi ya anyakumanga banja. Mwacitsandzo, kubvera uphungu unalonga thangwi yakukhala wakukhulupirika kuna unango na ndzace, kusaphedza banja yathu toera ikhale yakuwanga.—Ahebheri 13:4.

Cincino nee ndisadzudzumikabve na pinafuna kucitika ntsogolo. Ine ndisacita khundu ya nsoka wa abale na alongo pa dziko yonsene yapantsi, akuti ali na ntendere wandimomwene, pontho ndi akuphatana. Mu nsoka unoyu, tonsene tisatsalakanana unango na ndzace munjira ibodzi ene. Ndi pyenepi pikhafuna ine mu umaso wanga onsene, mbwenye cincino ndapigumana.