Tikambiyeni, mukuwa zukwanji ndipuso mukuwiya nunkhu?

Ndikuwiya ku United States mu 1979. Ama ndi ada nthengwa yingumala ndati ndakwanisa vyaka vitatu. Ndinguleleka ndi ama pe ndipu andisambizanga vo asambiranga mu chisopa cha Chiyuda kweniso ndakanga kusukulu za Chiyuda. Ndati ndakwanisa vyaka 7, tingusamiya ku Israel ndipu tingujaku kwa chaka chimoza. Kwenuku ndasambiranga sukulu kumalu ngo ngaziŵikanga kuti kibbutz. Pavuli paki ini ndi ama tingusamiya ku Mexico.

Chinanga kuti kwenuku kwengavi nyumba yakusopiyamu ya Chiyuda, kweni ndachitanga mbwenu miyambu ya chisopa chenichi. Ndabuskanga makandulu pa Sabata, ndaŵerenganga buku lidu la Torah kweniso ndapempheranga mwakugwiriskiya ntchitu mabuku ngidu nga mapempheru. Kusukulu kanandi ndakambiyanga anyangu kuti chisopa chidu ndichu chakwamba chayichu pa visopa vosi. Kufika pa nyengu iyi ndenga ndechendaŵerengepu malemba ngo ngaziŵika kuti Chipanganu Chasonu ngo ngakonkhoska uteŵeti ndipuso vo Yesu Khristu wasambizanga. Ama angunditcheŵeskapu kuti ndingayesanga cha kungaŵerenga kopa kuti ngangatimbanyizga vo ndagomezganga.

Ntchifukwa wuli munguŵanaŵana kuti muŵerengi Chipanganu Chasonu?

Ndati ndakwanisa vyaka 17, ndinguwere ku United States kuti nkhamalizi masambiru ngangu. Kwenuku munyangu yo wenga Mkhristu wangundikambiya kuti umoyu wangu ulivi phindu kwambula Yesu.

Ini ndingumuka kuti: “Ŵanthu wo agomezga Yesu akupungwa ukongwa.”

Iyu wangundifumba kuti: “Kumbi ukuŵerengapu Chipanganu Chasonu?”

Ndingumuka kuti: “Awa.”

Sonu iyu wangundifumba kuti: “Yiwi upereka maŵanaŵanu pa vinthu vo uleka kuviziŵa, so kumbi penapa tingakamba kuti wachita kamukira cha?”

Vo iyu wangukamba vingundijula mutu, chifukwa nani ndawonanga kuti mbuzereza kumukiyamu waka nkhani zakuti uleka kuziziŵa. Ndinguchita soni, ndipu ndinguto Bayibolu laki ndikwamba kuchiŵerenga Chipanganu Chasonu kunyumba.

Kumbi vo munguŵerenga vingukukwaskani wuli?

Ndinguzizwa kuwona kuti wo akulemba Chipanganu Chasonu ŵenga Ayuda. Ndichilutirizga kuŵerenga ndingwamba kuwona kuti Yesu wenga Myuda wakujiyuyuwa yo wakhumbisiskanga kuwovya ŵanthu mumalu mwakuŵaryiya masuku pamutu. Venivi vingundichitiska kuti ndiluti ku layibulare kuti nkhabwereki mabuku ngakukwaskana ndi iyu. Kweni pengavi buku lo laperekanga ukaboni wakuko mtima wakuti iyu wenga Mesiya. Mabuku nganyaki mwa mabuku ngenga, ngakamba so kuti Yesu ndi Chiuta, kweni kwaku ini venivi venga vambula kuvwika. Chifukwa asani Yesu ndi Chiuta, sonu iyu wapempheranga kwaku yani? Kweniso Yesu wangufwa, kweni Bayibolu likamba Chiuta kuti: “Mutufwa cha.” *

Kumbi munguchita wuli kuti mumukiki mafumbu ngenanga?

Pakuti uneneska utijisuska cha, ndingusimikiza kuti ndisaniyi uneneska. Ndingupemphera kwaku Chiuta ndichiliya, ndipu yaka kenga kakwamba pa umoyu wangu kupemphera kwambula kugwiriskiya ntchitu mabuku ngidu nga mapempheru. Ndati ndamala waka kupemphera ndinguvwa kugong’oska pachisasa. Ŵenga Akaboni aku Yehova ŵaŵi. Yiwu angundigaŵiya kabuku. Kabuku kenaka kweniso vo tingukambiskana maulendu ngakupambanapambana, vingundiwovya kusimikiza kuti vo Akaboni aku Yehova agomezga vituliya mu Bayibolu. Mwakuyeruzgiyapu Akaboni aku Yehova awona kuti Yesu ndi Chiuta cha nge mo chisambizu chakuti kwe achiuta atatu chikambiya. Kweni yiwu awona kuti iyu ndi “Mwana waku Chiuta” * ndipuso ndiyu “wakwamba kulengeka ndi Chiuta.” *

Pati pajumpha nyengu yimanavi, ndinguwere ku Mexico, ndipu kwenuku ndinguchilutirizga kusambira mauchimi ngakukwaskana ndi Mesiya ndi Akaboni aku Yehova. Ndinguzizwa ukongwa kuwona kuti pe mauchimi nganandi ukongwa ngakukwaskana ndi iyu! Kweni ndakayikiyanga mbwenu. Ndajifumbanga kuti: ‘Kumbi ndi Yesu pe mweniyo wangufiska nadi mauchimi yanga?’ ndipuso kuti ‘Kumbi yu wanguchita waka vinthu mwakuchenje kuti viwonekengi nge kuti wafiska mauchimi?’

Ntchinthu wuli chingukupangisani kuti musinthi?

Akaboni aku Yehova angundilongo mauchimi ngo ngakusuzga kuti munthu wangafiski mwauryarya. Mwakuyeruzgiyapu, kweche vyaka vakujumpha 700, mchimi Mika wangukambiya limu kuti Mesiya wazamuwiya ku Betelehemu ku Yuda. * Sonu kumbi ndiyani yo wangasankha malu ngakuti wakawiyeku? Yesaya wangulembe so limu kuti Mesiya wazamubayika nge kuti wenga chigaŵenga, kweni wazamuŵikika limoza ndi ŵanthu akukhupuka. * Vinthu vosi venivi vingufiskika paku Yesu.

Ukaboni wakumaliya ndi mukoka waku Yesu. Bayibolu lingukambiya limu kuti Mesiya wazamukuŵa mphapu ya Fumu Davidi. * Ayuda asunganga mapepala nga mukoka wa mabanja nga ŵanthu. Sonu asani Yesu wenga mphapu yaku Davidi cha, arwani waki atingi asumuwengi! Kweni anguchita cha venivi chifukwa penga ukaboni wambula kususkika wakuti Yesu wenga mphapu yaku Davidi. Ndipu chinanga ntchigulu cha ŵanthu chingumudana kuti “Mwana waku Davidi!” *

Mu 70 C.E., pati pajumpha vyaka 37 kutuliya po Yesu wangufwiya, Aroma angubwanganduwa tawuni ya Yerusalemu, ndipu pa nyengu yeniyi mapepala nga mikoka ya mabanja ngatenere kuti ngangunangika pamwenga ngangusoŵa. Mwaviyo, kuti Mesiya waŵi ndi mukoka pakati pa Ayuda wakhumbikanga kuwoneka chechendafiki chaka cha 70 C.E.

Sonu kuziŵa venivi kungukuwovyani wuli?

Lemba la Dotoronome 18:18, 19 lingukambiya limu kuti Chiuta wazamuyuska mchimi mu Isirayeli wa nge Mozesi. Chiuta wangukamba kuti, “Ndazamukumba mulandu munthu weyosi yo wazamuleka kuvwiya mazu ngangu, ngo mchimi yo wazamulongoro mu zina langu.” Kusambira Bayibolu losi kungundiwovya kusimikiza kuti Yesu waku Nazareti ndiyu wenga mchimi mwenuyu yo wangukambikiya limu.