Ego, omu nsi yoona, Abakaiso ba Yahwe baine obukaikuru n’obukaikuru bw’abatebezi abakazi. Bali batezi abarukwekamba muno kutebeza amakuru amarungi ag’Obukama bwa Ruhanga. Omu mulingo gw’obunabbi, ekyahandiikirwe ekya Zabuli 68:11 kibazaaho abatebezi abo kiti: “[Yahwe] nuwe aha ekigambo: Abakazi abatebeza ebigambo ihe lingi.”

Baitu, otabuzabuza obuheereza bw’abakazi abanyakuli Bakaiso ba Yahwe n’obuheereza obukorwa abakazi ab’amadiini agandi. Haroho embaganiza y’amaani hagati yabo. Miringo ki ey’erukubaahukaniza?

Abarukuhikwaho obuheeraza bwabo nibahukana. Abakazi ab’amadiini agandi agarukweyeta g’Ekikristaayo, batunga obukuru omu makanisa gaabo, kandi abarukuhikwaho obuheereza bwabo nubo abanyakwija omu maramizo gaabo bonka. Baitu, abantu abahikwaho obuheereza bw’abatebezi abakazi abanyakuli Bakaiso ba Yahwe bali abaheeru ababakira kusanga omu maju gaabo rundi omu biikaro ebindi.

Omulingo ogundi ogurukwahukaniza Abatebezi abakazi abanyakuli Bakaiso ba Yahwe hali abakazi ab’amadiini agandi nugwo omulimo gwabo omu kitebe. Abakazi ab’amadiini agandi bebembera kandi beegesa abantu baabo kwikiririza omu byona ebibeegesa hataroho kukaguza kwona. Baitu abakazi abatebezi abanyakuli Bakaiso ba Yahwe tibeegesa omu kitebe kakuba haaba harumu abasaija abanyakubatiziibwe. Abasaija abakomerwe kuba beegesa nubo bonka beegesa.—1 Timoseo 3:2; Yakobo 3:1.

Baibuli egamba ngu abasaija bonka nubo basemeriire kwebembera ekitebe. Wetegereze ekyokurorraho akyatairweho omukwenda Paulo obuyahandiikiire omurolerezi mutaahi we Tito. Akagamba ati: “Nikyo nakulekiire omu Kulete . . . oteho abakuru omu mbuga zona.” Paulo akongera yagamba ngu buli musaija ayaakukomerwe akaba asemeriire ‘kutabaho omusango, anyina mukazi omu.’ (Tito 1:5, 6) Paulo akaha Timoseo oburagirizi nubwo bumu omu bbaruha eiyamuhandiikire n’agamba ati: “Omuntu obwaba naserra oburolerezi buli agondeze omulimo omurungi. Nukwo kihikiriire omurolerezi okutabaho ekyokuhanwa, abe musaija womukazi omu, . . .wamagezi okwegesa.”—1 Timoseo 3:1, 2.

Habwaki emirimo y’oburoleerezi esemeriire kuheebwa abasaija bonka? Paulo n’agamba ati: “Baitu tindukuikiriza omukazi okwegesa, nobukwakuba okulema omusaija, baitu okuikara omu buculeezi. Baitu Adamu nuwe yabandize okuhangwa, hanyuma Hawa.” (1 Timoseo 2:12, 13) Nahabweki, omulingo ebintu byahangirwemu nigwoleka ensonga habwaki Ruhanga yahaire abasaija obujunanizibwa obw’okwegesa n’okuba abaroleerezi.

Abatebezi ba Yahwe bahondera ekyokurorraho ky’omwebembezi wabo Yesu Kristo. Omwegeswa Luka akahandiika ha buheereza bwa Yesu ati: “Yagendaga omu mbuga nebika, natebeza ebigambo ebirungi ebyobukama bwa Ruhanga.” Hanyuma, Yesu akasiindika abahondezi be kukora omulimo nugwo gumu: “Bagendagenda omu maka, nibatebeza enjiri.”—Luka 8:1; 9:2-6.

Kasumi kanu, abantu ba Yahwe—abasaija n’abakazi—nibejumbira omu kukora omulimo Yesu oguyarangire: “Nenjiri enu eyobukama eritebezebwa omu nsi zona, okuba kaiso hali amahanga gona; nubwo empero erihika.”—Matayo 24:14.