Fakamatala mai aka tau tupuakaga.

Ne fanau au i te 1979 i Amelika. I te taimi ko tolu ei oku tausaga, ne ‵tala te avaga a oku mātua. Ne puti aka au ne toku mātua e ‵tusa mo tuu faka-Iutaia kae ne uga atu au ki yeshivas, io me ko akoga a te kau Iutaia. I te taimi ko fitu ei oku tausaga, ne olo atu māua ki Isalaelu mō se tausaga kae ne kau atu au ki se akoga i se potukau ga‵lue e igoa ki te kibbutz. Oti aka, ne toe olo atu māua mo toku mātua ki Mexico.

E tiga eiloa e seai se sunako i konā, kae ne tumau au i aku tuu faka-Iutaia. Ne fa‵ka sāle ne au a moligako mō te Sapati, faitau ki te mā Torah, kae ‵talo mai te fakaaogaga o te tusi ko te siddur, io me se tusi ‵talo. I te akoga, ne masani o fai atu au ki tama‵liki i taku vasega me i taku lotu ko te lotu muamua eiloa. Ne seki faitau aka eiloa au ki te tusi lauiloa ko te Feagaiga Fou, telā e fakamatala mai i ei a te galuega mo akoakoga a Iesu Keliso. A te ‵tonuga loa, ne fai mai toku mātua ke se faitau au ki ei, i te mea ma fakamaseigina au ne ana akoakoga.

Kaia ne fakaiku aka ne koe ke faitau ki te Feagaiga Fou?

I te taimi ko 17 ei oku tausaga, ne foki atu au ki Amelika ke fakaoti aku akoakoga. I konā ne fai mai se taugasoa telā ne fai mai i a ia se Kelisiano me ka se katoatoa toku olaga e aunoa mo Iesu.

Ne tali atu au, “A tino kolā e tali‵tonu ki a Iesu e seai se aoga olotou olaga.”

Ne fesili mai tou tagata, “Kai faitau aka eiloa koe ki te Feagaiga Fou?”

“Ikai,” ne tali atu au.

Ana muna, “I te feitu la tenā, kafai e se iloa ne koe, kaia e fakaasi mai ne koe se manatu e uiga ki se mea telā e se iloa ne koe?”

 Ne pokotia ‵ki oku lagonaga i ana pati, me ne mafaufau faeloa au me se mea valea ke tuku atu ne koe sou manatu e aunoa mo te iloa ne koe o se mea. I konā foki loa, ne puke ne au tena Tusi Tapu ki te fale kae kamata o faitau ki te Feagaiga Fou.

Ne aoga pefea ki a koe au mea ne faitau?

Ne poi malosi au ke iloa atu me i tino ne tusi ne latou te Feagaiga Fou ne tino Iutaia. Kae ko te uke foki o aku mea e faitau, ko te momea aka foki o lavea ne au me i a Iesu se tino Iutaia atafai kae loto maulalo, telā ne manako o fesoasoani ki tino kae e se ko te fakafi‵ta atu ki a latou. Ne fanatu foki loa au ki faletusi ke faitau ki tusi e uiga ki a ia. Kae e seai eiloa se tusi ne fakatalitonu mai me i a ia ko te Mesia. Ne fakasino atu a nisi tino ki a ia e pelā me ko te Atua—se manatu telā ne foliga ‵se mai ki a au. Me ko oi te tino ne ‵talo atu ki ei a Iesu—ko ia? E sili atu i ei, ne mate a Iesu. Kae e fai mai te Tusi Tapu e uiga ki te Atua: “A koe e se mate.” *

Ne maua pefea ne koe a tali ki fesili konā?

E se fe‵paki a te munatonu, kae ne fakaiku aka ne au ke ‵sala atu ki te munatonu. Tela la, ne ‵talo au mo te loto fakamaoni mo loimata ki te Atua—mō te taimi muamua e aunoa mo te fakaaogaga o taku tusi ‵talo. Toeitiiti ko se oti taku ‵talo kae ne tukituki mai se tino mai te mataloa. Se avā Molimau a Ieova. Ne tuku mai ne lāua se tusi fai sukesukega ki te Tusi Tapu. A te tusi tenei fakatasi mo sau‵talaga a matou mo te kau Molimau, ne fakatalitonu mai ki a au me i olotou talitonuga e fakavae ki te Tusi Tapu. E pelā mo te kau Molimau, e ‵kilo atu latou ki a Iesu e pelā me ko te “Tama a te Atua” * mo te “kamataga o mea katoa ne faite ne te Atua,” * kae e sē se vaega o te Tolutasi.

E seki leva kae ne toe foki atu au ki Mexico, telā ne tumau taku sukesuke ki valoaga faka-Mesia mo te kau Molimau. Ne ofo malosi au i te uke o valoaga! Kae koi fakalotolotolua eiloa au. Ne mafaufau ifo au: ‘E a, ko Iesu fua e fetaui ‵lei ki te tulaga tenei?’ kae ‘E a māfai e apo fua a ia i te fakataunuga o mea e uiga ki te tulaga tenei?’

Se a la te mea ne fakatalitonu atu ki a koe?

Ne fakaasi mai ne te kau Molimau a valoaga kolā e seai se tino e mafai o taumafai ke fakataunu ne ia. E pelā me se mea e tasi, e sili atu i te 700 tausaga ne ‵valo mai ei ne te pelofeta ko Mika me ka fanau mai te Mesia i Peteleema, i Iuta. * Ko oi e mafai o pule atu ki te koga e ‵tau o fanau mai i ei a ia? Ne tusi mai a Isaia me i te Mesia ka tamate e pelā me se tino solitulafono kae ka tanu fakatasi a ia mo tino mau‵mea. * A mea katoa konei ne fakataunu ki a Iesu.

A te ‵toe fakamaoniga ne aofia i ei a te gafa o Iesu. E fai mai te Tusi Tapu me i te Mesia ka vau mai te gafa o te tupu ko Tavita. * Ne tausi faka‵lei eiloa ne te kau Iutaia mua olotou tusi gafa, tela la, moi ne seki vau a Iesu mai te gafa o te kāiga o Tavita, penei e paka‵laga atu ana fili e uiga ki te mea tenei mai i tuafale! Kae ne seki mafai o fai penā me ne seki mafai o fakafiti ne latou a te sokoga o Iesu ki a Tavita. Ke oko ki te vaitino ne ka‵laga atu ki a ia pelā me ko “te Tama a Tavita.” *

I te 70 T.A.—se 37 tausaga mai tua o te matega o Iesu—ne fakamasei ne te kautau Loma a Ielusalema, kae ne ‵galo io me ne fakama‵sei atu i ei a tusi gafa. Tela la, ko te mea ke fakamautinoa faka‵lei a te gafa o te Mesia, ne ‵tau o sae mai a ia mai mua o te 70 T.A.

Ne pokotia pefea koe i te mea tenei?

I te Teutelonome 18:18, 19, ne ‵valo mai me ka ‵tofi aka ne te Atua i Isalaelu se pelofeta e pelā mo Mose. “Ka fakamasino ne au te tagata telā e se fakalogo ki aku pati me ka faipati atu a ia i toku igoa,” ko muna a te Atua. A taku sukesuke ‵loto ki te Tusi Tapu kātoa ne fakatalitonu mai ki a au me i a Iesu te Nasaleta ko te pelofeta tenā.