Quando son nassesta, i me genitori i gavea un tocheto de tera in colonia, nela Galìssia, nel noroeste dela Spagna. Mi era la quarta de oto fioi. La nostra fameia la era tanto amorosa. In quel tempo nela Spagna l’era normal che un dei fioi el ndesse nte un seminàrio o un convento. Dela nostra fameia, tre fioi i ze ndati.

Con 13 ani son ndata nel medèsimo convento che ghen’era me sorela in Madri. La vita nel convento no la era gnente bona. Lì no ghen’era amicìssia. Ghen’era sol règole, orassion e serimònie. Ala matina bonora ndeino in ciesa meditar ma quasi sempre mi no era bona de pensar in gnente. Dopo, canteino càntichi religiosi e partessipeino nela messa, tuto in latin. Mi no capia quasi gnente e pensea che Dio l’era distante de mi. Mi passea tuto el giorno sensa parlar gnente. Fin quando mi e me sorela se cateino, noantre sol podeino dir: “Salve Maria Imaculada”. Le móneghe le ne assea parlar sol mesa ora dopo de magnar. Mi me sentia sola e tante volte piandea.

No me go mai sentio darente de Dio ma, ancora cossita, con 17 ani, son deventada mónega. Mi go fato quel che i altri i volea. Ma presto go pensà se l’era pròpio questo che volea dela me vita. Le móneghe le disea che qualchedun che gavesse questo tipo de dùbio el ndaria al inferno. Ancora cossita, gavea ancora dubi. Mi savea che Gesù Cristo no’l vivea sempre lu sol. Ma invesse lu l’era sempre drio insegnar e giutar i altri. (Mateo 4:23-25) Quando gavea 20 ani no gavea gnanca un motivo par seitar esser mónega. La mónega che la gavea autorità sora de noantre la me ga dito una roba che mi no spetea. Ela la me ga dito che, se mi no ero sicura de quel che mi volea, saria meio che mi fesse presto ndar via, prima che podesse. Mi go idea che la gavea paura che mi fesse quelaltre móneghe pensar come mi. Alora son ndata via del convento.

Quando son ritornada casa, i me genitori i ga acetà quel che mi gavea fato. Ma come no ghen’era laoro ndove erino de star, son ndata de star nela Alemagna ndove che me fradel l’era de star. Lu el fea parte de un grupo comunista de persone che le era state parade via dela Spagna. Mi me sentia ben intrà queste persone che le lotea par i diriti dei laoradori e par el dirito dele done de esser tratade de maniera giusta. Cossita mi son deventada comunista e dopo son maridada con una persona de quel grupo. Mi pensea che era drio far qualcossa de ùtile quando che mi dea publicassion comuniste e mi partessipea nei protesti.

Ma son restada suito disgustada nantra volta. Mi go visto che i comunisti quasi sempre no i fea quel che i disea. Nel ano de 1971 go visto che l’era pròpio cossita parché arquanti gióveni del nostro grupo i ga brusà el consolado spagnol in Frankfurt. Lori i protestea contra le ingiustissie nela ditadura spagnola. Ma questa par mi no la era la maniera giusta de dir che no era de acordo.

Quando l’è nassesto el me primo fiol, mi go dito al me sposo che mi no ndaria pi nele riunion comuniste. Mi me go sentio tanto sola parché quando me fiol l’è nassesto gnanca un de quei che i disea che i era nostri amighi i ze vegnesti catarme. Mi me domandea qual che l’era el ogetivo dela vita. Sarà che tuto quel che mi ero drio far el servia par le persone gaver una vita meio?

Nel ano de 1976, un casal spagnol de Testimònie de Geovà l’è vegnesto casa mia e el me ga dato arquante publicassion che le parlea dela Bìblia. Nela seconda volta che i me ga visità, mi ghe go fato tante domande sora el sofrimento e le ingiustìssie. Son restada maraveiada quando lori i ga doperà la Bìblia par risponder a tute le me domande. Suito go acetà un stùdio dela Bìblia.

Nel scomìnsio, mi volea sol imparar robe nove. Ma tuto el ga cambià quando mi e el me sposo ghemo scominsià a ndar nele riunion nel Salon del Regno dele Testimònie de Geovà. In quel tempo, noantri gaveino due fioi. Le Testimònie de Geovà le ne menea ale riunion de volontiera e le ne giutea tender dei nostri picinini. Questo l’è rivà pròpio al cuor.

Ancora cossita mi gavea arquanti dubi. Go dessidio ndar catar la me fameia nela Spagna. El me zio, che l’era prete, el ga proà desanimarme de studiar la Bìblia. Ma le Testimònie de Geovà le me ga giutà tanto. Lore le rispondea ale me domande doperando la Bìblia, come che le fea le Testimònie de Geovà nela Alemagna. Mi go dessidio seitar studiar la Bìblia quando ritornesse casa. El me sposo no’l ga pi volesto studiar, ma mi go seità. Nel ano de 1978, son stata batesada come Testimònia de Geovà.

Saver dele verità dela Bìblia me dà ogetivo nela vita. Par esémpio, 1 Piero 3:1-4 el dise par la sposa gaver “grando rispeto” par el so sposo e ndar cole bone, che l’è de grando valor par Dio. Questi consili i me giuta a esser una meio mare e una meio sposa.

L’è belche 35 ani che mi son Testimònia de Geovà. Son felice par servir a Dio e far parte de una vera fameia spiritual, insieme con quatro dei me sinque fioi.