Tsikbalttoʼon tuʼux síijech.

Síijen tu añoil 1979 tu luʼumil Estados Unidos, le yaanten tres añosoʼ tu divorciartuba in papáʼob. In maamaeʼ tu kaʼansajten le baʼaxoʼob ku creertik le judíoʼoboʼ, le oʼolal ku túuxtiken kaʼach teʼ escuela yeshivás tuʼux ku kaʼansaʼal le judíoʼoboʼ. Le yaanten siete añosoʼ binoʼon kajtal tu luʼumil Israel ka káaj in bin tiʼ junpʼéel escuela yaan tiʼ junpʼéel kibutz, bey kʼaj óolaʼanil kaʼach le kaajoʼob tuʼux ku yúuchul paakʼaloʼ. Ka máan junpʼéel añoeʼ teen yéetel in maamaeʼ binoʼon kajtal México.

Naatsʼ tiʼ in wotocheʼ minaʼan mix junpʼéel sinagoga wa le tuʼux ku adorar le judíoʼoboʼ, kex beyoʼ cada sábadoeʼ kin tʼabik kiboʼob kaʼachi yéetel kin xokik le Toráoʼ. Tsʼoʼoleʼ kin orar yéetel u yáantaj junpʼéel chan libro. Uts tin tʼaan xan kaʼach in waʼalik tiʼ in wéet xookoʼobeʼ in religióneʼ letiʼe yáax anchajoʼ. Mix juntéen kaʼach in xok le Nuevo Testamento tuʼux ku tʼaan tiʼ u kuxtal yéetel tiʼ le baʼaxoʼob tu kaʼansaj Jesúsoʼ. In maamaeʼ u yaʼalmajten maʼ in xokik tumen jeʼel bin u kʼastal in tuukuleʼ.

¿Baʼaxten ta chʼaʼtuklaj a xokik le Nuevo Testamentooʼ?

Le ka tu tsʼáajten 17 añoseʼ suunajen Estados Unidos utiaʼal in tsʼoʼoksik in xook. Juntúul in amigo yaanal u religióneʼ tu yaʼalajteneʼ minaʼan u biilal u kuxtal le máaxoʼob maʼ u kʼaj óoloʼob Jesúsoʼ.

Tin núukajtiʼ: «Le máaxoʼob ku creerkoʼob Jesúsoʼ chéen tusaʼanoʼob».

Letiʼeʼ tu yaʼalajten: «¿Tsʼoʼok wa a yáax xokik le Nuevo Testamentooʼ?».

Tin waʼalajtiʼeʼ: «Maʼ».

Letiʼ túuneʼ tu yaʼalajten: «Wa mix juntéen a xokeʼ, ¿baʼaxten túun ka waʼalik maʼ maʼalobiʼ? Le máaxoʼob ku tʼaanoʼob beyoʼ chéen ignoranteʼob».

Le baʼaxoʼob tu yaʼaloʼ jach tu péeksaj in wóol tumen bey in tuukul xan kaʼachoʼ. Kex suʼlakeneʼ tin chʼaʼaj u Bibliaeʼ ka tin bisaj tin wotoch utiaʼal in xoke.

¿Bix ta wilil le baʼax ta xokoʼ?

Ka tin wojéeltaj judíoʼob tsʼíibt le Nuevo Testamentooʼ jaʼakʼ in wóol. Tsʼoʼoleʼ jeʼex u bin in xookeʼ tin wileʼ Jesúseʼ jach uts, maʼ tu creerkuba yéetel uts tu tʼaan u yáantik le máakoʼoboʼ. Hasta binen teʼ biblioteca utiaʼal in jóoʼsik libroʼob ku tʼaanoʼob yoʼolal Jesúsoʼ, chéen baʼaleʼ mix junpʼéel páajchaj u yeʼesikten wa Jesús letiʼe Mesíasoʼ. Yaan tak jujunpʼéel Iibroʼob ku yaʼalikoʼobeʼ Jesús bineʼ Dios. Jach jelaʼan tin wilil le baʼax ku yaʼalikoʼoboʼ tumen teneʼ kin tuklikeʼ: «¿tiʼ máax túun ku orar Jesús? ¿Tiʼ letiʼ mismo wa?». Tsʼoʼoleʼ si Jesúseʼ kíimi, pero le Bibliaoʼ ku yaʼalik yoʼolal Dios: «Techeʼ [...] maʼ ta kíimil». *

¿Baʼax túun ta beetaj?

Yoʼolal tuláakal le libroʼob tin xokoʼ tin tsʼáaj cuentaeʼ kʼaʼabéet in kaxtik u jaajil. Le oʼolal orarnajen tiʼ Dios yéetel u jaajil in wóol, hasta táan kaʼach in wokʼol. Jach yáax in orar sin ke u meyajten in chan libro suuk in xokikoʼ. Jach le táant u tsʼoʼokol in oraroʼ kʼoopnaj kaʼatúul u testigoʼob Jéeoba tin wotoch. Tsikbalnajoʼob tin wéeteleʼ yéetel tu tsʼáajoʼobten junpʼéel folleto. Úuchik u tsʼáaikoʼobten le folleto yéetel úuchik u seguer in tsikbal tu yéeteloʼobeʼ tin wileʼ teʼ Biblia ku jóoʼskoʼob tuláakal le baʼax ku creerkoʼoboʼ. Por ejemploeʼ le Testigoʼoboʼ ku yaʼalikoʼobeʼ Jesúseʼ «u Paal Dios» * maʼ táakaʼan tiʼ junpʼéel Trinidadiʼ. Tsʼoʼoleʼ Jesús «u káajbal le baʼaxoʼob u beetmaj Diosoʼ». *

Maʼ xáanchajeʼ ka suunajen México, teʼeloʼ seguernaj in xook yéetel le Testigoʼoboʼ yéetel in kaanbal yoʼolal le Mesíasoʼ. Tin tsʼáaj cuenta xaneʼ jach yaʼab profecíaʼob ku tʼaanoʼob tu yoʼolal. Kex beyoʼ maʼ jach convencidaen kaʼachi, kin tuklikeʼ: «¿jach wa chéen tiʼ Jesús béeychaj le profecíaʼoboʼ? ¿Kux túun wa chéen tu tusaj le máakoʼob utiaʼal u tuklaʼal letiʼ le Mesíasoʼ?».

¿Baʼax túun convencertech?

Le Testigoʼoboʼ tu yeʼesoʼobten yaʼab pruebaʼob eʼesikeʼ Jesúseʼ maʼ tu páajtal kaʼach u tuus. Por ejemploeʼ 700 años antes tiʼ u yúuchleʼ Miqueaseʼ tu yaʼaleʼ le Mesíasoʼ Belén kun síijil. * Isaíaseʼ tu tsʼíibteʼ le Mesíasoʼ yaan u kíimil bey juntúul kʼasaʼan máakeʼ, pero yaan u muʼukul ichil ayikʼal máakoʼob. * Tuláakal le profecíaʼobaʼ béeychajoʼob tiʼ Jesús.

Le baʼax maas convercertenoʼ letiʼe in wilik tiʼ baʼax familiail taal Jesúsoʼ. Le Bibliaoʼ ku yaʼalikeʼ le Mesíasoʼ yaan u taal tiʼ u paalal rey David. * Le judíoʼob kaʼachoʼ suuk u tsʼíibtikoʼob máax u láakʼtsiloʼob, le beetik u enemigoʼob Jesúseʼ maʼ páajchaj u yaʼalikoʼob maʼ tiʼ u paalal David u taaliʼ. Tsʼoʼoleʼ yaʼab máax aʼalik kaʼach tiʼ Jesús «u paal David». *

Treintisiete años tsʼoʼokok u kíimil Jesúseʼ (año 70) u soldadoiloʼob Romaeʼ tu xuʼulsoʼob Jerusalén bey xan le baʼaxoʼob tsʼíibtaʼan tuʼux ku yeʼeskoʼob tiʼ baʼax familiail u taal máakoʼ. Le oʼolal le Mesíasoʼ unaj kaʼach u chíikpajal antes tiʼ le año 70, tumen le ka tsʼoʼok le año jeʼeloʼ mix máak jeʼel u páajtal u yeʼesik tiʼ baʼax familiail u taaleʼ.

¿Baʼax úuch ka tsʼoʼok a kanik u jaajil?

Tiʼ Deuteronomio 18:18, 19, Dioseʼ tu yaʼaleʼ yaan u yantal juntúul profeta jeʼel bix Moiséseʼ. Letiʼeʼ tu yaʼalaj: «Yaan in kʼáatik cuenta tiʼ le máak maʼ ken u yuʼub le baʼax ken u yaʼal le profeta tin kʼaabaʼoʼ». Úuchik in láaj xokik le Bibliaoʼ tin tsʼáaj cuentaeʼ Jesúseʼ letiʼe profeta u yaʼalmaj Dios kun taaloʼ.