Jo manok keken aye gitimo gin matir. Lutwo gigere i wi ludaktari; kastoma ma gitye ka cam i otel gicayo lutic; luwot ki dege ginywaro lutic ma iye; lutino kwan gibwuro, gingalo, dok gilwenyo i kom lupwonye; dok lucungo wibye mogo gitimo jami maraco kun mukene giwakke ni kitgi atir.

 Baibul aye nyuto ngo ma kit maber kwako. Dok bene tito gin mumiyo jo mapol kitgi raco i kare-ni.

 Kit dano tye ka doko rac medde ameda i twok lobo ducu.

•   Ma lubbe ki kwed mo ma kitimo, kinongo ni jo me lobo Amerika gitamo ni dano ma i lobogi kitgi oballe adada ka iporo ki kit ma onongo tye kwede mwaki 22 angec.

•   I kwed mo ma kitimo i kom dano makato 32,000 ma gitye i lobe 28, pacen 65 pa jo magi guwaco ni kit dano oballe i kare-ni ma loyo kare mo keken mukato angec.

 Baibul otito wacon kit dano ma watye ka nenone i kare-ni.

•   “Ento omyero iniang man ni, i kare me agikki, piny bibedo marac i kare mogo. Pien dano bibedo ka maro komgi kengi kun gibedo lumar lim, luwakke, lucac, lunywar jo mukene. Pe gibiwinyo lunyodogi, pe gibimiyo pwoc mo, . . . gibibedo jo ma mitgi pe jukke, jo ma ger ma gidag gin mo maber.”—2 Temceo 3:1-3.

 Pi ngec mukene i kom kit ma lok pa lanebi man tye ka cobbe kwede, kwan pwony ma wiye tye ni “Tika Baibul Otito Wacon Kit ma Dano Gitamo Dok Gitimo Kwede Jami i Kare-ni?”

 I lobo man ma kit dano tye ka balle medde ameda-ni, dano milion mapol gunongo ni Baibul obedo buk ma pud dong ber loyo ma twero konyogi me bedo ki kit maber. Tam ma Baibul miyo madok i kom yo me kwo ‘kare ducu genne, dok bitic nakanaka.’ (Jabuli 111:8) Nen kong labol mogo:

•   Gin ma Baibul waco: “Kit gin ducu ma wumito ni dano gutim botwu, wun bene wutim botgi kit meno.”—Matayo 7:12.

   Tyen lokke: Omyero water jo mukene i yo me kica ki woro, kit ma wamito ni gin bene guterwa kumeno.

•   Gin ma Baibul waco: “Wuwek goba obedi; dano acel acel myero olok lok ada bot dano lawote.”—Jo Epeco 4:25.

   Tyen lokke: Omyero wabed jo ma genne i jami ducu ma wawaco dok watimo.

 Pi ngec matut i lok man, kwan:

•   Wi Lubele ma wiye tye ni “Gin Maber ki Marac—Itwero Geno Tira Mene?”

•   Pwony ma wiye tye ni “Kit ma Baibul Twero Konyowa Kwede me Nyuto Woro.”