Tika itamo ni ngeyo lok ada ki lok goba tye ka doko tek medde ameda? I kare-ni, pol pa dano giye jami ma lubbe ki kit ma giwinyo dok gitamo kwede ento pe ma lubbe ki lok ada. I twok lobo ducu, jo mapol gitamo ni lok ada mo pe.

 Tam man pe obedo gin manyen. Mwaki 2,000 angec, Gabuna me Roma ma nyinge Pilato openyo Yecu anywar anywar ni: “Ada en gin ango?” (Jon 18:38) Kadi bed Pilato pe okuro lagam pa Yecu, ento lapenye onongo pire tek. Baibul twero konyi me ngeyo lok ada ki dong lok goba i lobo man ma wi dano onywene woko-ni.

Tika lok ada tye?

 Eyo, tye. Baibul tiyo ki nyig lok man ni “ada” me lok i kom gin ma kimoko ni tye kakare dok obedo gin matir. Baibul pwonyowa ni Lubanga Jehovah a aye wang it me lok ada kikome, kun lwonge ni “Lubanga me ada.” (Jabuli 31:5) Baibul bene tye ki lok ada mua ki bot Lubanga, dok poro lok ada meno ki dero, pien twero konyowa me lubo yo matir i lobo man opong ki anywena nywena-ni.—Jabuli 43:3; Jon 17:17.

Itwero nongo ada nining?

 Lubanga pe mito ni waye lok ada ma tye i Baibul lato wang. En cuko cwinywa me ngiyo lok ma i Baibul kun watiyo ki kerowa me tam ma ka jenge i kom kit ma wawinyo kwede ki i cwinywa. (Jo Roma 12:1) Lubanga mito ni wange en dok wamarre ki ‘tamwa ducu,’ dok en cuko cwinywa me moko ada me gin ma wapwonyo ki i Baibul.—Matayo 22:37, 38; Tic pa Lukwena 17:11.

Lok goba ocakke nining?

 Baibul waco ni lok goba ocakke ki bot lamone pa Lubanga, Catan Larac-ci, ma kilwongo ni “won goba.” (Jon 8:44) En owaco lok goba i kom Lubanga bot laco ki dako mukwongo. (Acakki 3:1-6, 13, 17-19; 5:5) Nicakke i kare meno, Catan omedde ki nyayo lok goba ki kano lok ada madok i kom Lubanga.—Niyabo 12:9.

Pingo lok goba onya tutwal i kare-ni?

 I karewa-ni, ma Baibul lwongo ni “kare me agikki,” Catan tye ka bwolo dano i rwom ma lamal loyo kare mo keken. Dano pol kare giwaco lok goba me nyweno wi jo mukene ki dok me nongo gin mo ki botgi. (2 Temceo 3:1, 13) Lok goba bene onya i pol pa dini i kare-ni. Gin ma Baibul otito pi karewa-ni tye ka cobbe pien dano “gicoko lupwony ma twero pwonyogi ki gin ma gimito winyone” dok ‘giloko ngegi wek pe giwiny lok ada.’—2 Temceo 4:3, 4.

Pingo lok ada pire tek?

 Wek ngat acel acel ogen lawote, mitte ni gulok lok ada i kingi. Ka gen pe i kin jo moni, liremgi balle woko. Baibul waco ni Lubanga mito ni worowa ojenge i kom lok ada. Wacci: “Jo ma wore [Lubanga] myero guwore i cwiny ki ada.” (Jon 4:24) Me pwonyo kit ma lok ada ma tye i Baibul twero konyi kwede me niang lok goba ma kiwaco i kom Lubanga, ki dong kit ma itwero gonnye kwede ki i lok goba magi, kwan pwony ma lubbe aluba ma wiye tye ni “Goba ma Miyo Dano Pe Gitwero Maro Lubanga.”

Pingo Lubanga mito ni ange lok ada?

 Lubanga mito ni inong kwo ma pe tum. Ento me nongone, myero ipwony lok ada i kome. (1 Temceo 2:4) Ka ipwonyo cik pa Lubanga dok iketo i tic, ci wat i kin en ki in bidoko cok adada. (Jabuli 15:1, 2) Me konyo dano wek gupwony lok ada, Lubanga ocwalo Yecu i lobo. Lubanga mito ni wawiny pwony pa Yecu.—Matayo 17:5; Jon 18:37.

Tika Lubanga bigiko lok goba ducu?

 Eyo, En bigikone. Lubanga pe maro ka dano gibwolo jo mukene wek ginong gin mo ki botgi. En ocikke me jwero ki i lobo man jo ma gimedde ki loko lok goba. (Jabuli 5:6) Ka Lubanga otimo meno, ci en bene bicobo cikkene ni: ‘Jo ma loko lok ada gibibedo matwal.’—Carolok 12:19.