LAPENY ME 7
Atwero Lweny ki Dic me Donyo i Tim me Buto Nining?
NGO MA ONONGO IN IBITIMO?
Go kong ni: Esta gin ki Mike pud gubedo ka winye pi dwe aryo keken, ento Esta winyo calo dong engeyo Mike pi kwone kulu. Cawa ducu gibedo ka cwalo mecej ki cim, girii ka lok i cim ma cim aye to nongo peya gutyeko lokgi, dok lokgi rwatte litap! Kombeddi dong, Mike pe mito lok keken.
Pi dwe aryo mukato-ni, Mike ki Esta pe gutimo gin mo mapat ki mako cing ki doto dog keken. Esta pe mito timo gin mo makato meno. Ento bene, en pe mito ni gupokke woko ki Mike. Mike miyo ewinyo calo en pud dong mwonya dok pire tek ya! En tamo ki i cwinye ni, ‘Kit ma an wan ki Mike wamarre adada . . .’
Ka dong idit ma iromo cako winye wun ki ngati mo dok gin ma tye ka timme i kom Esta-ni bene tye ka timme i komi, ngo ma onongo ibitimone?
TAM KONG!
Tim me buto obedo mic ma Lubanga omiyo bot jo munyomme keken. Ka idonyo i tim me buto ma peya inyomme nongo itiyo ki mic man i yo marac. Obedo calo kwanyo bongo mo maleng ma ngat mo omini macalo mic ci itiyo kwede me dunyo ot
Ka ipye ki i wi yat kun itemo tuk calo winyo, ci ibideno can. Man bene rom aroma ka ituro cik ma kwako kit ma atir calo en ma wacci: “Wuwek tim me kwele obedi.”
Adwogi ango ma bino pi kwero lubo cik man? Baibul waco ni: “Ngat ma timo tim kwele balo kome kene.” (1 Jo Korint 6:18) I yo ma nining?
Lukwed lok gutyeko niang ni bulu mapol ma gudonyo i tim tarwang ginongo peko calo ma kiryeyogi piny kany.
-
AREMCWINY Pol pa bulu ma gudonyo i tim kwele lacen gukoko ange.
-
RWENYO GEN. I nge donyo i tim buto ma pe oporre, ngat man cako pennye kekene i kom lawote ni, ‘En mono obuto ki anga mukene?
-
TUR CWINY. Ki i cwinygi, pol pa anyira gimito ngat ma bigwokogi ento pe ngat ma tuko kwedgi atuka. Dok, awobe mapol mitigi a woko ki i kom nyako ma dong otyeko buto kwedgi.
-
Ngec ma pire tek: Ka idonyo i tim me buto ma peya inyomme, ci ibikwanyo deyo woko ki i komi pien nongo ijalo gin mo ma pire tek tutwal. (Jo Roma 1:24) Komi pire tek tutwal me jalone ajala kumeno!
Nyut ni in dano ma cung matek pi gin matir ki ‘weko tim me kwele.’ (1 Jo Tecalonika 4:3) Dong, nino mo ka inyomme, ci itwero nongo mit pa buto. Dok ibinongo mitte ducu, labongo lworo, koko ange, ki dong par ma bino macalo adwogi me donyo i tim kwele.
IN ITAMO NINGO?
-
Ngat mo ma mari ada tika romo timo gin ma cwero cwinyi nyo wano komi?
-
Tika ngat mo ma paro piri twero biti me balo watti ki Lubanga?
—Jo Ibru 13:4.
