Yam tye laco mo me Icrael ma nyinge Elkana ma onongo tye ki mon aryo. Nying dako acel Anna ki mukene Penina, ento Elkana onongo maro Anna makato. Penina obedo ka nywaro Anna nino ducu pien Anna onongo pe ki latin ento Penina tye ki lutino mapol. Mwaka ki mwaka, Elkana onongo tero jo me ode ka woro Lubanga i kema me woro i Cilo. I nino mo acel ma gitye kunnu, en oneno ni dakone Anna tye ki cwercwiny madwong. En owacci: ‘Anna pe ikoki. An atye en do. Amari mada.’

Lacen, Anna ocito ka lega kene. Onongo pe twero juko koko kun woto ki bako doge bot Jehovah ni okonye. En okwonge ni: ‘Jehovah, ka imiya latin awobi, ci abimiyo en boti, wek oti piri pi kare me kwone ducu.’

Lalamdog Madit, Eli, oneno ka Anna tye ka lok kene kene ki koko, ci otamo ni Anna omer woko. I kare ma Eli ojukke, Anna ogamo ni: ‘An pe amer, rwoda. Atye ki peko madit ma tye ka cwero cwinya, dok abedo ka tito pekona bot Jehovah.’ Eli oniang ni etamo marac i kom Anna, ci owacce ni: ‘Lubanga myero oye legani.’ Anna onongo kwe cwiny ci oa odok cen paco. Ma peya mwaka acel okato, en onywalo latin  awobi ci ocako nyinge ni Camuel. Go kong yomcwiny ma Anna obedo kwede!

Wi Anna pe owil i kom kwongene bot Jehovah. I kare ma Anna ojuko doto Camuel, en okelo Camuel me tic i kema me woro. En owaco bot Eli ni: ‘Man aye latin awobi ma alego pire. Dong adyere woko i cing Jehovah pi kare me kwone ducu.’ Elkana gin ki Anna onongo gilimo Camuel mwaka ki mwaka kun gikelo bote bongo manyen. Jehovah dok omiyo ki Anna lutino awobe adek ki anyira aryo.