TICWA me pwony pire tek adada. Ento pe jo ducu ma watito kwena botgi gijolo ki pwoc. Kadi bed ni dano ginyuto miti i kwena ma tye i Baibul, ento pol kare pe gineno ni kwano Lok pa Lubanga kwedwa obedo gin ma pire tek.

Meno obedo kit ma Gavin onongo tamo kwede, en ocako bino i cokke, ento onongo pe mito ni kikwan Baibul kwede. En owaco ni: “Ngecca i kom Ginacoya onongo nok adada, dok onongo pe amito ni kinge ni atye ki ngec manok. Onongo alworo ni gitwero bwola me donyo i dinigi.” In itamo ningo? Tika Gavin onongo pe bilokke matwal? Pe! Tam kong i kom adwogi maber ma pwony me Baibul twero kelo i kwo pa ngat moni. Jehovah owaco bot jone i kare macon ni: “Lokka oton macalo toyo, macalo kot ma ngido i kom alita.” (Nwo. 31:19, 30; 32:2) Gin ma toyo timo twero nyuto maber kit ma watwero konyo ki dano ducu i ticwa me pwony.​—1 Tem. 2:3, 4.

Toyo ton motmot. Toyo gure motmot ci dong ton ki acel acel ki i lupwo nyo akuna ma tye i yamo. Lok pa Jehovah onongo ‘ton macalo toyo’ pien en onongo loko ki kica, ki mwolo, dok bene onongo paro pi jone. Waromo lubo lanenne ka waworo tam pa jo mukene. Wacuko cwiny dano me tam pigi kengi i kom lok moni ka wek gumok tam ma meggi. Ka wanyuto ni waparo pigi i yo man, ci dano bijolo lokwa, dok ticwa me pwony binyako nyige.

Toyo kweyo cwiny. Ticwa me pwony kweyo cwiny jo mukene ka watemme ki kerowa ducu me konyogi me cobo mitigi. Gavin, ma waloko i komme malo-ni pe kidiyo adiya me kwano Baibul. Ma ka meno Chris, omego ma okwongo lok kwede-ni, otemo yo mapatpat me konyo Gavin wek obed agonya me nywako lok me Baibul. Chris otito bot Gavin ni Baibul tye ki wi lok acel madit dok bedo ki ngec iye bikonye adada me niang cokke ma en cito iye-ni. Ingeye, Chris owacce ni lok pa lunebi ma kicoyo i Baibul aye okonye me moko pire kene ni lok ma i Baibul tye ada. Man oweko gucako nywako lok mapol madok i kom kit ma lok pa lunebi ocobbe kwede. Nywako lok man okweyo cwiny Gavin dok oweko en oye kwano Baibul.

Toyo gwoko kwo. I lobo pa jo Icrael, kare mogo nongo piny lyet, mutwo, dok bene kot bedo pe pi dwe mapol. Labongo toyo, ginapita onongo two ci to woko. Orwo pii me cwiny bene tye i kareni, kit ma Jehovah otito con. (Amoc 8:11) En ocikke ni lutit kwena ma kiwirogi gibibedo “macalo toyo ma oa ki bot Rwot [Jehovah]” ka gitito pi kwena me Ker-ri, kun bene ginongo kony pa lutic luwotgi, “romi mukene[-ni].” (Mika 5:7; Jon 10:16) Wan tika waneno lok me kwena me Ker-ri calo obedo but yub ma Jehovah oketo me laro kwo pa dano?

Toyo obedo mot ma Jehovah miyo. (Nwo. 33:13) Ticwa me pwony twero kelo mot bot jo ma giye winyo lokwa. Gavin onongo mot macalo meno. Ki i kwanne me Baibul, kigamo lapeny ducu ma en onongo tye kwede. Pe otero kare malac, en odongo i yo me cwiny ci onongo batija, i kareni, en kacel ki dakone, Joyce, gitye ka nongo yomcwiny i nywako i ticwa me tito kwena.

Tam i kom toyo twero bene cuko cwinywa me neno tic ma wan ki acel acel watiyo i tito kwena calo obedo tic ma pire tek adada. I yo ma nining? Toyo ma ton ki acel acel kelo alokaloka manok adada, ento ka gitye milion mapol, gitwero kweyo piny. I yo acel-lu, tic pa ngat acel keken twero nen calo gin ma konye pe adada. Ento, ka kiribo kero pa lutic ducu pa Jehovah ci kitwero miyo caden “bot rok ducu.” (Mat. 24:14) Tika ticwa me pwony bibedo mot mua ki bot Jehovah pi jo mukene? Twero bedo macalo mot ka kwena ma watito tye calo toyo ma ton motmot, kweyo cwiny, dok gwoko kwo!