1. Kadi bed ni Jehovah aye Ngat Mamalo Twal, en olwongo jo mukene me timo ngo?

JEHOVAH aye Ngat Mamalo Twal, Lacwe jami ducu, Ngat ma ryeko kacel ki teko ducu a ki bote. Yubu oniang lok meno. I kare ma Jehovah openyo Yubu lapeny madok i kom Cwecce, en ogamo ni “Angeyo ni itwero tiyo gin ducu; pe tye lok mo ma iyubo ma pe bicobbe kakare.” (Yubu 42:2) Kadi bed ni meno Jehovah twero timo gin mo keken ma en mito timone labongo kony pa ngat mo​—nicakke wacon en onyuto cwiny me mar kun lwongo jo mukene me tic kacel kwede me cobo yubbe.

2. Tic ango ma pire tek ma Jehovah omiyo bot Yecu me atima?

² Lubanga okwongo cweyo Wode acel keken. Jehovah oye me tic kacel ki Wode i cweyo jami ducu. (Jon 1:1-3, 18) Lakwena Paulo ocoyo lok i kom Yecu Kricito ni: “I en Lubanga ocweyo jami ducu, gin ma tye i polo ki gin ma tye i wi lobo, gin ma nen ki gin ma pe nen, kadi wa wegi komker ki wegi  dito, ki luloc, ki wegi twer ducu. Jami ducu yam giketo pi twerre dok pire bene.” (Kol. 1:15-17) Pi meno, Jehovah oketo deyo i kom Wode ki miye tic me cweyo jami ducu, ki dok tito bot jo mukene tic ma pire tek ma Wode otimo.

3. Tic ango ma Jehovah omiyo bot Adam, ki dok pingo?

³ Jehovah bene olwongo dano me tic kacel kwede. Me labolle, en omiyo ki Adam tic me cako nying lee. (Acak. 2:19, 20) Nen calo Adam pud dong obedo ki yomcwiny adada me neno ginacweya, niang kitgi, ki dok me yero nying mupore pi lee ducu ki acel acel! Jehovah onongo twero cako nying lee en kikome pien en aye ma ocweyogi. Ento, inongo ni ki cwiny me mar, en omiyo tic meno ki Adam. Lubanga bene omiyo tic me yaro wang lobo me Paradic bot Adam wek okat kit ma onongo tye kwede i poto me Eden. (Acak. 1:27, 28) Ki cwercwiny madit, Adam okwero tic kacel ki Lubanga dok man okelo adwogi marac adada bote kacel ki likwayone ducu.​—Acak. 3:17-19, 23.

4. Jo mukene gutiyo kacel ki Lubanga nining i cobo yubbe?

⁴ Lacen, Lubanga olwongo jo mukene me tic kacel kwede i cobo yubbe. Nua ogero yeya ma ogwoko kwone ki pa lupacone ki i Pii Aluka ma ocorre i wi lobo. Moses olaro Luicrael ki i opii i lobo Ejipt. Yocwa otelo rok me Icrael i Lobo ma Kiciko Pire. Solomon ogero ot pa Lubanga i Jerucalem. Maliam onywalo Yecu. Jo magi ducu ma lugen-ni gutiyo kacel ki Jehovah i cobo yubbe.

5. Tic mene ma watwero nywako iye, ki dok tika onongo mitte ni Jehovah owek wati tic meno? (Nen cal ma tye i pot karatac 28.)

⁵ I kareni, Jehovah lwongowa me tyelo kor Ker pa Meciya ki cwinywa ducu. Tye jami mapol me atima i tic pa Lubanga. Tye mogo ma Lukricitayo mukene pe giromo timone, ento wan ducu watwero nywako i tic me tito kwena maber me Ker pa Lubanga. Ki lok ada, onongo pe mitte ni Jehovah myero ominiwa tic man. En kikome onongo twero lok atir ki dano. Yecu owaco ni meno Jehovah onongo twero tic ki godi me tito pi Ker pa Meciya. (Luka 19:37-40) Kadi bed kumeno, Jehovah pud ye ni wabed “lutic kacel” kwede. (1 Kor. 3:9) Lakwena Paulo ocoyo ni: ‘I ticwa kacel ki Lubanga bene walego ni, kit ma dong wunongo kwede kica pa Lubanga-ni, pe wuwek oballe nono.’ (2 Kor. 6:1) Tic kacel ki Lubanga obedo twon mot madit dok miniwa yomcwiny adada. Kong dong waneno pingo timo jami magi keliwa yomcwiny madit adada.

6. Latin Kayo pa Lubanga otito kit ma tic kacel ki Wonne okele yomcwiny nining?

⁶ Nicakke wacon, lutic pa Jehovah gunongo yomcwiny i tic kacel ki Lubanga. Yecu ma obedo Wod me kayo pa Lubanga opore kene ki ryeko i kare ma owaco ni: ‘[Jehovah] oketo an ryeko macalo acakki ticce. An onongo atye, abedo ka ngete macalo ladiro tic. Dok cwinye obedo yom kare ducu pi an, an abedo ki yomcwiny madwong mada i nyime.’ (Car.  8:22, 30) Yecu otiyo kacel ki Wonne ki yomcwiny, cwinye obedo yom i tic ma en otiyogi ki dok bene me ngeyone ni cwiny Jehovah onongo yom i kome adada. Wan kono?

7. Pingo tic me tito kwena keliwa yomcwiny?

⁷ Yecu owaco ni meno yomcwiny madit tye i gamo kacel ki i miyo. (Tic 20:35) Wabedo ki yomcwiny i kare  ma wanongo ada, dok bene wanongo yomcwiny ka wanywako lok me ada ki jo mukene. Ka wanywako lok me ada ki jo mukene, waneno kit ma jo ma kec nekogi i yo me cwiny gibedo ki yomcwiny ka nongo giniang dok gidongo pwoc pi Lubanga kacel ki lok ada ma tye i Baibul. Wan bene wabedo ki yomcwiny ka waneno gitimo alokaloka pe i tamgi keken ento bene wa i yo me kwogi. Wangeyo ni meno tic me tito kwena maber obedo tic mo ma pire tek adada. Tic man yabo yo bot jo ma guyubo watgi ki Lubanga me nongo kwo ma pe tum. (2 Kor. 5:20) Tic mene ma pire tek ki dok ma kelo yomcwiny loyo, ma watwero timone mapat ki konyo dano wek gunong kwo ma pe tum?

8. Gin ango ma jo mogo guwaco ma lubbe ki yomcwiny ma bino pi tic kacel ki Jehovah?

⁸ Kadi bed ni wabedo ki yomcwiny ka dano gujolo kwena ma watito botgi, cwinywa bene bedo yom me ngeyone ni nongo watye ka yomo cwiny Jehovah, dok en tye ki pwoc i kom tutewa me tic pire. (Kwan 1 Jo Korint 15:58.) Marco, ma bedo i lobo Italy owacci: “Atye ki yomcwiny madit me ngeyone ni atye ka timo gin maber loyo pi Jehovah ento pe bot ngat mo ma wiye biwil woko i kom jami ma atimo.” I yo acel-li, Franco , ma bene bedo i lobo Italy owaco ni: “Jehovah tiyo ki Baibul kacel ki jami mogo me cwiny me poyo wiwa nino ducu ni emarowa dok jami ducu ma watiyo pire pigi tego, kadi bed ni meno waneno tutewa calo gin ma konye pe. Meno aye gin mumiyo tic kacel ki Lubanga kela yomcwiny dok mina tyen lok me kwo.”

9. Wat ango ma obedo i kin Jehovah gin ki Yecu, dok pingo?

⁹ Ka watiyo kacel ki jo ma wamarogi, wat i kinwa dongo dok bene wacako ngeyogi maber. Waniang yub ma gitye kwede ki gin ma gitye ka timo me cobone. Yecu otiyo kacel ki Jehovah pi mwaki bilion mapol ata, dok wat maber ki mar matek omoko i kingi ma gin mo keken pe romo balone. Yecu onyuto wat macok ma tye i kingi kun waco ni: “An ki Won wan acel.” (Jon 10:30) Gubedo ki yomcwiny madit adada i tic kacel kun ginote kare ducu.

10. Pingo tito kwena nyikowa cok bot Lubanga ki bene bot jo mukene?

¹⁰ I legane, Yecu okwayo Jehovah ni meno ogwok lupwonnyene. Pingo? En olego ni: “Wek gibed acel macalo wan acel.” (Jon 17:11) Ka wawoto ki loko yo me kwowa wek orwatte ki cik pa Lubanga kun bene wanywako i tito kwena, man weko waniang kit pa Lubanga. Dok wabipwonyo pingo geno Lubanga ki lubo tirane tye me ryeko. Ka wanyikke cok bot Lubanga en bene nyikke cok botwa. (Kwan Yakobo 4:8.) Wanyikke bene cok ki utmegiwa pien wan ducu  warwatte ki atematema dok wabedo ki yomcwiny i yo ma rom ki dok wan ducu mitiwa tye acel. Ki lok ada, watiyo kacel, wabedo ki yomcwiny i yo ma rom, dok waciro atematema ma rom. Octavia, laminwa mo ma bedo i lobo Ulaya owaco ni: “Tic kacel ki Jehovah weko anyiko cok ki jo mukene pien kitung bota lirem pe cung i kom kit ma ngat moni nen kwede ki woko ento cung i kom bedo ki yub ma rom kacel ki lubo tira pa Jehovah.” Tika in bene iwinyo kit meno? Tika pe ibedo ki miti me nyikke cok ki jo mukene ka ineno kit ma gitye ka tutte kwede me yomcwiny Jehovah?

11. Pingo wabinyikke cok bot Jehovah kacel ki utmegiwa i lobo manyen?

¹¹ Mar watye kwede pi Lubanga ki bene pi dano mukene twero bedo matek adada, ento bibedo matek loyo i lobo manyen. Tam kong pi tic ma tye i anyim! Wabijolo jo ma kicerogi kun bene wapwonyogi ki cik pa Jehovah. Bimitte ni kilok loboni odok paradic. Man pe bibedo tic mayot, ento pud dong wabibedo ki yomcwiny madit ya me tic kacel ki luwotwa ka wawoto ki roco kwowa wek wabed labongo roc i te Ker pa Meciya! Dano ducu gibimedde ki nyiko cok bot luwotgi kacel ki Lubangagi, ma ‘bimiyo gin makwo ducu giyeng.’​—Jab. 145:16.

12. Tic me tito kwena gwokowa nining?

¹² Myero wagwok watwa ki Lubanga. Pien watye i lobo ma Catan Larac-ci aye tye ka lonyone ki dok bene pi roc ma watye kwede, weko twero bedo yot botwa adada me cako lubo tam ki kit me lobo man. Cwiny me lobo man watwero porone ki pii nam ma corre magwar adada kun ywayowa dwokowa tung ka ma pe wamito. Wek pe oterwa tung ka marac, mitte ni omyero watute matek adada. I yo acel-li, myero watute matek wek cwiny me lobo pa Catan-ni pe orwenywa woko. Ka watye ka tito kwena bot jo mukene, myero waket tamwa i kom jami mabeco ento pe i kom jami ma gitwero balo niyewa. (Pil. 4:8) Tito kwena jingo niyewa, dok poyo wiwa i kom cikke pa Lubanga kacel ki tirane me mar. Konyowa bene me cung matek i niye.​—Kwan Jo Epeco 6:14-17.

13. Lacaden mo acel ma bedo i lobo Australia winyo nining ma lubbe ki tic me tito kwena?

¹³ Ka waketo cwinywa ducu i tito kwena ki dok i timo jami mukene me cwiny, man biweko pe wabedo ki cawa me keto tamwa tutwal i kom pekki ma watye kwede, dok meno gwokowa ki jami maraco. Omego mo ma nying Joel ma bedo i lobo Australia, owaco ni: “Tic me tito kwena weko wanga bedo twolo me neno jami ma tye ka timme. Poyo wiya bene i kom atematema ma dano tye ka wok ki iye ki bene adwogi mabeco ma anongo ki i keto cik ma iye lac i tic. Tito kwena konya me bedo ngat ma mwol; mina kare me jenge i kom Jehovah kacel ki i kom utmegina.”

14. Pingo diyo cwinywa i tic me tito kwena nyuto ni meno watye ki cwak pa Lubanga?

¹⁴ Tic me tito kwena bene weko wangeyo ni meno watye ki cwak pa Lubanga. Me labolle: Ket kong ni meno kimini tic me poko mugati bot dano ma i kabedo-ni. Pe kibiculi pi tic man nyo dwoko cente ma itiyo kwede. Ma dong raco loyo, pe biteri kare malac me niang ni meno dano gipe ki miti i kom mugati man ki dok jo mogo gibidagi pi poko mugati man. Ibitero kare ma rom mene itiyo tic man? Cwiny marac ma dano gitye kwede bituro cwinyi dok pe biweko i  tiyo tic man pi kare malac. Ento, inongo ni meno jo mapol i kinwa dong gutero mwaki mapol i tito kwena maber labongo cul mo kadi bed ni meno giciro yet ki cac pa jo ma gipe ki pwoc i kom kwena ma watito-ni. Meno tika pe nyuto atir ni watye ki cwak pa Lubanga?

15. Tic me tito kwena kubbe ki yub ma Lubanga tye kwede pi dano nining?

¹⁵ Tam kong i kom kit ma tic me tito kwena rwatte kwede ki yub me mar ma Jehovah tye kwede pi dano. Yubbe pi dano tye ni gubed i lobo kany matwal labongo to; kadi bed ni meno Adam otimo bal ento Jehovah pe oloko tamme. (Ic. 55:11) Ma ka meno, en oketo yub pi dano wek kilargi woko ki i bal kacel ki to. Ma lubbe ki yub meno, Yecu obino i lobo ka odyero kwone ma pe ki roc pi jo ma gin luwiny. Ento wek gubed luwiny, onongo mitte ni meno guniang gin ma Lubanga mito ki botgi. Pi meno, Yecu bene opwonyo dano ki cik pa Lubanga, ki dok en bene ociko lupwonnyene me timo kit meno. Ka wakonyo jo mukene me dongo watgi ki Lubanga nongo watye ka nywako i tic me laro dano ki i bal kacel ki to.

16. Ticwa me tito kwena rwatte ki cik aryo madito ma Lubanga omiyo nining?

¹⁶ Ka wakonyo dano wek gunong kwo ma pe tum man nyuto ni watye ki mar pi luwotwa ki dong pi Jehovah ma “mito laro jo ducu, dok mito ni jo ducu gunge lok me ada.” (1 Tem. 2:4) I kare ma kipenye cik mene madit loyo ki i kin cik ma gimiyo bot rok me Icrael, Yecu odok iye ni: “‘Mar Rwot Lubangani ki cwinyi ducu, ki tiponi [kwoni] ducu, ki tammi ducu.’  Man aye cik madit dok mukwongo.  Ki me aryone ma rom kwede en ene ni, ‘Mar lawoti macalo imarre keni.’” (Mat. 22:37-39) Ka wanywako i tic me tito kwena, nongo watye ka nyuto ni meno walubo cik pa Lubanga.​—Kwan Tic pa Lukwena 10:42.

17. I winyo nining ma lubbe ki mot ma itye kwede me tito kwena maber-ri?

¹⁷ Pud dong watye ki mot madit ya! Jehovah ominiwa tic ma keliwa yomcwiny, ma nyikowa cok bote ki bene bot jo mukene, dok gwokowa i yo me cwiny. Tic man bene miniwa kare me nyuto marwa pi Lubanga ki pi dano. Kit ma dano gikwo kwede pe rom i twok loboni ducu, ento kadi bed ni gitino nyo guti, lulonyo nyo lucan, gitek nyo in gigoro, dano milion mapol gitye ka yenyo yo mapat pat me nywako niyegi ki jo mukene. Itwero ye lok pa laminwa mo ma bedo i lobo France, ma nyinge Chantel. En owaco ni: “Ngat ma tek loyo ducu, Lacwe jami ducu, Lubanga ma layom cwiny owacca ni: ‘Cit! I lokki! Lok pira, kun i loko lok ma a ki i cwinyi. Amini tekona, lokka ma en aye Baibul, cwak ma ki i polo, luwoti ma gitye i lobo, pwonnye kare ki kare, ki dok tira ma mitte i karene kikome.’ Pud dong obedo mot madit ya me timo gin ma Jehovah mito ki botwa ki dok me tic kacel ki Lubangawa!”