1. Nicakke i acakki piny, gin ango ma onongo nen i tic pa Lubanga?

I ACAKKI piny, onongo nen ka maleng ni ginaketa ducu onongo gitye ma gunote. Ngat ma Lubanga okwongo cweyo owaco ni: “Abedo ka ngete macalo ladiro tic. Dok cwinye obedo yom kare ducu pi an.” (Car. 8:30) Won ki Wod onongo ginote i ticgi, dok man oweko gucweyo jami mamwonya ma waneno i kare-ni. Lutic pa Lubanga bene gubedo ka note kit meno itiyo ticce. Waneno man i kit ma kigero kwede ki yeya i kare pa Nua; i guro, yako ki dong tingo kema pa Lubanga i kare ma Luicrael onongo gitye ka wot i dye tim; ki kit ma onongo kiwero kwede wer me pako Jehovah i otte ma nongo dwan dano ducu winye mamwonya adada. Jami magi ducu onongo gimito notte.​—Acak. 6:14-16, 22; Wel 4:4-32; 1 Tekwaro 25:1-8.

2. (a) Ngo ma onongo nen ka maleng i kom kacokke pa Lukricitayo macon? (b) Lapeny mene ma wabinyamone?

² Yub man me tic kacel-li onongo obedo kit yub ma kacokke pa Lukricitayo i kare macon onongo gitiyo kwede i te tela pa Yecu Kricito. Lakwena Paulo otito ni, kadi bed ni  Lakricitayo acel acel ma kiwiro onongo tye ki ‘mot ma kite patpat’ dok onongo ‘tic ma gitiyo bene tye ma kitgi patpat kun ‘gitiyo i yo mapatpat’ gin ducu gitye “kom acel” (Kwan 1 Jo Korint 12:4-6, 12.) Ento i kare-ni kono? Watwero bedo ma wanote kacel i tic me tito kwena maber-ri nining? Dok watwero note i tic i kacokke kacel ki i pacowa nining?

3. Ginanyuta ango ma lakwena Jon oneno?

³ Cokcok i agikki me cencwari me acel K.M., lakwena Jon oneno i ginanyuta lumalaika abiro ma gukuto tumgi ki acel acel. I kare ma lamalaika me abicce okuto tumme, Jon oneno “lakalatwe” mo oa ki i polo ci opoto i ngom. Lakalatwe meno onongo tye ki layab ma oyabo kwede dog bur. Yito oduny ki i doge, ci lwak bonyo okatti ki i yito meno. Ma ka balo lum me lobo, bonyo magi guketo can i kom “jo ma pe ki lanyut pa Lubanga i tur nyimgi.” (Yabo 9:1-4) Jon onongo ngeyo maber bal ma bonyo magi gitwero kelone. I kare pa Moses, bonyo bene obalo cam i lobo me Ejipt. (Nia 10:12-15) Bonyo ma Jon oneno-ni cung pi kit ma Lukricitayo ma kiwirogi gitye ka tito kwede kwena me ngolo kop pa Jehovah. Gin gitye ka tic kacel ki dano milion mapol mukene ma gitye ki gen me kwo i lobo. Ngene kene ni notewa kacel i tito kwena dwoko piny rwom ma Catan tiyo kwede ki dulle me dini goba ma tye i twok lobo ducu!

4. Tic ango ma jo pa Lubanga myero gutim, dok gitwero timo man nining?

⁴ Jo pa Jehovah gitye ki tic madit me tito “kwena maber[-ri]” i twok loboni ducu ma agikki piny pudi. (Mat. 24:14; 28:19, 20) Man bene kwako lwongo “ngat ma orwo neko” wek obin, “omat pii me kwo labongo wel.” (Yabo 22:17) Watwero timo man nining macalo jo me kacokke pa Lukricitayo? Man timme ka ‘waribbe woko i kome, dok wakubbe kacel.’​—Ep. 4:16.

5, 6. Wanotte kacel i tito kwena maber-ri nining?

⁵ Me nywako kwena maber me Ker-ri ki dano mapol kit ma watwero, myero wayubbe maber i tic man. Pi meno, wanongo tira i kit me timone. Tira ma kimiyo ki i kacokke ma tye i twok lobo ducu-ni gikonyowa me note i tic kacel. I nge cokke me cito i ticwa me pwony, wacito ka tito kwena bot dano. Watiyo ki dogwa kacel ki bukkewa ma gijenge i kom Baibul ma tye milion mapol ata, me yaro kwena-ni i kabedo mapatpat. In tika ilubo tira ma kimiyo me nywako i yub mapatpat me tito kwena? Ka itimo meno, nongo itye ka ribbe kacel ki dano milion mapol mukene ma gunote i tito kwena ki ‘lamalaika ma tuk wirre i dye polo” ma kiloko i kome i Niyabo 14:6.

⁶ Pud dong bedo me yomcwiny madit ya, me kwano pi adwogi maber ma bino pi ticwa me tito kwena i Yearbook! Tam bene pi kit ma watye ma wanote kwede, ka wapoko lwongo me bino i gure me rijon, me adwol, ki dong me distrik. I gure macalo magi, kiminiwa pwony mamwonya dok wabedo ki tuku goga kacel ki lapor mogo ma gia ki i Ginacoya. Pol kare pwony magi gititiwa ni Lubanga lwongowa i yo me mar ni wati pire ki cwinywa ducu. Kwero nipo me to pa Yecu bene notowa kacel. Wacokke kacel  mwaka ki mwaka i nge poto ceng i Nican 14, pien watye ki pwoc madit pi kica pa Lubanga ma pe wapore pire-ni, dok watye ka lubo tira pa Yecu. (1 Kor. 11:23-26) Pe kijolo jo ma gunongo batija keken ento dano ducu me bino. Ma dong odong cabit manok me o i kwer me Nipo, watute matek me miyo waraga me lwongo bot dano ducu ma i wang tic pa kacokkewa pi yub ma pire tek-ki.

7. Ka watye ka tic kacel, ngo ma watwero cobone?

⁷ Bonyo acel keken pe twero timo bal madit. I yo acel-lu, tic pa ngat acel keken pe twero nyako nyig madwong. Ento ka watye ka tic kacel, watwero dwoyo tam pa dano milion mapol ata i kom Jehovah, ma en aye ngat ma myero me nongo pak ki deyo ducu! Ento, man keken aye pe yo acel ma ticwa kacel twero kelo note i kin jo pa Lubanga.

8, 9. (a) Labol ango ma Paulo otiyo kwede me pwonyo Lukricitayo wek gubed ma gunote? (b) Watwero cwako kor yub me kacokke nining?

⁸ I waragane bot jo Epeco, Paulo oloko i kom yub me kacokke kacel ki kit ma omyero ‘gudong kwede malo i yo ducu.’ (Kwan Jo Epeco 4:15, 16.) Ngo ma bikonyowa ki acel acel me cobo yub meno? Paulo otiyo ki labol i kom kit ma dul komwa mapatpat gitiyo kwede kacel me nyuto note ma watye kwede i kacokke i te tela pa Yecu Kricito. Lakwena Paulo oloko i kom kit ma gikubbe kwede kacel “i wang mwot ducu ma tye iye.” Wan ducu ki acel acel kadi bed watino nyo wateggi, komwa tek nyo wagoro, watwero weko jo me kacokke ginote kun gidongo i yo me cwiny nining?

⁹ Gin ma pire tek loyo aye mine i te tela kun wanyuto woro bot luelda ma Yecu ocimogi me miyo tira i kacokke. (Ibru 13:7, 17) Timo man pe bibedo yot kare ducu. Ento, wangeyo ni watwero penyo Lubanga pi tirane. Cwiny mere maleng twero konyowa me cwako kor yub me kacokke ki cwinywa ducu. Ka ce i kine mukene wawinyo calo pe wamito lubo tira ma kimiyo, ci myero walwod kit ma tic kacel ki mwolo bikonyo me gwoko note i kacokke. Medo i kom meno, note i yo ma kit meno twero konyo wan ducu me dongo marwa pi luwotwa.

10. Lukony kor tic gikelo note i kacokke nining? (Nen cal ma tye i pot karatac 21.)

¹⁰ Lukony kor tic gitiyo matek me kelo note i kacokke. Omege magi, kadi bed ni gitye ki mwaka mapatpat, gitiyo matek me konyo jo ducu. Me labolle, gikonyo luelda me neno ni watye ki bukke muromo pi ticwa me pwony. Medo i kom meno, pol kare gikonyo i tic me gwoko lengo kacel ki roco Ot me Ker, dok gijolo wele ma gibino i kacokke. Ka watiyo kacel ki omege magi, wakonyo wek tic me kacokke owot maber.​—Por ki Tic pa Lukwena 6:3-6.

11. Jo matino gitwero timo ngo me konyo wek dano ducu me kacokke gubedo ma gunote kacel?

¹¹ Omege muteggi mapol dong gutiyo tic me konyo kacokke pi mwaki mapol. Ento ka giwoto ki ti, man twero gengogi ki timo jami mogo, pi meno alokaloka bimitte. Omege matino gitwero bedo me kony adada. Kadi bed ni pud pe gitye ki ngec muromo, pwony ma ginongo twero konyogi me tiyo tic mukene. Ber mada ka lukony kor tic gitute matek me doko luelda! (1 Tem. 3:1, 10) Luelda mogo ma mwakagi pud tidi  dong gudongo i yo me cwiny mumiyo kiromo cimogi me tic calo luneno, ma gitiyo pi omege ki lumege i kacokke mapol. Watye ki pwoc pi cwak ma jo matino magi gimiyo ki cwinygi ducu. Pe kumeno?​—Kwan Jabuli 110:3; Latitlok 12:1.

12, 13. Ngo ma twero konyo jo me ot me note i kingi?

¹² Kong wamedde ki nyamo lok i kom note, kun waneno kit ma watwero bedo ma wanote i odiwa. Jo mapol dong gunongo ni bedo ki yub me Woro me Otyeno pi Jo me Ot cabit ki cabit jingo wat ma tye i kin jo matino ki ma guteggi. I kare me yomcwiny man, waketo tamwa i kom jami me cwiny ma bikelo note i kin jo me ot. Nyuto lapor ma lubbe ki kit me lok ki dano i ticwa me pwony twero konyo jo me ot moni me yubbe maber me tito kwena i yo mucwiny. Dok twero nen ka maleng ni ka jo me ot moni ginywako Lok pa Lubanga kacel, ci gibinyikke bene cok kacel pien nongo gin ducu gimaro Lubanga acel dok gimito timo mitine.

¹³ Jo munyomme gitwero timo gin ango wek gunote kacel i pako Jehovah? Ka luot aryo-ni ducu gitye lutic ma lugen bot Jehovah, ci gitwero bedo ki yomcwiny pi note ma meno kelo. Abraim ki Cara, Icaka ki Labeka, ki dong Elkana ki Anna​—gin ducu gunyuto mar bot luotgi. Wan bene omyero watute me timo meno. (Acak. 26:8; 1 Cam. 1:5, 8; 1 Pet. 3:5, 6) Meno bikelo note i kin jo ma gunyomme ki dok binyikogi cok bot Wonwa me polo.​—Kwan Latitlok 4:12.

14. Ka luoti pe tiyo pi Jehovah, ngo ma itwero timone me jingo nyomwu?

¹⁴ Lukricitayo myero pe gubed ki wat macok ki jo ma pe gitye i ada. (2 Kor. 6:14) Omegiwa ki lumegiwa ma luotgi pe Lucaden pa Jehovah kono? Jo mogo i kingi gunongo ada ma onongo dong gunyomme woko, dok luotgi pe gitye Lucaden pa Jehovah. Kadi bed kit meno, keto pwony me Baibul i tic twero konyogi me note i otgi. Man kwako note i yo mo keken, labongo ilo cinggi woko. Meno twero bedo tek adada, ento tam kong pi mot ma romo bino pi timone. Keto cik ma igi lac me Baibul i tic twero bedo tek ka ce luot mo oa woko ki i kacokke. Man otimme i kom lamego mo ma nyinge Mary. En gin ki cware, David, gubedo ka tic pi Jehovah kacel, ento lacen David ogiko cito i cokke pi cokcok mwaki 25 kulu. Mary omedde ki bedo lagen kun cito i cokke kacel ki gure madito, dok onongo keto cik me Baibul i tic i pacogi, ki bene pwonyo lutinogi abicel-li. I kare ma lutinogi guteggi ci gua woko ki gang, Mary ocako winyo calo edong kene. I ngeye David ocako kwano magajin ma Mary onongo weko ka maleng. Motmot David odwogo cen i Ot me Ker, ka ma lakware me mwaka abicel onongo gwokke kabedo. Ka David pe obino i cokke, ci lacen awobi-ni onongo wacce ni, “Abedo ka parri tin i cokke, Baba Madit.” David dong tye ka tic pi Jehovah ki yomcwiny, dok Mary iye yom adada ni gitye ka timone kacel.

15. Jo munyomme ma dong guteggi gitwero konyo jo matino ma gunyomme nining?

¹⁵ Ma lubbe ki lweny ma Catan tye ka ketone i kom jo me ot i kareni, pire tek adada ni lutic pa Lubanga ducu gunote  kacel i nyomgi. Kadi bed dong irii i nyom nyo pe, omyero itam i kom gin ma itwero wacone nyo timone wek ijing nyomwu. Jo muteggi bene gitwero konyo jo matino me kacokke ma lubbe ki lok man. Wuromo lwongo luot mo ma mwakagi pud tidi me nywako kwedwu i woro pi jo me ot. Ka jo matino gitye kacel kwedwu, ci gitwero niang ni nyuto mar ki note kacel pire tek adada bot jo munyomme kadi bed dong gurii i nyom nyo pe.​—Tito 2:3-7.

16, 17. Ngo ma lutic pa Jehovah gitye ka kurone ki mit kom?

¹⁶ Go kong cal Luicrael ma gitye ka pako Jehovah i kwer mo i ot pa Lubanga i Jerucalem. Onongo giyubbe maber pi wot meno, giparo pi miti pa ngat acel acel ka gitye ka wot, dok ginote kacel i woro Lubanga i otte. Man ducu onongo mito note. (Luka 2:41-44) Ka wamedde ki wotwa me cito i lobo manyen-ni, myero wan bene wanote kun watimo jami kacel. Man mito tute matek kare ki kare. Tika mitte ni kong itam matut i kom lok man?

¹⁷ Tam kong i kom mot ma wabinongone i anyim! Dong watyeko weko cwiny me apokapoka ki anywena nywena ma tye i lobo pa Catan-ni. Waneno cobbe pa lok ma Icaya kacel ki Mika ma guwaco ni jo pa Lubanga gitye ka wot kacel me cito i “wi got pa [Jehovah].” (Ic. 2:2-4; Kwan Mika 4:2-4.) Ki lok ada, worowa pud dong bimedde ki ille malo ya “i kare ma pud tye anyim.” Ento yomcwinywa pud dong bibedo dwong ya, ka watye ka kwo i kare ma dano ducu ginote kun gitimo jami kacel!