LOK MA I POK NGEYE | PINGO YECU ODENO CAN DOK OTO?
Tika Otimme Ada?
I kare me cwir i 33 K.M., aye kineko iye Yecu Lanajaret. Onongo kong kiloko lok goba i kome, kigoyo marac adada, ka dong kiguru i kom yat. Yecu oto ki arem malit mada. Ento Lubanga ocere woko, dok i nge nino 40, Yecu ocito i polo.
Lok man ma pire tek-ki a ki i Jiri angwen ma gitye i Ginacoya ma kicoyo i leb Grik, ma kilwongo bene ni Cik Manyen. Jami magi tika ada gutimme? Man lapeny mupore dok pire tek adada. Ka onongo pe gutimme, ci niye pa Lukricitayo onongo konye bibedo pe dok gen me kwo i lobo me Paradic onongo bibedo mere calo lek mamwa. (1 Jo Korint 15:14) Ento ki tung cel, ka jami magi gutimme ada, ci gen madit tye pi dano ducu, gen ma in bene itwero nywako iye. Dong, jami ma kicoyo i Jiri-ni tika gutimme ada kece lok goba?
GIN MA MOKO ADA PA LOK ME JIRI
Mapat ki lok aboka mamit, kitute ki diro me coyo lok ada i Jiri magi, kun kitito kikore jami mutimme. Me labolle, opong ki nying kabedo mapol ma pud kitwero limogi wa i kareni. Giloko i kom dano ma gukwo ada, dok bene lukwan lok me tekwaro gicwako lokgi.—Luka 3:1, 2, 23.
Luco lok me tekwaro me cencwari me acel ki aryo bene gucoyo lok i kom Yecu. * Kit ma kineke kwede bene orwatte ki yo ma Luroma onongo gineko kwede dano i kare meno. Medo i kom meno, lok ma gucoyo orwatte ki jami mutimme ada—kadi wa bal ma lupwonnye pa Yecu gutimo. (Matayo 26:56; Luka 22:24-26; Jon 18:10, 11) Magi ducu nyuto ka maleng ni luco Jiri gucoyo lok ada i kom Yecu dok kikore.
CER PA YECU KONO?
Kadi bed ni pol pa dano giye ni Yecu okwo i lobo dok bene oto, ento jo mogo gitye ki akalakala i kom cerre. Kadi wa lukwenane bene kong pe guye lok ma kikwongo wacone botgi ni Yecu ocer woko. (Luka 24:11) Ento akalakala weng ogik i kare ma gin kacel ki lupwonnyene mukene-ni guneno Yecu i nge cerre i kabedo mapatpat. Ki lok ada, i kare mo acel, onongo tye dano makato 500 ma gugurre kacel ma gunene.—1 Jo Korint 15:6.
Kadi bed ni onongo kitwero makogi ci kinekogi woko, lupwonnyene pud gutito pi cer pa Yecu ki tekcwiny bot jo ducu—wa bot jo ma guneke. (Tic pa Lukwena 4:1-3, 10, 19, 20; 5:27-32) Tika lupwonnye mapol kumeno onongo gitwero bedo ki tekcwiny ka onongo gitye ki akalakala mo i kom cer pa Yecu? Ki lok ada, gin mumiyo Lukricitayo me lobo ducu gucung matek i kare meno ki i kareni, aye pien cer pa Yecu otimme ada.
Lok me Jiri ma dok i kom to ki cer pa Yecu miyo ngec ducu ma mitte ma tye ada, dok ma rwatte ki lok me rekod me tekwaro ma kigwoko. Kwano Jiri magi ki diro bijingo niyeni ni jamine gutimme ada. Niyeni bene twero medde ki dongo ka iniang maber pingo jamine gutimme. Pwony ma lubo man binyamo lok meno.
^ para. 7 Laco ma nyinge Tacitus, ma kinywalo i 55 K.M., ocoyo ni “Kricito, ka ma nying Lukricitayo oa ki iye, owok ki arem malit adada pi pwod madit loyo ma kimiye i kare me loc pa Tiberius i cing laditwa mo, ma nyinge Ponto Pilato.” Jo mukene ma bene guloko i kom Yecu gubedo, Suetonius (me cencwari me acel); lakwan lok mo me tekwaro pa Lujudaya ma nyinge Josephus (me cencwari me acel); ki dong Pliny the Younger, gabuna me Bithynia (acakki me cencwari me aryo).
