Kare ma Adage Bigik Woko Matwal!
Kadi bed wajwa adage woko ki i cwinywa, pe watwero juko jo mukene ki bedo ki adegadega i kom luwotgi. Jo ma kitgi atir gideno can nono pi adegadega. Dong, anga ma twero jwayo cwiny me adegadega ducu matwal?
Lubanga Jehovah keken aye twero jwayo cwiny me adage ducu matwal. Man aye gin ma Baibul ociko ni en bitimone.—Carolok 20:22.
LUBANGA BIJWAYO JAMI DUCU MA KELO ADAGE
-
1. CATAN LARAC-CI. Catan, lamalaika ma ojemo-ni, aye oweko cwiny me adage tye i kare-ni. Lubanga bijwero Catan woko kacel ki jo ducu ma gidag luwotgi calo en.—Jabuli 37:38; Jo Roma 16:20.
-
2. LOBO MARAC PA CATAN-NI. Lubanga bijwero jami ducu ma i lobo-bi ma kelo adage, ma tye iye lutela me wibye ki lutela dini ma gicwako tim adage. Lubanga bijwero bene biacara ma cwako cwiny me maro lim, dok gikwalo dano.—2 Petero 3:13.
-
3. ROC PA DANO. Baibul tito ni dano ducu gulako bal—dong pol kare gitamo, giwinyo, nyo gitimo jami ma pe tye atir. (Jo Roma 5:12) I kin jami meno tye iye miti me nyuto cwiny me adage i kom jo mukene. Lubanga bikonyowa me kwanyo jami magi maraco-ni woko wek kijwa cwiny me adage woko matwal.—Icaya 54:13.
BAIBUL OCIKO PI LOBO MA ADAGE BIBEDO PE IYE
-
1. NGOLO KOP ALENGA BIBEDO PE. Ker pa Lubanga biloyo lobo-ni. Lalocce bibedo i polo dok bikelo ngolo kop atir pi naka. (Daniel 2:44) Cwiny me apokapoka bigik woko. Lubanga bijwayo peko ducu ma dano gitye ka limo i kare-ni.—Luka 18:7.
-
2. DANO DUCU BIBEDO KI KUC. Pe tye ngat mo ma bideno can pi tim gero nyo lweny. (Jabuli 46:9) Dano ducu me lobo-ni gibimaro kuc, dok kwo bibedo labongo peko mo keken.—Jabuli 72:7.
-
3. DANO DUCU BIBEDO NAKANAKA I PARADIC. Dano ducu me lobo gibinyuto mar me ada bot luwotgi. (Matayo 22:39) Pe tye ngat mo ma bideno can, kadi wa pi tamo nyo po i kom jami maraco. (Icaya 65:17) Ka cwiny me adage dong pe, dano ‘gibibedo ki yomcwiny pi kuc madwong ma gibilimo.’—Jabuli 37:11.
Tika imito bedo i lobo ma kit meno? Kadi kombeddi, dano mapol gitye ka pwonyo kit me lweny ki cwiny me adage kun giketo pwony me Baibul i tic. (Jabuli 37:8) Meno aye gin ma Lucaden pa Jehovah gitye ka timone i twok lobo ducu. Kadi bed ni gia ki i kaki ki tekwaro mapatpat, ento gunote kacel dok gimarre.—Icaya 2:2-4.
Lucaden pa Jehovah cwinygi bibedo yom me nywako kwedi gin ma gupwonyo i kom kit me diyo cwiny ka ce itye ka kato ki i peko me ngolo kop alenga nyo apokapoka. Gin ma ibipwonyo twero konyi me lweny ki cwiny me adage kun icako maro dano. Itwero pwonyo kit me nyuto mar kadi wa bot jo ma gipe ki pwoc nyo gidag luwotgi. Macalo adwogine, cwinyi bibedo yom i kare-ni dok watti ki jo mukene biyubbe doko maber. Ma dong pire tek loyo, ibipwonyo gin ma itwero timone wek ikwo i te Ker pa Lubanga ka ma adage ducu bigik woko matwal.—Jabuli 37:29.
Itwero Bedo ki Miti i kom Lok Man
WI LUBELE
Ngo ma Ker pa Lubanga Bitimone?
Yecu onongo ngeyo ni Ker pa Lubanga keken aye obedo gamente ma twero cobo pekki ma i lobo-ni. Gin ango ma Ker meno dong ocobo ma twero weko wabedo ki gen?
