Tika Jami Ma Itimogi Me Mato Yamo Giber?

“Wutem pwonyo gin ma yomo cwiny Rwot.”​—EP. 5:10.

1, 2. (a) I yo ango ma Lok pa Lubanga nyuto ni Jehovah mito ni wanong mit pa kwo? (b) Neno mato yamo calo “mot ma Lubanga omiyo” weko watimo ngo?

 I BAIBUL, wanongo lok mapol ma nyuto ni Jehovah mito ni wakwo kun wanongo mit pa kwo bene. Me laporre, Jabuli 104:14, 15 waco ni Jehovah miyo dano pwuro lobo wek “onong cam, ki kongo vino ma yomo cwiny dano, ki moo me wir wek wange obed ma ryeny aryenya, ki dok ocam kwon ma miye teko.” Ki lok ada, Jehovah miyo cam mapol ginyako nyiggi ma kibiyo ki moo, kiyubo kongo vino me pitowa. Ento kongo vino bene “kelo yomcwiny.” Mapat ki miyo jami ma mitte me pitowa en mediwa jami ma kelo yomcwiny. (Latit. 9:7; 10:19) Ada, Jehovah mito ni wanong mit pa kwo, ma cwinywa bene “bedo yom.”​—Tic. 14:16, 17.

² Pi meno, pe tye tyen lok mo ma omyero owek cwinywa opoti, ka kicel kicel wakwanyo kare me neno “winyo me polo” ki ‘ature me tim’ nyo nongo mit pa jami mogo ma gonyo komwa dok miyo kwowa bedo yot. (Mat. 6:26, 28; Jab. 8:3, 4) Kwo tye “mot ma Lubanga omiyo.” (Latit. 3:12, 13) Neno cawa me mato yamo calo but mot meno, bimiyo watiyo kwede i yo ma yomcwiny Ngat ma ominiwa. *

Iye Lac Dok ka ma Gik Iye Tye

3. Pingo ber me ye ni dano gutim jami mapat pat pi mato yamo?

³ Jo ma gineno mato yamo i yo mupore giye ni iye lac dok ka ma gik iye bene tye. Pingo? Me gamone, kong wapor galowang ki cam. Cam ma kimarogi mada i but lobo mapat pat pe girom. Ki lok ada, cam ma dano maro i kabedo moni romo bedo ni nongo pe mit i kabedo mukene. I yo acel-lu, gin ma Lukricitayo me but lobo moni gineno ni tye mato yamo maber adada nongo dok Lukricitayo me but lobo mukene gineno ni pe mit wacel. Kadi bed Lukricitayo me kabedo acel, pud bene gin ma ngat moni neno ni mit (nyo calo kwano buk mamit), lawote romo nenone ni waco kome; gin ma ngat moni romo nenone ni ryeyo ler (calo cito ka rwene nyo lat), lawote romo nenone ni olo kome. Dong, waye ni i lok madok i kom cam ki mato yamo, iye gire lac ma ngat man kwanyo ma yomo iye.​—Rom. 14:2-4.

4. Pingo omyero waket wangcor obed tye i kom jami ma wayero me mato yamo? Mi lapor.

⁴ Ento, wan bene wangeyo ni ye ni dano gutim jami mapat pat pi mato yamo pe te lokke ni gitwero timo gin mo keken kadi rac. Me laporre, tam kong i kom cam. Kadi bed waromo bedo ki miti me camo cam mapat pat, ento pe wacamo akaka dek mukwok. Camo dek ma kit meno nyuto mingo dok romo balo yotkomwa. I yo acel-lu,  kadi bed jami mabeco mapat pat tye ma waromo galo ki wangwa, ento wan pe watimo jami ma keto kwowa ka mading, i tim gero, nyo cilo i yo me cwiny. Timo jami ma kit meno turo cik ma igi lac me Baibul dok twero balo yotkomwa ki niyewa. Wek wabed labongo kato wangcor me jami mabeco, omyero wamok woko con ka gin me mato yamo moni ma wamaro-ni ber nyo pe. (Ep. 5:10) Watwero timo man nining?

5. Wan watero ngeyo nining ka gin ma watimo me mato yamo rwatte ki cik pa Lubanga?

⁵ Wek gin me mato yamo moni obed ber botwa kun yomo cwiny Jehovah, omyero orwatte ki cik ma kiketo i Lok pa Lubanga. (Jab. 86:11) Me moko ni gin me mato yamo moni ma imaro-ni tye kit meno, omyero kong ipeny lapeny mogo i komgi. Lapeny adek magi kiromo ketogi i nyig lok macego ni ngo, cawa mene, ki angagi. Kong wangiyogi ki acel acel.

Ngo ma Mato Yamo-ni Kwako?

6. Galowang ango ma myero wakwer, dok pingo?

⁶ Ma peya icako donyo i timo gin mo me galowang, lapeny mukwongo ma myero ipenye kwede aye, Ngo?​—nyo ni, ‘Ngo ma kodi jami me mato yamo ma amaro-ni obedo?’ Ka itye ka yenyo lagamme, omyero wi opo ni jami me galowang tye iye aryo. Me acelle-ni, wakwero ni rac; me aryone-ni, wawacci nyo gwoki. Me acel-li obedo ngo? I lobo man marac-ci, pol pa jami me galowang gupong ki tim ma turo cik ma igi lac me Baibul ka maleng. (1 Jon 5:19) Lukricitayo me ada gikwero lajwac kodi galowang ducu ma kit meno. Man kwako galowang ma tye iye bwami, tim jokjok, tim pa co nyo mon ma buto ki luwotgi, cal ki coc ma tugo miti me buto, nyo tim aranyi nyo ma tero tim maraco-gu ni gibeco. (1 Kor. 6:9, 10; kwan Niyabo 21:8.) Wanyuto bot Jehovah ni ‘wakwero gin marac’ ki kwero cito cok ki kodi galowang ma kit meno ka mo keken ma watye iye.​—Rom. 12:9; 1 Jon 1:5, 6.

7, 8. I yo ango ma wan watwero pimo kwede galowang moni? Mi lapor.

⁷ Me aryone-ni obedo kodi galowang ma cung i kom tim ma Lok pa Lubanga pe kwero atir atir. Ma peya wayero kodi galowang ma kit man, omyero kong wanen ka galowang meno rwatte ki jami ma Jehovah neno ni ber, kit ma nongo kiketo kwede i Baibul. (Car. 4:10, 11) Ci dong wamoko tamwa ma weko wabedo ma cwinywa pe ngoliwa kop. (Gal. 6:5; 1 Tem. 1:19) Waromo timo man nining? Tam i kom lok man: Ma peya wacamo dek mo ma yam peya wacamo, mukwongo kong watemo niang kodi gin ango ma kitedogi kwede. I yo acel-lu, ma peya wacako timo gin mo me mato yamo, mito kong waniang jami ma pigi tego ma tye iye.​—Ep. 5:17.

⁸ Me laporre, iromo maro tuko, meno gire nongo pe rac. Tuku romo bedo mit dok kelo yomcwiny. Ento ka in imaro tuku mogo pien pyemme gwa, keto kwo ka mading, maro kelo awano, mitte miyo lwak gidange matek, kelo cwiny me loboni, nyo “kodi” jami ma kit meno kono? I nge ngiyo jami ma tye iye, itwero moko tammi ni bibedo tek me weko tammi orwatte ki pa Jehovah kacel ki kwena me kuc ki mar ma watito pire bot dano-ni. (Ic. 61:1; Gal. 5:19-21) Kitungcel, ka gin moni-ni opong ki “kodi” tim mabeco i wang Jehovah, ci gin me mato yamo meno romo bedo ber dok gonyo komi.​—Gal. 5:22, 23; kwan Jo Pilipi 4:8.

 Cawa Mene ma Myero Amat Kwede Yamo?

9. Lagamwa nyuto gin ango pi lapeny ni, ‘I cawa mene ma abicito ka mato yamo?’

⁹ Lapeny me aryo ma myero ipenye kwede aye, I cawa mene?​—nyo ni, ‘I cawa mene ma abicito ka mato yamo? Cawa marom mene ma abicwalo iye?’ Lagamwa pi lapeny ni ngo? nyuto ka ma cwinywa tye iye​—gin ma wanongo ni ber ki ma wanongo ni rac. Ento, lagam pi lapeny ni i cawa mene? nyuto jami ma waketo bedo mukwongo​—gin ma wanongo ni pire tek ki ma konye pe. Dong i yo ango ma watwero ngeyo kwede ni kit ma watero kwede galowang moni tye mupore?

10, 11. I yo ango ma lok ma Yecu owaco i Matayo 6:33 konyowa me moko cawa ma omyero water i lok me mato yamo?

¹⁰ Yecu Kricito owaco bot jo ma lubbe ni: ‘mar Rwot Lubangani ki cwinyi ducu, ki kwoni ducu, ki tammi ducu ki tekki ducu.’ (Mar. 12:30) Pi meno, marwa pi Jehovah myero obed mukwongo. Wanyuto mar ma kit meno ki lubo lok ma Yecu owaco ni: “Kong wukwong keto cwinywu i kom kerre, ki nongo kit ma atir ma en tye kwede, ci jami magi ducu gibimedo botwu.” (Mat. 6: 33) I yo ango ma lok man konyowa me moko cawa ma myero water i lok me mato yamo?

¹¹ Niang maber ni: Yecu owaco botwa ni ‘wakwong keto cwinywa i kom kerre.’ En pe owaco botwa ni ‘wakwong keto keken cwinywa i kom kerre.’ Ngene kene ni, Yecu onongo ngeyo ni omyero waket cwinywa i kom jami mukene mapol medo i kom Ker-ri. Wamito ot, cam, bongi, kwan olo mupore, dog tic, mato yamo, ki mukene mapol. Ento, i kin jami magi ducu ma wamitogi-ni, acel keken aye tye mukwongo​—lok me Ker-ri. (1 Kor. 7:29-31) Lok man myero owek watim jami mukene ma pe gitye mukwongo calo mato yamo i yo ma pe gengowa ki timo gin ma tye mukwongo​—tiyo tic madok i kom Ker-ri. Ka watimo kit meno ci mato yamo ma pe okato kare bedo ber.

12. Cik ma iye lac ma tye i Luka 14:28 kitwero tic kwede i lok me mato yamo nining?

¹² Dong ka odok i lok kom cawa ma watero i mato yamo, omyero kong i tam wel cawa adi ma obitero. (Luka 14:28) Omyero wamok wel cawa adi ma mato yamo moni obitero. Lacen, myero wamok wel cawa ma watye kwede mupore pi gin meno. Ka timo gin me mato yamo moni miyo wakeng jami ma pigi tego calo kwano Baibul, woro pi jo me ot, wot i cokke pa Lukricitayo, nyo tito kwena me Ker-ri, ci nongo pe opore. (Mar. 8:36) Ento ka mato yamo kicel kicel miniwa kero me tiyo tic me Ker-ri, ci waromo nenone ni cawa ma watero i mato yamo moni-ni opore.

Angagi ma Wamato Yamo Kwedgi?

13. Pingo omyero watam i kom jo ma wamato yamo kwedgi?

¹³ Lapeny me adek ma omyero wapenye kwede aye, Angagi?—nyo ni, ‘Angagi ma amito mato yamo kwedgi?’ Pire tek me penyo lapeny man. Pingo? Pien jo ma wamato yamo kwedgi bene gitwero weko wanongo ber pa mato yamo moni. Kit ma camo dek pol kare mit ka itye ka cam ki luremi mabeco, timo jami me mato yamo bene mit ka itimo ki luremi mabeco. Man aye omiyo jo mapol i kinwa, tutwalle jo matino gimato yamo kacel ki luwotgi. Ento, bedo me ryeko ka wamoko con kodi jo ma wabiyero me mato yamo kwedwa ki jo ma wabikwerogi wek mato yamo obed ber.​—2 Tekwaro  19:2; kwan Carolok 13:20; Yak. 4:4.

14, 15. (a) Lanen ango ma Yecu onyuto i yero lurem matir? (b) Lapeny ango ma myero wapenye kwede i kom luremwa?

¹⁴ Bibedo me kony ka walubu lanen pa Yecu i kom yero lurem. Cakke wa i kare me cwec cito kwede anyim, Yecu omaro dano. (Car. 8:31) I kare ma tye i lobo, en onyuto ni eparo pi jo ducu. (Mat. 15:29-37) Ento, Yecu onongo ngeyo kit me poko kin bedo ki cwiny me lirem ki bedo larem macok. Ento kadi bed en onyutu cwiny me lirem bot dano ducu, en obedo larem macok bot jo ma gilubo cik keken. I kare ma Yecu tye ka lok ki lukwenane 11 ma lugen, en owacci: “Wun lurema ka wutiyo gin ducu ma acikowu.” (Jon 15:14; nen bene Jon 13:27, 30.) Jo ma Yecu oterogi calo lureme obedo jo ma gulubo en dok gutiyo pi Jehovah.

¹⁵ Pi meno, ka itye ka tamo ni myero iyer ngat moni me bedo laremi macok nyo pe, ber ka iweko wi opo i lok pa Yecu. Penye kekeni ni: ‘Ngat eni mono nyuto i lokke ki dong ticce ni elubo cik pa Jehovah gin ki Yecu? En mono kite tye ma rwatte ki cik me Baibul? Mono bedo lareme bicuko cwinya me keto pi Ker-ri mukwongo i kwona kun abedo latic ma lagen bot Jehovah?’ Ka itye labongo akalakala ni lagam me lapeny magi tye ni ee, ci dong inongo larem maber ma itwero nongo mit pa mato yamo kwede.​—Kwan Jabuli 119:63; 2 Kor. 6:14; 2 Tem. 2:22.

Mato Yamowa​—Tika Tye Mupore?

16. Ngo ma omyero wange madok i kom galowang?

¹⁶ Watyeko neno jami adek ma kubbe ki lok me mato yamo—berre, cawa ma tero, ki lurem. Wek mato yamowa obed me kony, jami adek magi ducu ki acel acel myero gurwatte ki cik me Baibul. Pi meno, ma peya wacako mato yamo, omyero kong wanen ni opore. Ka odok i lok me berre, omyero wange: ‘Ngo ma mato yamo-ni kwako? Tika ber nyo rac?’ (Car. 4:20-27) I lok ma dok i kom cawa, omyero wange: ‘Cawa marom mene ma abicwalo iye? Cawa ma acwalo iye mono opore nyo pe?’ (1 Tem. 4:8) I lok madok i kom lurem, omyero wange: ‘Angagi ma abigalo wanga kwedgi? Lureme mono giber nyo giraco?’​—Latit. 9:18; 1 Kor. 15:33.

17, 18. (a) Wan watwero niang nining ka galowangwa rwatte ki cik me Baibul? (b) Ngo ma imoko tammi me timone ka odok i lok me yero galowang?

¹⁷ Ka galowang moni pe rwatte ki cik me Baibul i gin acel i kin jami adek magi, ci nongo pe pore. Kitungcel, ka waneno ni jami ma watimo me mato yamo rwatte ki cik me Baibul i jami adek magi ducu, ci nongo mato yamowa bikelo deyo i kom Jehovah dok keliwa adwogi maber.​—Jab. 119:33-35.

¹⁸ Dong, ka odok i lok kom mato yamo, omyero watemme me timo gin maber i cawa maber ki jo maber. Wageno ni mitiwa ki acel acel bibedo me lubo tam ma Baibul miniwa ni: “Ka wucamo cam nyo ka wumato mat, nyo gin ducu ma wutiyo, wutim ducu pi miyo deyo bot Lubanga.”​—1 Kor. 10:31.

[Lok ma tye piny]

In Itwero Titone?

Ma lubbe ki mato yamo, i yo ango ma iromo tic kwede ki cik ma igi lac ma nonge i . . .

• Jo Pilipi 4:8?

• Matayo 6:33?

• Carolok 13:20?

[Peny me Kwan]

[Dayagram i pot karatac 11]

(Pi kit ma kiyubo ni onen kwede, nen buk)

✔Ngo

[Dayagram i pot karatac 12]

(Pi kit ma kiyubo ni onen kwede, nen buk)

✔Cawa mene

[Dayaram i pot karatac 14]

(Pi kit ma kiyubo ni onen kwede, nen buk)

✔Angagi

[Cal ma tye i pot karatac 12]

Wan watwero lubo lanen pa Yecu i yero luremwa ki dong jami me galowangwa nining?