Lweny Me Armagedon-ni Bibino Awene?

“Aneno lwak dano mapol ata, ma ngat mo pe romo kwano welgi, ma gua ki i rok ducu, ki i kaka ducu, ki dano ducu me wi lobo, ki leb ducu . . . gua ki i can madit atika.”​—NIYABO 7:9, 14.

Pinye dongo tye mupore me kuro lweny me Armagedon. I yo ango?

Jo ma guribbe kacel i tic pi Jehovah i lobo lung dok bene gikwo ma lubbe ki cik me Baibul dong gitye. Pien Lubanga cung i ngegi, dano milion mapol ma gia ki i rok ducu, kaki mapat pat, ki leb mapol ata-gu gitye ka note kacel macalo utmego ma gimarre. Dok note i yo me mar ma kit man tye i kin Lucaden pa Jehovah keken.​—Jon 13:35.

Odong kare manok keken ci Catan bicoko jone ci gitugo lweny malyet pud dong loyo i kom jo magi ma gibedo ki kuc dok ginen calo kwot mo keken pe me gwokogi-ni. (Ejekiel 38:8-12; Niyabo 16:13, 14, 16) Ngo ma romo konyi wek ibed ki gen i kom lok man? Baibul tittiwa jami mogo ma bitimme me konyowa wek wange awene ma lweny me Armagedon bibedo iye. Jami magi ma Baibul otito pigi-ni polgi dong gitye ka cobbe i kare-ni.

Jami ma Itye ka Neno Cobbegi

Lukwena pa Yecu gupenye kit ma dano bingeyone kwede ni “agikki piny” dong cok. (Matayo 24:3) Yecu ogamo lok meno kun nyuto botgi kare mo anyim ni, “rok bilweny ki rok wadi, ki ker bene bilweny ki ker wadi, ki kec bene bipoto i lobo, ki oyengyeng biyengo lobo i kabedo mapol.” En dok omedde ni: “Gin magi ducu gin aye acakki me te can ma bipoto i lobo.” (Matayo 24:7, 8) Lakwena Paulo olwongo en kare acel-lu ni “kare me agikki,” dok bene owaco ni “piny bibedo marac.” (2 Temceo 3:1) Tika ineno ni lok magi pa lunebi-ni gitye ka cobbe i kare-ni?

Pingo kwo bibedo tek tutwal i kare man?  Lakwena Jon miniwa lagamme. En owaco ni ‘kare tye manok’ ma Catan ki jogine kibidingo wigi i lobo kany. Kiloko i kom Catan ni tye ki “akemo madwong” en i kare-ni. (Niyabo 12:7-12) Tika ineno cwiny me akemo ki gero ma dwong tutwal i kin dano me kare-ni dok bene i wi lobo-ni lung, ento pe i kabedo acel keken-ni?

Yecu otito bene dok ni en i kare man ma kwo tek-ki, twon tic mo madit ma lapor pe kibicobo timone. En owaco ni: “Dong lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.” (Matayo 24:14) I kare-ni, i lobbe makato 235, Lucaden pa Jehovah gitye ka tito kwena maber me Ker pa Lubanga i leb makato 500 kulu. Wi lubele ki Awake! magajin ma pigi tek ma gigoyo-ni, gin aye pud dong magajin ma gikwano loyo i wi lobo-ni lung. Gutyeko bene dong gonyo Baibul i leb ma romo 100 kulu. Tic ducu ma kitimo i dul pa Jehovah jo ma gudyere adyera aye gitimo dok mot me cente ma dano gibolo ki cwinygi kengi aye kitiyo kwede. Pe itamo ni tito kwena i rwom mamalo kuman-ni tye ka cobo lok pa Yecu ma en oloko calo lanebi?

Baibul nyutu kore ki kore jami ma bitimme naka wa i lweny ma bibedo i kin Lubanga Jehovah ki lumonene. Nen kong lok ma kit meno gin adek ma ibineno ka gicobe.

Jami ma Gicok Timme, Ibineno ki Wangi

Lok pa lanebi me 1. Baibul nyutu ni jo me lobo-ni gibibedo ka rweyo ni “kuc tye, piny okwe mot.” Gibibedo ka tamo-ni dong gicok ki cobo peko madongo me lobo-ni. Ento, gin ma bitimme i nge rweyo lok meno pe bibedo gin me kuc wacel.​—1 Tecalonika 5:1-3.

Lok pa lanebi me 2. Luloc me lobo-ni gibimoko tamgi me lweny i kom dini me lobo-ni. I Baibul loc lobo kiloko i kome kun kitiyo ki lee tim; ki dong dini goba kinyutte calo dako ma tye obedo i nge lee mager (Niyabo 17:3, 15-18) Lee man ma pe tye lee kikome-ni bitimo mitti pa Lubanga labongo ngeyone ci giketo te dini ma gitimme-ni gin lutic pa Lubanga-ni wok ducu.

I ginanyuta ma onen bot lakwena Jon, en otitiwa gin ma bitimme kit man ni: “Dong tung lee apar ma ineno ca, gin kacel ki lee gibikwero dako-nu ma lakwele-ni woko; gibitenye ata kun giweke dong munero, gibicamo ringo kome ci giwango woko ki mac. Pien Lubanga aye oketo mit man i cwinygi, wek gucob tamme.”​—Niyabo 17:16, 17.

Lok pa lanebi me 3. I nge tyeko lweny i kom dini goba, Catan bicoko luloc lobo-ni i kom jo ma giworo Lubanga Jehovah.​—Niyabo 7:14; Matayo 24:21.

Man Mono Bigudi Nining?

Ka ce onongo pe ibedo ki kare me kwano Baibul matut, itwero nongo tek me ye ni jami ma kireyogi malo-ni gibitimme. Ento tye tyen lok matir ma weko myero ibed ki gen ni jami magi gibitimme dok bene i kare ma cokcok-ki anyim. Rekod me lok pa lunebi me Baibul ma dong gucobbene gimiyo wabedo ki gen. *

Pingo kong pe i kwany kare mo me neno gin mumiyo Lucaden pa Jehovah gitye ki gen ducu labongo akalakala ni “mony i nino madit pa Lubanga Won Twer Ducu” dong tye cok ki dok bene pingo pe mitte ni ilwor lweny-nyi? Wek gunywak kwede kacel gin ma Baibul waco ni myero itim me bedo i kin jo ma Lubanga gwokogi. (Niyabo 16:14) Gin ma ibipwonyone twero weko i lok neno-ni ma itye kwede i kom anyim pa wan dano.

[Lok ma tye piny]

[Boro buk i pot karatac 8]

Pe itamo ni tic pa Lucaden pa Jehovah tye ka cobo lok pa lunebi me Baibul?