NYIKKE COK BOT LUBANGA
“Wulegi, ci Gibimiyo Botwu”
“Rwot, pwonywa ki lega.” (Luka 11:1) Lapwonnye acel mo pa Yecu aye openye kuman. Macalo but lagamme, Yecu otito lapor aryo ma pwonyowa kit ma myero waleg kwede wek Lubanga owiny legawa. Ka ce dong ipenye kekeni ka Lubanga winyo legani, ci ibibedo ki miti me ngeyo lagam pa Yecu.—Kwan Luka 11:5-13.
Lapor me acel tutwalle loko i kom ngat ma lego. (Luka 11:5-8) I lapor man, laco mo ojolo welo ma obino ka limme i cwiny dyewor ento pe onongo tye ki cam mo ma myero oket i nyime. Ki bot won gang-ngi, meno mitte me oyot. Kadi bed ni cawane onongo rac, en ocito i gang pa lareme ci openyo ni kikonye ki mugati adek. I acakkine, lareme-ni onongo pe mito a malo pien en kacel ki lupacone onongo gubuto woko. Ento lajol welo-ni omedde ki penye kun dide nio ka kimiye gin ma en mito. *
Ngo ma lapor man pwonyowa i kom lega? Yecu onongo tye ka wacciwa ni omyero wadid te jami—wamedde ki lego, yenyo, ki dong dwongo. (Luka 11:9, 10) Pingo? Yecu onongo mono tye ka wacone ni Lubanga pe tye atera me gamo legawa? Pe. Yecu onongo tye ka waco ni Lubanga tye ki miti madit me gamo lega pa jo ma gitye ki niye ni en biwinyogi. Wanyuto niye ma kit meno ka walego ma pe wagik. Ka pe wailo cingwa i penyo Lubanga, ci nongo wanyuto ni wamito gin ma watye ka penyo pire-ni ki dok ni watye ki niye ni en biminiwa—ka rwatte ki gin ma en mito.—Marako 11:24; 1 Jon 5:14.
Lapor me aryo tutwalle loko i kom Jehovah, ngat ma ‘gamo lega.’ (Jabuli 65:2) Yecu openyo ni: “Anga i kinwu ma won latin, ka latinne olege ni omiye rec, ci bimiye twol ma ka rec? Nyo ka olege ni omiye tongweno, ci bimiye oton?” Lagamme ngene kene—pe tye wego mo ma lamar ma miyo lutinone jami ma wanogi. I ngeye, Yecu otito tyen lapor-ri ni: Ka wego ma dano adana dok tye ki roc “miyo mot mabeco” bot litinone, ‘ci wonwa ma tye i polo mono pe bikatogi kun miyo cwiny maleng’—mot ma pud dong ber loyo—bot lutinone ma gitye i lobo ma gilege! *—Luka 11:11-13; Matayo 7:11.
Lubanga tye ki miti madit me gamo lega pa jo ma gitye ki niye ni en biwinyogi
Lapor man pwonyowa gin ango i kom Jehovah, ma ‘lagam lega’? Yecu onongo mito ni wanen Jehovah calo Won ma lamar ma tye atera me miyo lutinone jami ma gimito. Pi meno, jo ma giworo Jehovah gitwero bedo agonya me cito bote kun gipenye gin ma tye i cwinygi. Gitwero jolo lagam me legagi kadi bed ni nongo pe gitamo ni en bigamone kumeno pien nongo gingeyo ni en timo jami maber pi ber bedogi. *
Itwero Kwano Wang Baibul Magi
^ para. 4 Lapor pa Yecu-ni obedo gin ma onongo timme ada i tekwaro. Lujudaya onongo gineno ni mini welo cam obedo gin ma pire tek adada. Lupaco acel acel onongo gitedo mugati ma romo pi nino acel, pi meno deno mugati onongo maro timme ka ce otum woko. Ki bene, ka onongo gubedo lucan, lupaco weng onongo gibuto i dye ot me kicika acel.
^ para. 6 Yecu pol kare onongo pwonyo dano kun tiyo ki lok man ni ‘mono pe bikato?’—en onongo cako ki lok ma pire pe tek tutwal ka dong bino i kom lok ma pire tek.
^ para. 7 Me medo ngecci i kom kit ma myero ileg wek Lubanga owiny legani, nen dul me 17 i buk me Baibul Mono Ada Pwonyo Gin Ango? Ma Lucaden pa Jehovah aye gugoyo.
