Betania obedo caro mo ma onongo tye mairo aryo (kilomita 3) nia ki i Jerucalem. (Jon 11:18) Can opoto kunnu cabit mogo ma peya onongo kineko Yecu. Lajaro, ma onongo laremgi tek adada gin ki Yecu-ni two omako atura ci oto woko.

I kare ma Yecu owinyo pi can man, en owaco bot lupwonnyene ni Lajaro onino woko dok ebicito ka coye. (Jon 11:11) Ento lupwonnye pa Yecu pe guniang gin ma en onongo tye ka wacone, pi meno Yecu owaco atir botgi ni: “Lajaro dong oto.”​—Jon 11:14.

I nge nino angwen ma dong yik otimme, Yecu obino i Betania wek ekwe cwiny Marita, lamin lato. Marita owaco ni, “Kono nene itye kany, kono omera pe oto.” (Jon 11:17, 21) Yecu odokke iye ni: “An nicer ki kwo; ngat ma ye an, kadi oto, dok bikwo; dano ducu makwo ma ye an, pe bito matwal.”​—Jon 11:25.

Me nyuto ni onongo etye ka loko lok ada, Yecu onyiko cok ki boro ma lyel tye iye-ni, ci odange ki dwan malongo ni: “Lajaro, katti woko!” (Jon 11:43) Lukumo gubedo ki ur i kare ma guneno ka Lajaro katti woko.

Ma peya ocero Lajaro, Yecu onongo kong ocero jo aryo. En kong ocero latin anyaka mo​—nya pa Yairo. Ma peya Yecu ocere, en bene owacci anyaka-ni onino anina.​—Luka 8:52.

Nge ni, ma lubbe ki to pa Lajaro ki nya pa Yairo, Yecu oporo to ki nino. Lapor man rwatte. Pingo? Dano ma onino nongo pe ngeyo kome dok man obedo lapor maber me nyuto yweyo ki i arem ki deno can. (Latitlok 9:5; nen bok ma wi lokke tye ni “ To Tye Calo Nino Matut.”) Lupwonnye pa Yecu i kare ca onongo giniang gin ma timme ka dano oto. Buk me Encyclopedia of Religion and Ethics waco ni: “Ki bot lulub kor Yecu, to  onongo tye calo nino, ki dok bur lyel obedo ka yweyo . . . pi jo ma gubedo lugen nio wa i to.” *

Pud dong jingo cwinywa me ngeyone ni jo muto gitye ka nino i lyel ento gipe ka deno can. Man miyo wangeyo gin ma timme i komwa ka wato dok weko pe wabedo ki lworo.

Ento, kadi bed ni wanongo mit pa nino i dyewor, anga ma mito ni enin matwal? Gen ango ma watye kwede ma lubbe ki cer pa jo muto ma gitye ka nino i lyel​—kit macalo otimme kwede i kom Lajaro ki nya pa Yairo?

Yubu openyo lapeny acel-li i kare ma en dong cok to. En openyo ni: “Ka dano dong oto, pud dok bibedo kwo?”​—Yubu 14:14.

I kare ma Yubu tye ka lok ki Lubanga Won Twer Ducu, en ogamo lapennye kekene kun wacci: “Ka lacen ibilwonga, ci abigamo dogi; pira bibedo mitti mada, pien in aye iketo an.” (Yubu 14:15) Yubu obedo ki gen ni Jehovah tye ka kuro ki miti madit nino ma Ebicero luticce ma lugen. Tika Yubu onongo tye ka geno bwoyo ngor? Pe wacel.

Nicer ma Yecu otimogi-ni moko atir ka maleng ni Lubanga omiyo Yecu twero me kwanyo to woko. Ki lok ada, Baibul waco ni Yecu tye ki “layab me to.” (Niyabo 1:18) Pi meno, Yecu biyabo dog bur lyel kit macalo en owacci kicor kidi woko ki i dog boro lyel pa Lajaro.

Baibul onwoyo teretere cikke man me nicer-ni. Lamalaika ojingo cwiny lanebi Daniel kun wacci: “I agikki me kare meno ibiywe ci ibicung i kabedo ma gipoko boti.” (Daniel 12:13) Yecu owaco bot Lucadukayo, lutela pa Lujudaya ma pe giye i cikke me nicer ni: “Wun wurwenyo, pien pe wungeyo gin ma gicoyo i ginacoya kadi wa teko pa Lubanga bene wukwiya.” (Matayo 22:23, 29) Lakwena Paulo owacci: “Pi niyena i kom Lubanga atye ki gen ni dano gibicer woko, jo ma kitgi atir wa ki jo ma kitgi pe atir.”​—Tic pa Lukwena 24:15.

Awene ma kibicero iye jo ma kitgi atir ki jo ma kitgi pe atir? Lamalaika owaco bot Daniel ni gibicere “i agikki me kare meno.” Marita bene onongo tye ki niye ni omine bicer, Lajaro “bicer i cer me nino me agikki.”​—Jon 11:24.

Baibul waco ni “kare me agikki” obedo kare me loc pa Kricito macalo kabaka me Ker pa Lubanga. Paulo bene ocoyo ni: “Pien en [Kricito] myero obedo ka loc, nio ka Lubanga biketo lukworre ducu piny i te tyene. Lakwor ma gibityeko woko me agikki en aye to.” (1 Jo Korint 15:25, 26) Man aye tyen lok acel ma pire tek mumiyo omyero waleg ni Ker pa Lubanga obin ki dok ni miti pa Lubanga otimme i lobo. *

Yubu onongo ngeyo ni Lubanga tye ki miti me cero jo muto. Ka kare meno oromo, gibityeko to woko. Pe tye ngat mo keken ma bipenye kekene ni, ‘To tika giko jami ducu?’