“Wun Cadenna”
“‘Wun cadenna’ Rwot [Jehovah] ma owaco.”—IC. 43:10.
1, 2. (a) Bedo lacaden te lokke ngo, ki dok odi poko lok angeya pe gutimo gin ango? (b) Pingo Jehovah pe jenge i kom odi poko lok angeya?
BEDO lacaden te lokke ngo? Dikconari mo acel gonyo ni: “Obedo ngat ma oneno gin mutimme, ci tito kit ma otimme kwede kikome.” Me lapore, i boma me Pietermaritzburg i lobo South Africa, gajeti akwana mo ma kilwongo ni The Witness [Lacaden] kibedo ka coyone dong pi mwaki makato 160 kulu. Nying meno rwatte pien gin mumiyo kicoyo gajeti aye me tito kore ki kore gin ma timme i lobo. Ngat ma ocako gajeti man ocikke ni karatac akwana man bitito “lok ada, pe bute keken ento lok ada ki pete tere ducu.”
2 Tye me cwercwiny ni odi poko lok angeya pe gitito gin ma tye ka timme kikome nyo bene lok ada i kom Lubanga ki gin ma en otimo. Man pe rwatte ki gin ma Lubanga won twer ducu owaco kun tiyo ki lanebi Ejekiel ni: “Rok ducu dong gibingeyo ni an aye a Rwot [Jehovah].” (Ejek. 39:7) Ento, Laloc ma Malo Twal me polo ki lobo pe jenge i kom odi poko lok angeya. Jehovah tye ki Lucaden ma romo milion aboro kulu ma gitye ka tito bot dano me rok ducu lok i kome, gin ma en otimo pi dano i kare mukato angec ki dong gin ma en tye ka timone i kareni. Lucaden magi ma gipol ata-ni gitye ka tito pi jami mabeco ma Lubanga ocikke me timo pi dano i anyim. Ka ce tic me miyo caden-ni pire bedo tek i kwowa, ci wanyuto ni wan Lucaden pa Jehovah kit ma kicoyo kwede i Icaya 43:10: “‘Wun cadenna,’ Rwot [Jehovah] ma owaco, ‘wun wubedo luticca ma an aye yam ayero.’”
3, 4. (a) Awene ma Lutino Kwan me Baibul gucako tic ki nying manyen, ki dok guwinyo nining? (Nen cal ma tye i pot karatac 19.) (b) Lapeny mene ma wabinyamogi?
3 Pud dong obedo twon mot madit atika me bedo jo ma kilwongogi ki nying Jehovah, pien en obedo “Kabaka ma loyo kare ducu,” ma owaco ni: “Man aye nyinga matwal, wubipo i koma, wun ki likwayowu ducu, kit man.”(1 Tem. 1:17; Nia 3:15; por ki Latitlok 2:16.) Lutino Kwan me Baibul gucako tic ki nying man me Lucaden pa Jehovah-ni i 1931. Ingeye, dano mapol gucoyo waraga me nyuto pwocgi pi alokaloka man. Kacokke mo acel i lobo Canada ocoyo ni: “Tic ki nying man ni ‘Lucaden pa Jehovah-ni’ pud dong oyomo cwinywa adada dok ocuko cwinywa me kwo i yo ma rwatte ki nying man.”
4 Itwero nyuto pwocci nining pi mot ma itye kwede me bedo i kin jo ma kilwongogi ki nying Lubanga? Ki bene, tika itwero tito tyen lok mumiyo Jehovah lwongowa ni Lucadenne kit ma wakwano kwede i buk pa Icaya?
LUCADEN PA LUBANGA I KARE MACON
5, 6. (a) I yo mene ma lunyodo ma gin Luicrael gubedo kwede lucaden pa Jehovah? (b) Gin ango mukene ma kiciko lunyodo me Icrael ni gutim ki dok pingo man bene pire tek pi lunyodo i kareni?
5 Laicrael acel acel i kare pa Icaya onongo tye ‘lacaden’ pa Jehovah, dok rok meno onongo tye ‘laticce.’ (Ic. 43:10) Yo acel ma lunyodo me Icrael gumiyo kwede caden aye me pwonyo lutinogi ki kit ma Lubanga otero kwede kwarigi. Me lapore, i kare ma kitye ka cikogi me kwero kwer me Kato mwaka ki mwaka, kiwaco botgi ni: “Ka litinowu gibipenyowu ni, ‘Kit tic man te lokke ango?’ ci wubiwacogi ni, ‘Man gitum me Kato (Paska) pa Rwot, pien yam okato lamalo i wi odi pa jo Icrael i Ejipt, i kare ma oneko jo Ejipt, ci obwoto odiwa.’” (Nia 12:26, 27) Lunyodo meno nen calo bene gutito ki lutinogi gin mutimme i kare ma Moses ocito ka penyo laloc me Ejipt pi tyen mukwongo ni owek Luicrael gucit ka woro Jehovah i dye tim, Parao ogamo ni: “Rwot [Jehovah] en anga, ma myero awiny doge, ci awek Icrael owot-ti?” (Nia 5:2) Lunyodo bene gutito ki lutinogi ni dano ducu guniang lagam pi lapeny pa Parao-ni i nge gemo apar mutimme i lobo Ejipt ki dong i kare ma Luicrael gubwot ki i lwet lumony me Ejipt i Nam Makwar. Jehovah i kare ca onongo tye Won Twer Ducu dok bene pud tye wa i kareni. Luicrael gudoko caden ma moko ni Jehovah obedo Lubanga me ada dok Cobo cikkene.
6 Labongo akalakala, Luicrael ma gubedo ki pwoc pi mot me bedo jo ma kilwongogi ki nying Jehovah pe gutito jami mabeco ma Jehovah otimo pigi bot lutinogi keken ento bene ki lurok ma gudoko opiigi. Pire bene onongo tek ni Luicrael gupwony lutinogi me gwoko cik pa Lubanga kun gibedo leng i yo me kwogi ducu. Jehovah owaco ni: “Myero wubed jo maleng, pien an Rwot [Jehovah] Lubangawu aleng.” (Levi 19:2; Nwo. 6:6, 7) Man pud dong obedo lanen maber adada pi lunyodo ma gin Lukricitayo i kareni, pien gin bene myero gupwony lutinogi me bedo leng i yo me kwogi ducu wek guket deyo i kom nying Lubanga mamwonya tutwal-li!—Kwan Carolok 1:8; Jo Epeco 6:4.
Waketo deyo i kom nying Jehovah ka wapwonyo lutinowa ki lok madok i kome (Nen paragraf me 5, 6)
7. (a) I kare Luicrael gubedo lugen bot Jehovah, man ogudo rok ma gurumo ka ngetgi nining? (b) Gin ango ma jo ducu ma kilwongogi ki nying Lubanga myero gutim?
7 Pi meno, Luicrael gumiyo caden mucwiny i kom nying Lubanga i kare ma gubedo lugen bote. Kiwacigi ni: “Jo ma i wi lobo ducu gibineno ka gilwongowu ki nying Rwot [Jehovah], ci gibilworowu.” (Nwo. 28:10) Ento, tye me cwercwiny ni Luicrael pe gugwoko gennegi. Kare ki kare gubedo ka woro lubange ma dano aye guyubo. Medo i kom meno, calo lubanga pa jo me Kanaan ma guworo-ni, gin gudoko jo mager, gutyero lutinogi dok bene guuno lucan. Man pud dong obedo pwony ma pire tek botwa me bedo leng i yo me kwowa kun walubo lanen pa Ngat Maleng Loyo Ducu, ma kilwongowa ki nyinge-ni!
“WUNEN GIN MANYEN MA ATYE KA TIMONE”
8. Gin ango ma Jehovah owaco ni Icaya otim, dok en odok iye nining?
8 Jehovah onongo dong owaco wacon ni ebigonyo Luicrael i yo me aura ki i opii. (Ic. 43:19) Cura abicel mukwongo i buk pa Icaya gupong ki lok me poyo wic madok i kom can ma onongo bitimme i kom Jerucalem kacel ki boma ma gurumo ka ngete. Jehovah ma en aye ngat ma ngiyo cwiny dano ducu-ni, owaco bot Icaya ni omedde ki poyo wi Luicrael kadi bed ni cwinygi onongo nwang. Icaya obedo ki ur dok onongo mito ngeyo pi kare ma rom mene ma Luicrael pe gibingut. Lubanga ogamo ni: “Nio wang ma gangi ducu igi odong nono, labongo dano mo ma bedo i igi, jo mogo ma gibedo i odi bene dong pe, lobo dong odong nono labongo gin mo kadi ki acel.”—Kwan Icaya 6:8-11.
9. (a) Lok pa lanebi Icaya madok i kom Jerucalem-mi ocobbe awene? (b) I kareni, lok me poyo wic ango ma myero waket iye cwinywa?
9 Jehovah omiyo bot Icaya tic man i mwaka me agikki me loc pa Kabaka Ujia nyo i kine ka 778 K.M.P.(Kare Man Pudi) En omedde ki tic macalo lanebi pi mwaki 46 nyo makato nio wa i 732 K.M.P., i kare me loc pa Kabaka Kejekia. Meno otimme mwaki 125 ma peya kituro Jerucalem i 607 K.M.P. Pi meno, kipoyo wi jo Icrael con ata pi gin ma onongo bitimme i komgi i anyim. I kareni bene, Jehovah omiyo jone gitye ka poyo wi dano con i kom jami ma obitimme anyim. Pi mwaki 135 dong, nicakke ki i kopi mukwongo, Wi Lubele obedo ka poyo wi dano me bedo ma wanggi twolo kun gingeyo ni loc pa Catan dong cok gik woko ci kibileyo kakare ki Mwaka Alip Acel me Loc pa Yecu Kricito.—Yabo 20:1-3, 6.
10, 11. Luicrael guneno kit ma lok pa lanebi Icaya cobbe kwede i komgi i Babilon nining?
10 Lujudaya mapol ma gin luwiny gubwot pienni gumiine icing jo Babilon i kare ma gubino ka jwero Jerucalem ci kiterogi i opii i lobo Babilon. (Jer. 27:11, 12) I nge bedo kunnu pi mwaki 70, jo pa Lubanga guneno cobbe pa lok pa lanebi ma waco ni “Rwot Lubanga pa Icrael ma larowu owaco kuman ni, ‘me larowu, abicwalo mony i kom jo Babilon; gibituro rii me dog cel woko ducu.’”—Ic. 43:14.
11 Ma lubbe ki lok pa Icaya-ni, gin mo ma oyengo lobo otimme i dyewor mo acel i acakki me Oktoba 539 K.M.P. I kare ma kabaka me Babilon kacel ki luditone me awora onongo gitye ka mato kongo ki kikopo ma kiyakogi ki i ot pa Lubanga i Jerucalem kun gipako lwak lubangagi ma guyubo ayuba-ni, lumony me Media ki Percia gudonyo ci guturo Babilon woko. I mwaka 538 nyo i 537 K.M.P., Ciro kabaka ma oturo Babilon-ni, omiyo rukca ni Lujudaya gudok i Jerucalem ka gero ot pa Lubanga. Medo i kom jami magi, lcaya bene otito wacon pi cikke pa Jehovah me miyo jami ma mitte ki dok gwoko jone ma gungut ka gitye ka dwogo cen i Jerucalem. Lubanga olwongogi ni “gin rok ma an aye acweyogi pira kena, wek guwer wer me paka.” (Ic. 43:21; 44:26-28) I kare ma jo magi ma onongo gitye i opii-ni gudwogo ci gugero ot pa Lubanga i Jerucalem, man omiyo gudoko lucaden ma gimoko ni Jehovah aye Lubanga me ada, ma cobo cikkene kare ducu.
12, 13. (a) Angagi bene ma guribbe kacel ki Luicrael i roco woro me ada? (b) Ngo ma mitte ki bot “Romi mukene[-ni]” kun nongo gikonyo ‘Luicrael me cwiny,’ dok gen ango ma gitye kwede?
12 I kare ma Luicrael gudok cen ka gero ot pa Lubanga odoco, lurok alip mapol guribbe kwedgi ka woro Jehovah, ki dok lacen, Lurok mukene mapol gulokke i dini pa Lujudaya. (Ejira 2:58, 64, 65; Esta 8:17) I kareni, “lwak dano mapol ata” ma gin aye “romi mukene” pa Yecu-ni, gimiyo cwak bot Lukricitayo ma kiwirogi ma gitye ‘Luicrael me cwiny.’ (Yabo 7:9, 10; Jon 10:16; Gal. 6:16). Lwak dano mapol ata-ni bene gitiyo ki nying man ni Lucaden pa Jehovah.
13 I Mwaka Alip Acel me Loc pa Kricito, lwak dano mapol ata-ni gibibedo ki yomcwiny madit me tito bot jo ma kicerogi kit ma onongo mwonya kwede me bedo Lacaden pa Jehovah i kare me agikki. Ento, wek wabed ki mot me timo meno, myero wakwo i yo ma rwatte ki cik pa Lubanga kun wabedo maleng i yo me kwowa ducu. Medo i kom meno, kadi bed watute nining, myero wakwa kica nino ducu pi balwa, pien wangeyo ni obedo twon mot madit ni kilwongowa ki nying Lubanga.—Kwan 1 Jon 1:8, 9.
GIN MA NYING MAN CUNG PIRE
14. Nying man ni Jehovah-ni te lokke ngo?
14 Me dongo pwocwa pi mot ma watye kwede me bedo jo ma kilwongogi ki nying Lubanga, bedo ber ka walwodo lok i kom gin ma nying man cung pire. Nying Lubanga, Jehovah, kigonyo ki i nyig lok mo me leb Ibru ma gonye ni “doko gin moni.” Pi meno, nying man me Jehovah-ni nen calo te lokke ni “En Miyo Gin Moni Timme.” Kit ma kigonyo kwede ki nying man rwatte adada ki tic pa Jehovah macalo Lacwec ma ocweyo polo ki lobo, lumalaika ki dano ki dong Ngat ma Cobo yubbe ducu. En pud tye ka miyo yubbe cobbe pien lajemo mo keken pe twero genge me cobone, kadiwa Catan.
15. Jehovah otito i yo matut gin ma nyinge cung pire nining?(Nen bok ma wi lokke tye ni “ Nying ma Te Lokke Tut Adada.”)
15 I kare ma Jehovah tye ka oro Moses ni okwany jone woko ki i Ejipt, en otito i yo matut gin ma nyinge cung pire. Baibul waco ni: “Ci Lubanga owaco ki Moses ni, ‘Atwero Doko Gin Mo Keken ma Amito.’ Ka dok owacci, ‘Wac lok man bot jo Icrael ni, “Atwero Doko aye ocwala botwu.”’” (Nia 3:14, NW) Pi meno, Jehovah twero doko gin mo keken ma iye mito wek ecob yubbe. Bot Luicrael ma onongo gitye i opii, en odoko Lalargi, Lagwokgi, Latelagi, ki dok Lami Jami Ducu ma gimito me kom ki dong i yo cwiny.
KIT MA WATWERO NYUTO KWEDE PWOCWA
16, 17. (a) Watwero nyuto pwocwa nining pi mot ma watye kwede me bedo jo ma kilwongogi ki nying Lubanga? (b) Gin ango ma wabinyamo ipwony ma lubo man?
16 I kareni, Jehovah pud tye ka medde ki timo jami i yo ma rwatte ki gin ma nyinge cung pire kun cobo mitiwa i yo me cwiny dok miniwa jami ma wamito. Ento, tyen lok me nying Lubanga pe kwako jami ma en oyero me timone keken. Man bene kwako gin ma en romo timone ma lubbe ki tic pa Lucadenne wek yubbe ocobbe. Lwodo lok i kom gin man bikonyowa me kwo i yo ma rwatte ki nyinge. Lacaden mo ma nyinge Kåre ma tye ki mwaka 84 dok obedo ka tito kwena ki mit kom pi mwaki 70 kulu i lobo Norway owaco ni, “Atero ni obedo gin ma pire tek adada me tic pi Jehovah, Kabaka ma loyo kare ducu ki dok me bedo i kin jo ma kilwongogi ki nyinge maleng-ngi. Kare ducu obedo twon mot madit adada me tito lok me ada me Baibul ki neno dano ka gijolo ki yomcwiny kun giniang iye maber. Me lapore, kela yomcwiny madit atika ka apwonyogi kit ma ginkok pa Kricito tiyo kwede, ki dok kit ma konyogi kwede me nongo kwo ma pe tum i lobo manyen me kuc ka ma kit ma atir bedo iye.”
17 Ki lok ada, i wang tic mogo tek tutwal me nongo dano ma gitye ki miti me pwonyo lok i kom Lubanga. Kadi bed kumeno, calo Kåre tika pe ibedo ki yomcwiny madit ka inongo ngat ma tye ki miti me pwonyo lok i kom nying Jehovah? Ento wan watwero bedo Lucaden pa Jehovah kun bene wabedo lucaden pa Yecu nining? Lapeny man wabinyamone ipwony ma lubo man.
