Lubanga Jehovah ocweyo lumalaika milion mapol ma peya ocweyo dano. (Yubu 38:4, 7) Lumalaika magi gitego adada dok i kine mukene Lubanga orogi wek gutir ki dok gugwok luticce ma i lobo. (Jabuli 91:10, 11) I kare-ni, lumalaika gitye ka konyo dano wek gunong adwogi maber ki i kwena maber ma lulub kor Yecu gitye ka titone.​—Kwan Niyabo 14:6, 7.

Tika omyero waleg bot Lumalaika wek gukonywa? Pe. Lega obedo woro ma myero kimi bot Lubanga keken. (Niyabo 19:10) Kit macalo lumalaika gubedo lutic pa Lubanga-ni, gin gilubo lokke ma ka winyo lok pa dano. Pi meno, omyero waleg bot Lubanga keken kun wawok ki bot Yecu.​—Kwan Jabuli 103:20, 21; Matayo 26:53.

Calo dano, lumalaika kicweyogi me bedo agonya me moko tam pigi kengi dok giromo yero me timo gin matir ki marac. Tye me cwercwiny ni lumalaika mapol gujemo i kom Lubanga. (2 Petero 2:4) Catan aye okwongo jemo; ka ingeye lumalaika mogo gulubo kore ci gudoko jogi. Ma cokcok-ki, Catan kacel ki jogine kibologi piny i ngom nia ki i polo.​—Kwan Niyabo 12:7-9.

Tim maraco kacel ki bwami ma obedo ka medde ameda nicakke i 1914 nyuto ni Lubanga cokcok-ki bityeko Catan ki jogine. I ngeye, Lubanga bicobo yub ma en onongo tye kwede pi lobo kun loko doko paradic.​—Kwan Niyabo 12:12; 21:3, 4.