1, 2. (a) Ngo ma nyuto ni kacokke ma i Kolocai onongo tye i peko madit i cencwari me acel? (b) Tira ango ma kimiyo wek okony utmege me Kolocai gucung matek?

 I CENCWARI me acel, kacokke ma i Kolocai onongo tye i peko madit! Jo mukene i kacokke onongo gitye ka kelo apokapoka kun giwaco ni myero kilub Cik ma kimiyo bot Moses. Jo mogo onongo gitye ka wacci dano pe myero gucam kwo. Me lweny ki pwony man me goba-ni, lakwena Paulo ocoyo waraga me cuko cwiny Lukricitayo me Kolocai kun cikogi ni: ‘Wugwokke wek ngat mo pe ongakwu woko ki tam me ryeko nyo me bwola mo ma tere pe, kun wulubo kit pa kwaro ki pwony me lobo, ma pe wulubo Kricito.’—Kol. 2:8.

² Ka Lukricitayo magi ma kiwirogi-ni guketo tamgi i ‘pwony me lobo,’ ci nongo gitye ka kwero mot me bedo lutino pa Jehovah. (Kol. 2:20-23) Me konyogi wek gugwok watgi ki Lubanga, Paulo ocikogi ni: ‘Wuket tamwu i kom jami ma tye malo i polo ento pe i kom jami me lobo.’ (Kol. 3:2) Ada, omegi pa Kricito omyero guket tamgi i kom gengi me nongo mot marii nakanaka ma ‘gikano pigi i polo.’—Kol. 1:4, 5.

3. (a) Gen ango ma Lukricitayo ma kiwirogi giketo iye tamgi? (b) Lapeny mene ma wabinyamo i pwony man?

 ³ I kareni, Lukricitayo ma kiwirogi bene giketo tamgi ducu i kom Ker pa Lubanga ki dok i kom gen ma gitye kwede me ‘nywako loc kacel ki Kricito.’ (Rom. 8:14-17) Ento jo ma gitye ki gen me kwo i lobo kono? Lok pa lakwena Paulo-ni konyogi nining? I yo mene ma “romi mukene[-ni]” giketo kwede tamgi i kom “jami ma tye malo i polo”? (Jon 10:16) Abraim ki Moses guketo tamgi i kom jami ma tye malo i polo kadi bed ni gin guwok ki i kwo matek. Wan watwero lubo lanengi nining?

4. Romi mukene-ni gitwero keto tamgi i kom jami ma tye malo i polo nining?

⁴ Kadi bed romi mukene-ni gipe ki gen me kwo i polo, gin bene giketo tamgi i kom jami ma tye malo i polo. Nining? Gin giketo pi Lubanga Jehovah kacel ki Kerre bedo mukwongo i kwogi. (Luka 10:25-27) Pi meno, wan walubo lanen pa Kricito. (1 Pet. 2:21) Calo utmegiwa me cencwari me acel, wan wakemme ki tam ma pe atir, tam me ryeko ma tere pe, ki dong cwiny me yenyo jami me kom i lobo pa Catan-ni. (Kwan 2 Jo Korint 10:5.) Pien walubo lanen pa Yecu, omyero wabed ma wangwa twolo wek jami ma kit magi pe gubal niyewa.

5. Watwero ngine kekenwa nining ma lubbe ki kit ma waneno kwede yenyo jami me kom?

⁵ Tika cwiny me yenyo jami me lobo-ni orwako lwite i kwowa? Me ngeyo ni wamaro gin moni, man pol kare nyutte i tamwa ki ticwa. Yecu owaco ni: “Ka ma lonyowu tye iye cwinywu bene bedo iye.” (Mat. 6:21) Me niang ka ma cwinywa tye ka terowa iye, bedo ber ka wangine kekenwa kare ki kare. Penye kekeni ni: ‘Cawa adi ma abalo me bedo ka tamo pi cente? Tika bedo ka tamo pi biacara ma kelo lim oduk, nyo bedo ki kwo mayot camo pol pa cawana? Nyo tika atute me gwoko watta ki Jehovah?’ (Mat. 6:22) Yecu owaco ni jo ma giketo cwinygi ducu i ‘kano lonyo pigi kengi i lobo’ giketo watgi ki Jehovah ka mading adada.—Mat. 6:19, 20, 24.

6. Wan watwero loyo lweny i kom roc ma watye kwede nining?

⁶ Pien wan watye ki roc, man weko bedo yot tutwal me timo jami ma pe tye atir. (Kwan Jo Roma 7:21-25.) Cwiny maleng konyowa wek pe wadony i “tic me piny macol.” Man kwako tim mogo calo ‘pati marac me yomcwiny, mero, tim abor ki tim tarwang.’ (Rom. 13:12, 13) Wek walo lweny “i kom jami me lobo”—ma gin aye jami ma cobo miti me kom—omyero waket tamwa i kom jami ma tye malo i polo. Timo man mito tute matek. Meno aye gin mumiyo lakwena Paulo owaco ni: “Acano koma, kun bene aloye calo opiina.” (1 Kor. 9:27) Labongo akalakala, wan bene omyero waket gingi i komwa kekenwa ka wamito ni wamedde i pyem ngwec me kwo! Kong wanenu gin ma co aryo ma lugen gutimo i kare macon wek ‘giyom cwiny Lubanga.’—Ibru 11:6.

7, 8. (a) Pekki ango ma Abraim gin ki Cara guwok ki iye? (b) Gin ango ma Abraim oketo iye tamme?

⁷ Abraim oye labongo dic i kare ma Jehovah owacce ni okob ki lupacone i  lobo Kanaan. Pien Abraim obedo dano ma onongo tye ki niye dok bene lawiny, Jehovah omoko gicikke kwede kun waco ni: “Abimiyi idoko rok madit, abimiyi gum bene.” (Acak. 12:2) Ento, i nge mwaki mapol, Abraim gin ki dakone Cara onongo peya gunywalo latin. Tika Jehovah wiye owil woko i kom cikkene bot Abraim? Medo i kom meno, kwo onongo tek adada i lobo Kanaan. Abraim ki lupacone guweko gangi ki wadigi i Ur, kabedo ma olony ma tye i Mecopotamia. Gin guwoto pi mairo makato 1,000 kulu (1,600 kilo mita) me o i Kanaan, ka ma gubedo iye i kema, gukanyo kec, dok kiyakogi. (Acak. 12:5, 10; 13:18; 14:10-16) Kadi bed kumeno, gin pe gubedo ki miti me dok cen i kwo mayot ma onongo tye i Ur!—Kwan Jo Ibru 11:8-12, 15.

⁸ Ma ka keto cwinye i kom “jami me lobo,” Abraim “oye lok pa Rwot [Jehovah].” (Acak. 15:6) Ada, tamme ducu obedo i kom jami ma tye malo i polo pien oketo cwinye i kom cikke pa Lubanga. Macalo adwogine, Abraim onongo adwogi maber i kare ma Lubanga Won Twer Ducu onen bote ci owacce ni: “‘Nen malo i polo, kwan wel lakalatwe, ka itwero kwano welgi.’ Dok owacce ni, ‘Kit meno wel likwayi bene bibedo rom meno.’” (Acak. 15:5) Lok man pud dong omiyo gen madit bot Abraim ya! Kare ducu ka Abraim oneno lakalatwe, man onongo poyo wiye i kom cikke ma Jehovah owacce ni likwayone binya mapol. Abraim onywalo wode kit ma Lubanga ociko kwede.—Acak. 21:1, 2.

9. I yo ma nining ma lubo lanen pa Abraim konyowa me lungo wiwa i tic pa Lubanga?

⁹ Calo Abraim, wan bene watye ka kuro me neno kit ma Lubanga bicobbe kwede cikkene. (2 Pet. 3:13) Ka pe waketo tamwa i kom jami ma tye malo i polo, ci waromo tamo ni cikke magi pe gitye ka cobbe oyot dok ticwa pi Jehovah bikwe woko. Me lapore, tika ijalo jami mogo i kare mukato angec wek iti macalo painia nyo iti pi Jehovah i yo mukene? Ka tye kumeno, ci wapwoyi tutwal. Ento i kareni kono? Wi myero opo ni Abraim oketo tamme i kom “gang ca ma tye ki gutine ducu matek.” (Ibru 11:10) En “oye Lubanga, mumiyo gikwane ni en dano ma kite atir.”—Rom. 4:3.

10. Kit kwo ango ma Moses obedo kwede i kare me bulune?

¹⁰ Laco acel ma bene oketo tamme i kom jami ma tye malo i polo aye Moses. I kare ma pud tye bulu, ‘gipwonyo en ki ryeko ducu pa Luejipt.’ Man pe obedo pwonnye me orek orek. Moses onongo bedo i ot pa Parao i kare ma Ejipt tye oteka ma loyo lobo ducu. Pien Moses okwano i rwom mamalo, man oweko en odoko “laco adada i lokke ki i ticce.” (Tic 7:22) Moses onongo tye ki kare me doko dano ma pire tek adada i Ejipt! Ento, tamme onongo tye i kom gin ma pire loyo—timo miti pa Lubanga.

11, 12. Pwonnye mene ma Moses otero calo gin ma pire tek adada, dok wangeyo nining?

¹¹ I kare ma Moses pud tidi, minne Yokobedi opwonye lok i kom Lubanga pa jo Ibru. Moses otero ngec madok i kom Jehovah calo gin ma pire tek loyo gin mo keken. En okwero bedo ki lonyo kacel ki twero wek etim miti pa Lubanga. (Kwan Jo Ibru 11:24-27.)  Ada, pwonnye ma Moses onongo i kare ma en pud tidi kacel ki niyene i kom Jehovah okonye me keto tamme i kom jami ma tye malo i polo.

¹² Moses onongo pwonnye maber loyo i kare ca, ento tika en otiyo kwede me bedo ki twero i Ejipt, nongo yweka, nyo jami me kom? Pe kumeno. Ki lok ada, Baibul waco ni en “pe oye ni myero gilwonge ni en e wod pa nya pa Parao, kun oyero me neno can kacel ki jo pa Lubanga ma ka bedo ki yomcwiny me bal ma ri pi kare manok mo keken-ni.” Ada, Moses otiyo ki pwonnye ma en onongo i yo me cwiny-nyi me cobo yub pa Jehovah.

13, 14. (a) Ngo ma okonyo Moses me bedo mupore pi tic ma Jehovah onongo obimiye? (b) Calo Moses, gin ango ma myero watim?

¹³ Moses onongo maro Jehovah kacel ki Jone. I kare ma Moses tye mwaki 40, en otamo ni dong etye atera me laro jo pa Lubanga ki i opii i lobo Ejipt. (Tic 7:23-25) Ento, onongo mitte ni Moses kong otim jami mogo ma peya Jehovah omiye tic meno. En onongo myero odong kit macalo mwolo, diyo cwiny, ki dong cwiny me jukke ken. (Car. 15:33) Onongo mitte ni Moses onong pwonnye ma weko en bedo ma oyubbe me ciro atematema kacel ki kwo matek i anyim. Mwaki 40 ma Moses obedo kwede lakwat-ti okonye me dongo kit magi.

¹⁴ Tika pwonnye man ma Moses onongo-ni okonye? Ada, okonye adada! Lok pa Lubanga waco ni Moses odoko “mwol makato dano ducu ma onongo yam gitye i wi lobo-ni.” (Wel 12:3) En odongo kit me mwolo ma okonye me diyo cwinye i kom dano mapat pat kacel ki pekkigi. (Nia 18:26) I yo acel-li wan bene myero wadong kit mogo ma bikonyowa me bwot ki i “can madit atika[-ni]” wek wadony i lobo manyen pa Lubanga ka ma kit ma atir bedo iye. (Yabo 7:14) Tika wat maber tye i kinwa ki jo ma watamo ni gikeco woko oyotoyot? Omyero walub lok ma lakwena Petero ocoyo me cuko cwiny luye luwote kun waco ni: “Wuwor dano ducu. Wumar omegiwu.”—1 Pet. 2:17.

15, 16. (a) Pingo pire tek ni waket tamwa i kom jami matir? (b) Pingo pire tek ni Lukricitayo gubed ki kit maber?

¹⁵ Watye ka kwo i kare ma ‘piny-nye rac adada.’ (2 Tem. 3:1) Pi meno, wek wabed cok ki Lubanga omyero waket tamwa i kom jami matir. (1 Tec. 5:6-9) Kong wanenu yo adek ma waromo timo kwede ki man i kwowa.

¹⁶ Kitwa: Petero onongo ngeyo ni pire tek adada me bedo ki kit maber. En owaco ni: “Wubed ki kit maber i kin jo ma pe gingeyo Lubanga, wek . . . gunen tic maber ma wutiyo, wek bene gumi deyo bot Lubanga.” (1 Pet. 2:12) Omyero watute wek kitwa maber-ri oket deyo i kom Jehovah kadi bed watye paco, i gang tic, i cukul, ka galowang, nyo i ticwa me pwony. Ada, wan ducu watimo bal pien watye ki roc. (Rom. 3:23) Ento ka wamedde ki ‘lwenyo lweny maber me niye,’ ci wabiloyo lweny i komwa ma tye ki roc-ci.—1 Tem. 6:12.

17. Wan watwero lubo cwiny ma Kricito Yecu obedo kwede-ni nining? (Nen cal ma tye i pot karatac 26.)

¹⁷ Cwiny mupore: Wek wabed ki kit maber, mitte bene ni myero wabed ki  cwiny mupore. Lakwena Paulo owaco ni: “Wubed ki cwiny ma rom ki cwiny ma yam Kricito Yecu obedo kwede-ni.” (Pil. 2:5) Kodi cwiny ango ma Yecu onongo tye kwede? En onongo mwol. Mwolo okonye me bedo ki cwiny me jalle-ken i ticce me pwony. En oketo tamme ducu i tito kwena maber me Ker pa Lubanga bot jo mukene. (Mar. 1:38; 13:10) Yecu onongo neno Lok pa Lubanga calo gin ma pire tek loyo ducu. (Jon 7:16; 8:28) En okwano Ginacoya kore ki kore wek ebed ki kero me nwoyone ki wiye, titone, ki dok cwakone. Wan bene wabitamo calo Kricito ka ce wamwol, watiyo ki mit kom i ticwa me pwony, ki dok wakwano Baibul piwa kenwa.

18. I yo mene ma pire tek ma watwero miyo kwede cwak i tic pa Jehovah?

¹⁸ Miyo cwak: Jehovah oyubo ni “gin ducu ma tye i polo ki i lobo . . . gurum conggi piny me woro nying Yecu.” (Pil. 2:9-11) Omyero walub lanen pa Yecu pien en omwolle dok otimo miti pa Wonne kadi bed ni rwomme lamal. (1 Kor. 15:28) Watwero lubone nining? Ka wamiyo cwak ki cwinywa ducu i tic ma kicikowa ni myero watim, ma en aye tic me ‘loko jo me rok ducu.’ (Mat. 28:19) Ki bene, wamito ni “watiyu gin maber bot dano ducu,” bot luwotwa ki dong utmegiwa.—Gal. 6:10.

19. Gin ango ma myero wamok tamwa me timone?

¹⁹ Pud dong cwinywa yom adada pien Jehovah poyo wiwa ni myero waket tamwa i kom jami ma tye malo i polo! Pi meno, omyero “waringu dong ngwec pyem ma tye i nyimwa, kun waciro bene peko ma tye iye.” (Ibru 12:1) Wan ducu wamoku tamwa me tic ki ‘cwinywa ducu, macalo watiyo bot Jehovah’ kun wangeyo ni Wonwa me polo biminiwa mot pi tutewa.—Kol. 3:23, 24.