1. Pingo Jehovah opore me nongo pwocwa?

 JEHOVAH, ma en aye Lami jami “ducu maber, ki mot ducu mabeco twatwal[-li],” myero me nongo pwocwa. (Yak. 1:17) Macalo Lakwat ma lamar, en miniwa jami ducu ma mitte me kom ki dong i yo me cwiny. (Jab. 23:1-3) En onyuto ni etye ‘ka-larrewa ki dok tekowa’ tutwalle i kare me peko! (Jab. 46:1) Ada, watye ki tyen lok mapol mumiyo waye ki cwinywa ducu lok ma laco jabuli ocoyo ni: “Wumi pwoc bot Rwot [Jehovah], pien en ber; Mar mere ma pe lokke bedo nakanaka!”​—Jab. 106:1.

2, 3. (a) Gin ango ma romo timme ka wape ki pwoc? (b) Lapeny mene ma wabinyamogi i pwony man?

² Pingo pire tek tutwal ni omyero wapwo Jehovah? Kit ma kitito kwede, dano i kare man me agikki-ni pe gitye ki pwoc. (2 Tem. 3:2) Pol pa dano gipe ki pwoc pi jami mabeco ma Jehovah otimo pigi. Pien wakwo i lobo ma biacara kacel ki kwena me cato wil aye doro tam pa jo mapol, man oweko dano milion mapol gitute me yenyo jami me kom madwong ma ka yeng ki jami ma gitye kwede. Kodi cwiny man bene romo gudowa. Calo Luicrael me kare ca, wan bene waromo rwenyo pwocwa kun pe watero watwa ki Jehovah kacel ki  jami ma en otimo piwa calo gin ma pire tek.​—Jab. 106:7, 11-13.

³ Medo i kom meno, nen kong gin ma romo timme ka watye i atematema magwar. I kare ma kit man, waromo bedo ki arem cwiny madwong ci pe watamo i kom mot ma watye kwede. (Jab. 116:3) Pi meno, wan watwero dongo cwiny me pwoc nining kun pe warwenyo? Ki bene, ngo ma romo konyowa me bedo ki yomcwiny kadi bed watye i atematema magwar? Kong wanenu.

4. Wan watwero medde ki bedo jo ma gitye ki pwoc nining?

⁴ Wek wadong cwiny me pwoc kun pe warwenyo, omyero wange dok walwod lok i kom mot ma wanongo ki bot Jehovah ki dok watam bene i kom ticce me mar. I kare ma laco jabuli otimo man, en obedo ki ur pi jami mapol ma Jehovah otimo pire.​—Kwan Jabuli 40:5; 107:43.

5. Pwony ango ma wanongo ki bot lakwena Paulo ma lubbe ki dongo cwiny me pwoc?

⁵ Watwero pwonyo jami mapol ki i lanen pa lakwena Paulo ma lubbe ki dongo cwiny me pwoc. Ki lok ada, en olwodo lok i kom motte, pien en kare ducu onyuto pwoc ma a ki i cwinye. Paulo onongo ngeyo ni ebedo ‘ka yeto ki dok keto ayela yela i kom Kricito.’ Pi meno, en obedo ki pwoc pien Lubanga gin ki Kricito gutimme kica dok gumiye tic me tito kwena kadi bed etimo bal i kare mukato angec. (Kwan 1 Temceo 1:12-14.) Paulo bene obedo ki pwoc matut i kom Lukricitayo luwote dok onongo pwoyo Jehovah jwijwi pi kitgi mabeco kacel ki ticgi me niye. (Pil. 1:3-5, 7; 1 Tec. 1:2, 3) Ki bene, i kare ma Paulo tye i atematema, en opwoyo Jehovah oyotoyot pi kony ma omege gumiye labongo galle. (Tic 28:15; 2 Kor. 7:5-7) ‘Wubed jo ma miyo pwoc kare ducu, kun bene wucuko cwinywu kekenwu ki wero jabuli kacel ki wer me pako Lubanga ki wer mogo mukene me dini, wuwer bot Lubanga ki pwoc i cwinywu.’​—Kol. 3:15-17.

6. Mot ango ma Jehovah omini ma itye ki pwoc iye?

⁶ Watwero lubo lanen pa Paulo nining i dongo ki dok nyuto cwiny me pwoc? Calo Paulo, wan ki acel acel omyero walwod lok i kom gin maber ma Jehovah otimo piwa. (Jab. 116:12) Ka kipenyi ni, ‘Mot ango ma Jehovah omini ma itye ki pwoc iye?’ itwero gamone ningo? Tika ibiloko i kom wat maber ma tye i kin in ki Jehovah? Onyo kica ma kitimo boti macalo adwogi me keto niyeni i kom ginkok pa Kricito? Mono ibitito nying omege ki lumege ma gukonyi adada i kare ma itye ka wok ki i atematema magwar? Ki lok ada, wang ma iloko i kom luotwu me amara nyo lutinowu bene. Ka ikwanyo kare me lwodo lok i kom mot magi mabeco ma inongo ki bot Jehovah Wonwa ma lamar-ri, ci man biweko ipwoye nino ducu.​—Kwan Jabuli 92:1, 2.

7. (a) Pingo myero wapwo Jehovah i lega? (b) Adwogi mabeco ango ma ibinongo ka imiyo pwoc i legani?

⁷ Ka watamo i kom motwa dok bene waweko bedo i cwinywa, ci wabilego bot Jehovah kun wamiye pwoc. (Jab. 95:2; 100:4, 5) Dano mapol gitero lega macalo yo me penyo pi jami ki bot Lubanga  ci otum. Baibul tye ki lega mapol ma gudo cwiny, ma man kwako pa Anna ki Kejekia. (1 Cam. 2:1-10; Ic. 38:9-20) Pi meno, lub lanen pa jo magi ma lugen ma gubedo ki cwiny me pwoc-ci. Ada, pwo Jehovah i lega pi mot mapol ma itye kwede. (1 Tec. 5:17, 18) Wanongo adwogi mabeco mapol ka watimo kumeno. Ibiwinyo agonya, marri pi Jehovah bidongo dok ibinyike cok bote.​—Yak. 4:8.

8. Ngo ma twero weko warwenyo pwoc pi jami ducu ma Jehovah otimo piwa?

⁸ Pingo omyero wagwokke ki i jami ma twero miyo warwenyo pwocwa i kom mic ma a ki bot Jehovah? Pien watye ki roc dok walako cwiny me bedo labongo pwoc. Tam kong: Lunyodowa mukwongo, Adam gin ki Kawa kiketogi i poto ma tye paradic. Jehovah ominigi jami ducu ma mitte dok onongo gitye ki gen me kwo ki kuc pi naka. (Acak. 1:28) Ento pe gubedo ki pwoc pi jami ma kiminigi. Pi cwiny me woro, gin onongo gimito jami mukene mapol. Macalo adwogine, gin gurwenyo jami ducu. (Acak. 3:6, 7, 17-19) Pien wakwo kacel ki jo ma gipe ki pwoc, man twero weko wan bene warwenyo pwoc pi jami ducu ma Jehovah otimiwa. Waromo cako tero watwa kwede calo gin me tuko. Watwero rwenyo mot ma watye kwede me ribbe kacel ki utmegiwa ma i twok lobo lung. Watwero lungo wiwa i jami me lobo man ma kicok jwerone woko-ni. (1 Jon 2:15-17) Me gwokke ki i owic meno, omyero wabed ka lwodo lok i kom mot ma Jehovah miniwa ki dok wami pwoc bote kare ducu me ye ki wan me bedo jone.​—Kwan Jabuli 27:4.

9. Pingo myero watam i kom motwa ka watye i atematema magwar?

⁹ Bedo ki cwiny me pwoc romo konyowa me lweny ki atematema magwar. Cwinywa twero tur adada ka ce kwowa olokke atura pien luotwa otimo abor, watye ki two ma keto kwowa ka mading, ka danowa me amara oto, nyo peko ma poto atura otimme. I kare ma kit meno, cwinywa kwe dok wanongo kero ka watamo i kom mot ma Jehovah ominiwa. Nen kong jami magi mutimme-ni.

10. Adwogi maber ango ma Irina onongo pien otamo i kom jami ma Jehovah otimo pire?

 ¹⁰ Irina *, ma tye painia marii dok bedo i lobo Amerika onyomme ki laelda mo ma otimo abor ci oweko en ki dong lutinogi. Ngo ma okonyo Irina me medde ki tic pi Jehovah labongo ilo cinge? En owaco ni: “Atye ki pwoc pien Jehovah paro pira. Ka atamo nino ducu i kom jami ma en otimo pira, man weko aniang ni obedo twon mot madit ka Wonwa me polo ma gwokowa-ni ngeyi dok marri. Angeyo ni en pe biweka ata.” Kadi bed jami maraco otimme i kwo pa Irina, yomcwiny ma en tye kwede pud tye ka medde ki konye dok en bene cuko cwiny jo mukene.

11. Ngo ma okonyo Kyung-sook me lweny ki two ma oketo kwone ka mading?

¹¹ Kyung-sook, ma bedo i lobo Acia gin ki cware gutiyo macalo painia pi mwaki makato 20 kulu. Ento, laminwa man kinongo ni tye ki kanca me obor nyo iuku dok kiwacce ni obikwo pi dwe adek me o i abicel. Kadi bed ni en kacel ki cware gukato ki i atematema mapol matino ki madongo, ento onongo gitye ki gen ni komgi yot. Laminwa-ni owaco ni: “Lok me yot koma-ni obalo cwinya adada. Awinyo calo iwacci arwenyo jami ducu dok abedo ki lworo madit.” Ngo ma okonyo Kyung-sook? En owaco ni: “Ma peya abuto, acito i wi otwa ci alego ki dwan malongo pi jami abic ma atye ki pwoc iye i nino meno. I ngeye, cwinya kwe ma weko anyuto marra pi Jehovah.” Adwogi maber ango ma Kyung-sook onongo ki i lega ma en obedo ka lega i dyewor-ni? En owacci: “Aniang ni Jehovah gwokowa ka watye i kwo matek dok bene watye ki mot mapol makato atematema ma wawok ki iye.”

12. Jason onongo kwe cwiny nining i nge to pa dakone?

¹² Jason, ma tiyo i jang gang kal mo acel i Afrika, orii i tic pi kare malac pi mwaki makato 30 kulu. En owaco ni: “Dakona oto mwaki abiro mukato angec, dok man pud cwero cwinya adada. Cwinya rem malit ka atamo i kom kit ma en obedo ka lweny kwede ki two kanca.” Gin ango ma okonyo Jason me diyo cwinye? En owaco ni: “I kare mo, abedo ka tamo i kom kare me yomcwiny ma onongo an ki dakona watye kacel, dok apwoyo Jehovah i lega pien wiya opo. Anongo ni atye agonya dok i ngeye acako pwoyo Jehovah kare ki kare i lega pi kare magi me yomcwiny ma wabedo kwede wan ki dakona-ni. Bedo ki pwoc okonya me cako neno jami i yo mapat. Pud cwinya cwer pi to pa dakona, ento bedo ka pwoyo Jehovah pien wabedo ki nyom maber ki dok ni atiyo pire kacel ki ngat ma marre ki cwinye ducu okonya me bedo ki neno mapat.”

13. Gin ango ma okonyo Sheryl i kare ma pol pa lugange guto woko?

¹³ I kare ma yamo kot magwar ma kilwongo ni Haiyan otimme i lobo Philippines i tum pa 2013, Sheryl ma onongo tye ki mwaka 13 keken-ni orwenyo pol pa jamine ducu. En owaco ni: “Arwenyo pacona kacel ki pol pa jo me gangwa.” Wonne, minne kacel ki omegine ki lumegine adek guto woko i yamo kot meno. Gin ango ma okonyo Sheryl me ciro can man labongo mako akemo i cwinye? En tye ki cwiny me pwoc dok wiye pud po i kom mot ma en tye kwede. “Aneno jami ducu ma omege ki lumege gutimo me kelo kony ma mitte ki  dok me cuko cwiny jo ma gimito kony. Onongo angeyo ni omege ma i twok lobo ducu gitye ka lega pira.” En medde ni: “Atye ki pwoc madit atika ni Jehovah tye Lubangana. En kare ducu miniwa jami ma wamito.” Ada, bedo ma wiwa po i kom mot ma watye kwede bikonyowa adada wek kumo pe obwowa woko. Bedo ki cwiny me pwoc bikonyowa me medde anyim kadi bed warwatte ki peko mo keken.​—Ep. 5:20; kwan Jo Pilipi 4:6, 7.

14. Gen ango ma watye kwede ma yomo cwinywa? (Nen cal ma tye i pot karatac 7.)

¹⁴ Cakke wacon, jo pa Jehovah cwinygi yom pi mot ma gitye kwede. Me labolle, i kare ma kilarogi ki i cing Parao kacel ki monnye i Nam Makwar, Luicrael gunyuto yomcwiny kun giwero wer me pak ki pwoc. (Nia 15:1-21) I kareni, i kin mot ma pigi tego ma watye kwede aye bedo ki gen ni kibilarowa ki i jami ducu ma kelo arem ki tur cwiny. (Jab. 37:9-11; Ic. 25:8; 33:24) Go kong kit ma wabiwinyo kwede ka dong Jehovah ojwero lumone weng ci ojolowa i lobo manyen me kuc ki kit ma atir. Man pud dong bibedo nino me miyo pwoc ya!​—Yabo 20:1-3; 21:3, 4.

15. Gin ango ma imoko tammi me timone i 2015?

¹⁵ Watye ka kuro mot mabeco mapol ma bia ki bot Jehovah i 2015. Ki lok ada, pud waromo rwatte ki atematema. Kadi bed gin mo keken ongolle, wangeyo ni Jehovah pe biwekowa. (Nwo. 31:8; Jab. 9:9, 10) En bimedde ki miniwa jami ducu ma mitte wek wati pire labongo ilo cingwa. Pi meno, myero dong wamedde wunu ki bedo ki kodi cwiny pa lanebi Kabakuk ma owaco ni: ‘Kadi bed yat oduro pe gituru, ki olok bene pe ginyak, dok yat jeituni bene pe twero ceko gin mo, potti ducu pe dong ceko cam, kadi bed romi ma i dwol gityekogi woko ma dyangi bene dong pe i dwol, pud abibedo ki wakke pi Rwot [Jehovah], abinyatte ki yomcwiny pi Lubanga lalarra.’ (Kab. 3:17, 18) Ada, i mwaka-ni lung, wamedde wunu ki lwodo lok ki yomcwiny i kom motwa kun walubo tira ma tye i ginacoyawa me 2015, ma wacci: “Wumi pwoc bot Rwot [Jehovah], pien en ber.”​—Jab. 106:1.