LOK MA I POK NGEYE | TIKA TWERE ME—KWO I NGE TO
Ngo ma Timme i Nge To?
“Onongo atamo ni tye kabedo adek ma dano gicito iye ka oto: polo, kapiny, nyo ka ma kilonyogi iye ka gungut. Angeyo ni meno pe apore tutwal me cito i polo nyo bene kita pe rac tutwal me cito kapiny. Pe onongo aniang atir atir gin ma kalonyo dano obedo. Pe akwano nyig lok meno i Baibul kulu. Man obedo ka gin ma dano giwaco.”—Lionel.
“Kipwonya ni dano ducu gicito i polo ka guto, ento pe onongo ayeng ki lok meno. Onongo angeyo ni to giko jami ducu—pe tye gen mo pi jo muto.”—Fernando.
Tika nino mo ipenye ni: ‘Ngo ma timme ka dano oto? Tika jowa me amara gitye ka deno can ka mo? Tika wabinenogi doki? Watwero moko lok man nining?’ Tim ber inen gin ma Ginacoya pwonyo i kom lapeny magi. Mukwongo, kong wanenu gin ma Baibul wacci to obedo. Ka dong lacen wabinyamo gen ma Lok pa Lubanga miniwa.
Jo muto gitye nining?
LAGAM MA BAIBUL MIYO: “Jo makwo gingeyo ni gibito, ento jo ma dong guto woko pe gingeyo gin mo, dok bene pe dong gitye ki bakacic ma gibilimo dok wi dano wil i komgi woko matwal. Kit gin mo keken ma inongo oye cingi me atiya, ti ki tekki; pien tic nyo tam nyo ngec nyo ryeko mo dong pe i [bur] lyel, ka ma ibecito iye-ni.” *—Latitlok 9:5, 10.
Bur lyel obedo mere ka mo ma dano gicito iye ka guto; dok cung pi kabedo mo ma ngec nyo tic pe iye. Yubu ma obedo lagen-ni oneno Bur Lyel nining? En orweny jamine kacel ki lutinone ducu nino acel keken; ka lacen Catan okelo two ma oonyo i kome ducu. En olego Lubanga ni: “Kono ikana oko i lyel me ceol, kono ber; kana kuno.” (Yubu 1:13-19; 2:7; 14:13, Baibul me leb Lango.) Ada, Yubu pe otamo ni Bur Lyel obedo kapiny, kabedo mo ma ebideno iye can malit adada ka eto. Ma ka meno, en otamo ni obedo ka ma ebiwinyo iye agonya.
Tye yo mukene ma waromo pwonyo kwede lok i kom kit ma jo muto gitye kwede. Watwero nyamo lok i kom jo aboro ma kicerogi ci kicoyo lokke i Ginacoya—Nen bok ma wi lokke tye ni “Nicer Aboro ma Kitito Pigi i Baibul.”
Pe tye ngat mo acel i kin jo aboro ma kiloko i komgi-ni ma tye i kabedo mo me yomcwiny nyo deno can. Ka jo magi ma kicerogi-ni gucito i kabedo me yomcwiny nyo deno can i nge to, ci onongo kono pe gutito pire? Dok kono onongo pe kicoyo pire wek dano ducu gukwan? Pe kicoyo lok ma kit meno i Ginacoya. Jo aboro magi pe gutito lok mo keken madok i kom gin mutimme i komgi i kare ma guto. Pingo? Pien onongo pe gingeyo gin mo keken, man bedo calo iwacci gunino anina. Ki lok ada, Baibul i kine mukene tiyo ki nino me tito gin ma to obedo. Me labolle, i kare ma Lajaro oto, Yecu owacci en onino anina.—Jon 11:11-14.
Gen ango kono dong ma jo muto gitye kwede? Tika gitwero coo ki i wang nino?
^ para. 7 Bur Lyel i leb Ibru gonye ni “Sheol” ki bene i leb Grik gonye ni “Hades.” Baibul mukene gonyo ni “kapiny,” ento lok man ni ka dano oto ci cito ka wang i kapiny-nyi pe obedo pwony me Ginacoya.
Itwero Bedo ki Miti i kom Lok Man
WI LUBELE
Lapeny ma Kigamo me Baibul
Cero dano ma Yecu ocerogi-ni nyuto nining ni en bicobo cikkene pi kare me anyim?
