Baiblo ɔ tu we euthanasia he munyu. * Se kɛ̃ ɔ, nɔ́ nɛ Baiblo ɔ de ngɛ wami kɛ gbenɔ he ɔ yeɔ bua wɔ nɛ wa náa susumi nɛ da ngɛ he. Baiblo ɔ tsɔɔ kaa e sɛ kaa waa gbe nɔ, se kɛ̃ ɔ, e tsɔɔ we kaa ke nɔ ko ngɛ gboe ɔ, e sa nɛ waa pee nɔ́ fɛɛ nɔ́ nɛ wa ma nyɛ kɛ baa e wami yi.

 Baiblo ɔ ha nɛ wa le kaa Mawu ji wa Bɔlɔ, e mi lɛ “wami tsuo jeɔ kɛ baa.” (La 36:9; Ní Tsumi 17:28) Ngɛ Mawu hɛ mi ɔ, wami he jua wa saminya. Enɛ ɔ he ɔ, Mawu sume kaa nɔ ko maa gbe nɔ, aloo e maa gbe e he. (2 Mose 20:13; 1 Yohane 3:15) Jehanɛ ɔ, Baiblo ɔ tsɔɔ kaa e sɛ nɛ waa pee níhi nɛ kɛ wa wami aloo ni kpahi a wami maa wo oslaa mi. (5 Mose 22:8) Ngɛ anɔkuale mi ɔ, Mawu suɔ kaa waa bu wami kaa nike ní nɛ he jua wa saminya.

Nɛ ke gbenɔ hiɔ fia nɔ ko hu nɛɛ?

 Ke nɔ ko ngɛ gbenɔ muɔ nya, aloo e miɔ nɛ e ma gbo po ɔ, Baiblo ɔ kplɛɛ we nɔ kaa e sa nɛ a gbe jamɛatsɛ ɔ. Nɔ́ nɛ ba Matsɛ Saul nɔ ɔ, peeɔ enɛ ɔ he nɔ hyɛmi nɔ́. Benɛ Saul plaa wawɛɛ nɛ e miɔ nɛ e ma gbo ngɛ ta mi ɔ, e de e ta hwumi ní hɛɛlɔ ɔ kaa e gbe lɛ. (1 Samuel 31:3, 4) Saul ta hwumi ní hɛɛlɔ ɔ ye gbeye, lɔ ɔ he ɔ, e gbi lɛ. Se pee se ɔ, nyumu ko ye lakpa kaa a, benɛ Saul ke a gbe lɛ ɔ, lɛ nɛ e gbe Saul ɔ nɛ. David ha nɛ a bu jamɛ a nyumu ɔ gbenɔ fɔ, ejakaa David hɛɛ Mawu susumi ngɛ sane ɔ he.​—2 Samuel 1:6-16.

Anɛ e sa nɛ ma baa ye wami yi kokooko lo?

 Ke wa ngɛ gbenɔ muɔ nya nɛ si fɔfɔɛ ɔ he nɔ́ ko be hie peemi ɔ, Baiblo ɔ tsɔɔ we kaa doo ɔ, e sa nɛ waa po wa wami ɔ he piɛ. Mohu ɔ, Baiblo ɔ tsɔɔ wɔ kaa e sa nɛ wa ná juɛmi nɛ da ngɛ wa si fɔfɔɛ ɔ he. Gbenɔ ji wa he nyɛlɔ kpanaa, nɛ lɔ ɔ ji yayami si himi nɛ wa ngɛ mi ɔ he hiɔwo. (Roma Bi 5:12; 1 Korinto Bi 15:26) E ngɛ mi kaa wa sume nɛ wa ma gbo mohu lɛɛ, se e sɛ nɛ waa ye gbenɔ gbeye hulɔ, ejakaa Mawu wo si kaa e ma tle nihi tsuo nɛ a gbo ɔ si kɛ ba wami mi. (Yohane 6:39, 40) Nɔ nɛ ngɛ bu kɛ ha wami ɔ ma hla e hiɔ ɔ he tsaba nɛ sa. Se kɛ̃ ɔ, e sɛ nɛ waa fia wa pɛɛ si kaa kokooko ɔ, ja wa baa wa wami ɔ yi ke si fɔfɔɛ ɔ he nɔ́ ko be hie peemi po.

Ke nɔ ko gbe e he ɔ, anɛ e ji yayami nɛ a kɛ be lɛ pae lo?

 Dɛbi, Baiblo ɔ tsɔɔ we kaa ke nɔ ko gbe e he ɔ, e piɛɛ yayami nɛ a kɛ pɛ ɔ he. E ngɛ mi kaa ke nɔ ko gbe e he ɔ, e ji yayami nɛ hɛdɔ ngɛ he mohu lɛɛ, * se ke nɔ ko gbe e he ɔ, Mawu pɛ nɛ le nɔ́ he je nɛ nɔ ɔ pee jã ngɛ. Eko ɔ, e ji juɛmi mi hiɔ, haomi ko nɛ nya wa, aloo fɔmi su. (La 103:13, 14) Mawu guɔ Baiblo ɔ nɔ kɛ woɔ nihi nɛ a kɛ haomi ngɛ kpee ɔ a bua. Jehanɛ ɔ hu ɔ, Baiblo ɔ tsɔɔ kaa “a ma tle nihi nɛ a da kɛ nihi nɛ a dɛ tsuo si kɛ je gbeje.” (Ní Tsumi 24:15) Enɛ ɔ tsɔɔ kaa hɛ nɔ kami ngɛ kɛ ha nihi nɛ a pee tɔmihi nɛ hɛdɔ ngɛ he, nɛ e ko ji nɔ ko nɛ maa gbe e he ɔ.