Petro Womi Enyɔne ɔ 3:1-18
3 Nihi nɛ i suɔ, enɛ ɔ ji sɛ womi enyɔne nɛ i ngɛ nyɛ ngmae, nɛ kaa bɔ nɛ e ji ngɛ kekle nɔ́ ɔ mi ɔ, i ngɛ nyɛ juɛmi nɛ nyɛɛ kɛ susuɔ níhi a he heii ɔ tsɛ̃ɛ̃e kɛ gu kaimi nɔ,
2 kaa e sa nɛ nyɛ kai munyuhi nɛ a gu gbali klɔuklɔu ɔmɛ a nɔ kɛ tu be ko nɛ be* ɔ, kɛ Nyɔmtsɛ ɔ nɛ ji Yi Wami Helɔ ɔ kita a nɛ e kɛ ha kɛ gu nyɛ bɔfo ɔmɛ a nɔ ɔ.
3 Kekleekle ɔ, nyɛɛ le enɛ ɔ, kaa ngɛ nyagbe ligbi ɔmɛ a mi ɔ, he fɛu yeli maa ba kɛ a nɔ he fɛu yemi, nɛ a maa pee níhi ngɛ mɛ nitsɛmɛ a we akɔnɔhi a nya,
4 nɛ a maa hi dee ke: “Jije e bami ɔ he si womi nɛ ɔ ngɛ? Hyɛ, kɛ je ligbi ɔ nɛ wa nɛmɛ ɔmɛ nɔ gbenɔ mahe mi ɔ, níhi tsuo ngɛ nɔ yae kaa bɔ nɛ a ngɛ kɛ je adebɔ sisije ɔ pɛpɛɛpɛ.”
5 Ejakaa a je blɔ nɛ a ma a hɛ ngɔ fɔ anɔkuale nɛ ɔ nɔ, kaa kɛ je blema lokoo ɔ, kɛ gu Mawu munyu ɔ nɔ ɔ, hiɔwe ɔ ngɛ, nɛ zugba je kpo ngɛ nyu mi kɛ ba ma si kpɛii, nɛ e ngɛ nyu kpɛti;
6 nɛ kɛ gu jamɛ a blɔ ɔmɛ a nɔ ɔ, je ɔ nɛ ngɛ jamɛ a be ɔ mi ɔ hɛ mi kpata benɛ nyu kpekpemi ba ha nɔ ɔ.
7 Se kɛ gu jamɛ a munyu ɔ nɔuu nɔ ɔ, a ngɔ hiɔwe kɛ zugba nɛ ngɛ amlɔ nɛ ɔ kɛ to kɛ ha la, nɛ a ngɔ mɛ kɛ to kɛ yaa si kojomi ligbi ɔ kɛ nimli nɛ a yi Mawu gbeye ɔmɛ a hɛ mi kpatami ligbi ɔ.
8 Se kɛ̃ ɔ, nihi nɛ i suɔ, nyɛ hɛ nɛ ko je nɔ́ nɛ ɔ nɔ, kaa ngɛ Yehowa* hɛ mi ɔ, ligbi kake ngɛ kaa jeha akpe, nɛ jeha akpe ngɛ kaa ligbi kake.
9 Pi nɛ Yehowa* ngɛ e nane si gblae ngɛ e si womi ɔ he kaa bɔ nɛ ni komɛ susuɔ ngɛ nane si gblami he ɔ, se e ngɛ e tsui si toe ha nyɛ, ejakaa e sume nɛ a kpata nɔ ko nɔ ko hɛ mi, mohu ɔ, e suɔ kaa nihi tsuo nɛ a tsake a tsui.
10 Se Yehowa* ligbi ɔ maa ba kaa bɔ nɛ julɔ baa a, lɔ ɔ mi nɛ hiɔwe ɔ kɛ huãmi* maa be kɛ ho, se sisije ní ɔmɛ nɛ a dɔ la wawɛɛ ɔ ma fɔ*, nɛ a ma je zugba a kɛ e mi ní tsumi ɔmɛ kpo.
11 Akɛnɛ ní nɛ ɔmɛ tsuo ma fɔ* ngɛ blɔ nɛ ɔ nɔ he je ɔ, nyɛ susu nimli tutuutu nɛ e sa kaa nyɛ ji ngɛ je mi bami klɔuklɔu ní peepeehi kɛ Mawu jami mi ní peepeehi a mi ɔ he,
12 be mi nɛ nyɛ ngɛ Yehowa* ligbi ɔ bami ɔ mlɛe nɛ́ nyɛ juɛmi ngɛ nɔ* wawɛɛ ɔ, lɔ ɔ nɔ nɛ a maa gu kɛ kpata hiɔwe ɔ hɛ mi ngɛ la nɛ e ngɛ tsoe gegeege mi, nɛ sisije ní ɔmɛ maa sile ngɛ la dɔmi nɛ nya wa mi!
13 Se ngɛ e si womi ɔ nya a, wa ngɛ hiɔwe ehe kɛ zugba ehe ko blɔ hyɛe, nɛ lɔ ɔmɛ a mi nɛ dami maa hi.
14 Enɛ ɔ he ɔ, nihi nɛ i suɔ, akɛnɛ wa ngɛ ní nɛ ɔmɛ mlɛe he je ɔ, nyɛɛ bɔ mɔde wawɛɛ konɛ nyagbenyagbe ɔ, e ba na nyɛ kaa nihi nɛ mu kɛ piami ko be a he ngɛ tue mi jɔmi mi.
15 Jehanɛ se hu ɔ, nyɛɛ bu wa Nyɔmtsɛ ɔ tsui si tomi ɔ kaa yi wami hemi, kaa bɔ nɛ wa nyɛminyumu Paulo, nɛ wa suɔ lɛ ɔ hu ngma nyɛ ngɛ juɛmi nɛ a ngɔ kɛ ha lɛ ɔ nya,
16 nɛ e tuɔ ní nɛ ɔmɛ a he munyu kaa bɔ nɛ e peeɔ ngɛ e sɛ womi ɔmɛ tsuo a mi ɔ. Se a mi munyu ɔmɛ ekomɛ a sisi numi yee, nɛ nihi nɛ a li nɔ́ ko* nɛ a yi mi peeɔ mɛ enyɔɔnyɔ ɔ ngɛ ní nɛ ɔmɛ kpɛ̃e, kaa bɔ nɛ a peeɔ ngɛ Ngmami ɔ mi ní kpahi hu a he, kɛ ha mɛ nitsɛmɛ a hɛ mi kpatami ɔ.
17 Enɛ ɔ he ɔ, nyɛ nihi nɛ i suɔ, akɛnɛ nyɛ ná nile nɛ ɔ momo he je ɔ, nyɛɛ hyɛ nyɛ he nɛ hi konɛ a ko gu nihi nɛ a yi mlaa nɔ ɔmɛ a tɔmi ɔ nɔ nɛ a ha nɛ nyɛɛ kɛ mɛ nɛ tla blɔ nɛ nyɛ ba je nyɛ nitsɛmɛ nyɛ si dami gbugbuugbu* ɔ mi kɛ nɔ si.
18 Ohoo, mohu ɔ, nyɛɛ ya nɔ nɛ nyɛɛ hi wae ngɛ wa Nyɔmtsɛ ɔ nɛ ji Yi Wami Helɔ Yesu Kristo he nile ɔ mi. A ngɔ hɛ mi nyami kɛ ha lɛ amlɔ nɛ ɔ kɛ yaa si ligbi ɔ nɛ be nyagbe ɔ tsuo. Amen.
Sisi Ningmahi
^ Aloo “níhi nɛ gbali klɔuklɔu ɔmɛ de to.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “pɛmi nɛ nya wa.”
^ Aloo “maa sile.”
^ Aloo “maa sile.”
^ Hyɛ Munyu Komɛ A Sisi Tsɔɔmi.
^ Aloo “ngɛ blɔ hyɛe.” Hela, “ngɛ lɛ fo woe.”
^ Aloo “tsɔɔ we mɛ ní.”
^ Aloo “kpɛii.”
