Abɛ 3:1-35
3 Ye bi, o hɛ nɛ ko je nɔ́ nɛ i ngɛ mo tsɔɔe ɔ* nɔ,Nɛ́ o ye ye mlaa amɛ a nɔ kɛ o tsui tsuo,
2 Ke o pee jã a, o wami ligbi ɔmɛKɛ o jeha amɛ maa hiɛ fuu, nɛ o ma ná tue mi jɔmi hulɔ.
3 Koo ngmɛɛ suɔmi nɛ se pui kɛ anɔkuale yemi* he.
Moo fĩ mɛ kɛ wo o kuɛ;Ngmaa mɛ kɛ fɔ o tsui nɔ;
4 Kɛkɛ ɔ, o ma ná hɛ mi nyami kɛ nɔ́ se kɔmi nitsɛnitsɛNgɛ Mawu kɛ adesa hɛ mi.
5 Ngɔɔ o hɛ kɛ fɔ Yehowa nɔ kɛ o tsui tsuo,Nɛ koo ngɔ o hɛ kɛ fɔ mo nitsɛ o nɔ́ sisi numi nɔ.*
6 Ngɛ nɔ́ fɛɛ nɔ́ mi ɔ, mo kai lɛ,Nɛ e ma ha nɛ o blɔ ɔmɛ maa da tlɔmɔɔ.
7 Koo bu o he ní lelɔ.
Moo ye Yehowa gbeye nɛ o je o he kɛ je yayami he.
8 E ma tsa mo,*Nɛ o wuhi ma ná he jɔmi.
9 Ngɔɔ o níhi nɛ a he jua wa a kɛ wo Yehowa hɛ mi nyami,Ngɔɔ o niba ní* tsuo mi kekleekle yiblii ɔ* kɛ wo e hɛ mi nyami;
10 Kɛkɛ ɔ, o nito he ɔmɛ ma hyi tɔtɔɔtɔ,Nɛ wai ma hyi o wai muɔ* ɔmɛ kɛ be nɔ.
11 Ye bi, ke Yehowa tsɔse mo ɔ, ko kua,Nɛ ke e kã o hɛ mi ɔ, ko kua,
12 Ejakaa nihi nɛ Yehowa suɔ ɔ, mɛ lɛ e kãa a hɛ mi,Kaa bɔ nɛ tsɛ peeɔ e bi* nɛ e bua jɔ e he ɔ.
13 Nɔ nɛ e náa juɛmi,Kɛ nɔ nɛ e náa nɔ́ se kɔmi ɔ ngɛ bua jɔmi;
14 Ke o ná a, e hi pe sika hiɔ,Nɛ ke o nine su nɔ ɔ,* e hi pe sika tsu.
15 E he jua wa pe kora tɛ;*Nɔ́ ko be nɛ o suɔ wawɛɛ nɛ a kɛ ma nyɛ maa to he.
16 Wami se kɛmi ngɛ e hiɔ nine mi;Ní nami kɛ hɛ mi nyami ngɛ e muɔ nine mi.
17 E blɔ ɔmɛ ngɛ fɛu,Nɛ e blɔ ɔmɛ tsuo ɔ, tue mi jɔmi sɔuu.
18 E ji wami tso kɛ ha nihi nɛ a pɛtɛɛ he ɔ,Nɛ a ma tsɛ nihi nɛ a pɛtɛɛ he wawɛɛ ɔ ke bua jɔmi.
19 Nile lɛ Yehowa kɛ to zugba a sisi.
Nɔ́ se kɔmi lɛ e kɛ ngɔ hiɔwe ɔ kɛ ma si kpɛii.
20 E nile ɔ lɛ e kɛ gba nyuhi nɛ a mi kuɔ ɔ mi,Nɛ e ha nɛ bɔ́ nɛ kɛ je hiɔwe bɔku ɔ mi.
21 Ye bi, ko je o hɛ ngɛ a* nɔ.
Moo bu juɛmi kɛ nyɛmi nɛ a kɛ susuɔ nɔ́ he ɔ he;
22 A ma ha mo* wami,Nɛ a maa pee he dlami nɔ́ ngɛ o kuɛ;
23 Kɛkɛ ɔ, o maa nyɛɛ o blɔ ɔ nɔ slɔkee,Nɛ o nane be nɔ́ tɛe* kɔkɔɔkɔ.
24 Ke o hwɔ si ɔ, o be gbeye yee;O maa hwɔ si, nɛ o mahe maa ngɔ ha mo.
25 O be haomi gbeyegbeye nɛ maa ba yiwutsotsɛmɛ a nɔ tlukaa,Aloo kɔɔhiɔ nɛ nya wa nɛ ma a nɔ ɔ gbeye yee.
26 Ejakaa Yehowa nɔ lɛ o kɛ o hɛ maa fɔ;E be hae nɛ o nane nɛ du klama.
27 Nihi nɛ e sa kaa o pee mɛ kpakpa a,* ko ma o hɛ kɛ fɔ kpakpa nɛ e sa kaa o pee mɛ ɔ nɔKe e ngɛ o he wami mi kaa o maa ye bua mɛ.
28 Ko de o nyɛmi ke, “Yaa; moo ba hwɔɔ nɛ ma ha mo,”
Ke o ma nyɛ ma ha lɛ nɔuu.
29 Koo to o nyɛmi nɔmlɔ he ga yayaBe mi nɛ e he mo ye.*
30 O kɛ nɔ ko nɛ ko pɛKe e pee we mo nɔ́ yayami ko.
31 O hɛ nɛ ko kɔ̃ basabasa peelɔ nɔ,Nɛ e ní peepee ɔmɛ hu koo kase ekoeko,
32 Ejakaa Yehowa hiɔ nɔ nɛ sisiɔ nɔ,Se dali lɛɛ e kɛ mɛ nuɔ huɛ gbagbanii.
33 Yehowa gbiɛmi ngɛ yiwutsotsɛ we nɔ,Se e jɔɔmi ngɛ dali a we nɔ.
34 Ejakaa e muɔɔ he fɛu yeli,Se e naa nihi nɛ a he jɔ ɔ mɔbɔ.
35 Juɛmitsɛmɛ ma ná hɛ mi nyami,Se kuasiahi lɛɛ nɔ́ nɛ ngɔɔ hɛ mi si puemi kɛ baa lɛ a bua jɔ he.
Sisi Ningmahi
^ Aloo “o hɛ nɛ ko je ye mlaa a.”
^ Aloo “kɛ anɔkuale.”
^ Ngɛ Hebri gbi mi ɔ, “Nɛ ko kpasa mo nitsɛ o nɔ́ sisi numi.”
^ Ngɛ Hebri gbi mi ɔ, “E ma tsa o langmɔ.”
^ Aloo “Kɛ níhi nɛ o ná a.”
^ Aloo “o niba ní tsuo mi nɔ́ nɛ hi pe kulaa a.”
^ Aloo “o wai ngami he.”
^ Ngɛ Hebri gbi mi ɔ, “binyumu.”
^ Aloo “ke o nine su nɔ kaa se nami ɔ.”
^ E ngɛ heii kaa e kɔɔ Mawu suhi nɛ a wo ta ngɛ kukuhi nɛ sɛ hlami ɔ mi ɔ a he.
^ Aloo “o klaa.”
^ Aloo “be tɔ̃tɔ̃e.”
^ Aloo “Nihi nɛ o hɛɛ mɛ kpakpa peemi he hiɔ ɔ.”
^ Ngɛ Hebri gbi mi ɔ, “e susu kaa e ngɛ slɔkee ngɛ o ngɔ.”
