La 36:1-12
Kɛ ha la nɔ hyɛlɔ ɔ. Yehowa sɔmɔlɔ David la.
36 Nɔ́ yayami kudɔɔ yiwutsotsɛ tsui;Mawu gbeye yemi be e mi.*
2 Ejakaa e buɔ e he kaa e he hia tsɔ̃,Nɛ e nɛ e tɔmi ɔ nɛ́ e ma kpa jã peemi.
3 E nya mi munyu yeɔ nɔ awi nɛ e sisiɔ nɔ;E kɔ we nɔ́ se konɛ e maa pee nɔ́ kpakpa.
4 E sa mi po e toɔ ga yaya.
E nyɛɛɔ ngɛ blɔ nɛ hí nɔ;E kua we nɔ́ yayami.
5 Oo Yehowa, o suɔmi nɛ se pui ɔ ya su hiɔwe tɔɔ,O we anɔkuale yemi ɔ su bɔku ɔ mi.
6 O dami ɔ ngɛ kaa yoku gojogojoohi;*O kojomi ɔmɛ ngɛ kaa nyu babauu nɛ mi kuɔ.
Oo Yehowa, o baa adesahi kɛ lohwehi a yi.*
7 Oo Mawu, hyɛ bɔ nɛ o suɔmi nɛ se pui ɔ he jua wa ha!
O pɛli hɔ̃ ɔ sisi nɛ nimli a bimɛ saa we ngɛ.
8 A nuɔ o we ɔ mi ní kpakpahi babauu* ɔ nɛ a tɔɔ,Nɛ o haa nɛ a nuɔ o bua jɔmi nɛ beɔ kaa pa a.
9 O ngɔ lɛ wami jeɔ;O la a lɛ haa nɛ wa naa la.
10 Yaa nɔ nɛ o je o suɔmi nɛ se pui ɔ kpo kɛ tsɔɔ nihi nɛ a le mo ɔ,Nɛ o je o dami ɔ kpo kɛ tsɔɔ nihi nɛ a da ngɛ a tsui mi ɔ.
11 Ko ha nɛ he nɔ woli a nane nɛ naa ye nɔ,Aloo yiwutsotsɛmɛ a nine nɛ fiee mi kɛ ho.
12 Lejɛ ɔ nɛ yayami peeli ɔmɛ nɔ si ngɛ;A tsɛ̃ mɛ kɛ ko si nɛ a be nyɛe maa te si hu.
Sisi Ningmahi
^ Ngɛ Hebri gbi mi ɔ, “be e hɛ mi.”
^ Ngɛ Hebri gbi mi ɔ, “kaa Mawu yokuhi.”
^ Aloo “O he adesahi kɛ lohwehi a yi wami.”
^ Ngɛ Hebri gbi mi ɔ, “A nuɔ zɔ nɛ ngɛ o we ɔ mi.”
