La 83:1-18
La nɛ Asaf po.
83 Oo Mawu, koo pee dii;Oo Hiɔwe No, koo pee kɔ̃* nɛ koo da si dii nɛ o hi hyɛe.
2 Ejakaa hyɛ! o he nyɛli ɔmɛ ngɛ hoo pee;Nihi nɛ a nyɛɔ mo ɔ ngɛ a he nɔ woe.*
3 A kɛ hɛ mi tɛmi toɔ ga kɛ woɔ o we bi ɔmɛ ngɛ laami mi;A soɔ kɛ woɔ o nihi nɛ a he jua wa kɛ ha mo ɔ* a he.
4 A deɔ ke: “Ba nɛ wa kpata ma a hɛ mi,Konɛ a ko kai Israel biɛ hu.”
5 A peeɔ kake kɛ toɔ ga;*A so* kɛ wo o he.
6 Mɛ ji Edombi kɛ Ishmaelbi, Moab kɛ Hagribi,
7 Gebalbi kɛ Ammonbi kɛ Amalekbi.Jehanɛ ɔ se hu, Filistiabi kɛ nihi nɛ a ngɛ Tiro ɔ.
8 Asiria hu ya piɛɛ a he;A yeɔ kɛ buaa Lot sisi bimɛ ɔmɛ.* (Sela)
9 Moo pee mɛ kaa bɔ nɛ o pee Midian ɔ,Kaa bɔ nɛ o pee Sisera kɛ Yabin ngɛ Kishon pa a* he ɔ.
10 A kpata a hɛ mi ngɛ Endor;A plɛ pee kuku ngɛ zugba a nɔ.
11 Ha nɛ a we odehe ɔmɛ nɛ a pee kaa Oreb kɛ ZeebNɛ́ a ma nikɔtɔma amɛ* nɛ a pee kaa Zeba kɛ Zalmuna,
12 Ejakaa a de ke: “Ha nɛ wa ya ngɔ zugba a nɛ Mawu ngɛ nɔ ɔ.”
13 Oo ye Mawu, ha nɛ a pee kaa nga gbigbli nɛ kɔɔhiɔ muɔɔ kɛ yaa,Kaa nga* nɛ kɔɔhiɔ ngɛ lɛ fiae kɛ ngɛ yae kɛ ngɛ bae.
14 Kaa bɔ nɛ la sãã hue tso ɔ,Kaa bɔ nɛ la lilɛ sãã yokuhi ɔ,
15 Jã kɛ̃ nɛ ó ngɔ o kɔɔhiɔ nɛ nya wa wawɛɛ ɔ kɛ fiee a se,Nɛ́ o ngɔ o kɔɔhiɔ nɛ nya wa a kɛ wo a he gbeye.
16 Ha nɛ a hɛ mi nɛ pue si,*Konɛ a hla o biɛ ɔ se blɔ, Oo Yehowa.
17 Zo nɛ gbe mɛ nɛ a ye gbeye kɛ ya neneene;A hɛ mi nɛ pue si, nɛ a hɛ mi nɛ kpata;
18 Ha nɛ nihi nɛ́ a le kaa mo nɛ o biɛ ji Yehowa a,Mo pɛ ji Nɔ Nɛ E Nɔ Kuɔ Pe Kulaa ngɛ zugba a nɔ tsuo.
Sisi Ningmahi
^ Aloo “koo pee mumui.”
^ Aloo “ngɛ a yi nɔ woe.”
^ Ngɛ Hebri gbi mi ɔ, “o nihi nɛ o ngɔ mɛ kɛ laa a.”
^ Ngɛ Hebri gbi mi ɔ, “A peeɔ a tsui kake kɛ toɔ ga.”
^ Aloo “A so somi ko.”
^ Ngɛ Hebri gbi mi ɔ, “A ba pee Lot binyumu ɔmɛ a kɔni.”
^ Aloo “dɔ ɔ.”
^ Aloo “a hɛ mi nyɛɛli ɔmɛ.”
^ Nga nɛ a ngɛ tsɔɔe ngɛ hiɛ ɔ ji hwiit kɛ blɛfo kɛ a henɔ ɔmɛ a tsohi nɛ a poo nɛ e piɛ ngɛ ngmɔ ɔ nɔ.
^ Ngɛ Hebri gbi mi ɔ, “Ha nɛ hɛ mi si puemi nɛ ha a hɛ mi.”
