Luka Sane Kpakpa a 14:1-35
14 Be kpa ko hu ngɛ He Jɔɔmi ligbi ko nɔ ɔ, e ya ye ní ngɛ Farisi bi ɔmɛ a hɛ mi nyɛɛli ɔmɛ a ti nɔ kake we mi, nɛ a ngɛ lɛ hyɛe totooto.
2 Nɛ hyɛ! nyumu ko ngɛ e hɛ mi nɛ e nɔmlɔ tso ɔ tsuo fuufuu.*
3 Enɛ ɔ he ɔ, Yesu bi nihi nɛ a le Mlaa a saminya a kɛ Farisi bi ɔmɛ ke: “Anɛ mlaa ngmɛɛ blɔ kaa a tsaa nɔ ngɛ He Jɔɔmi Ligbi ɔ nɔ aloo mlaa ngmɛ́ blɔ?”
4 Se a pui e nya mi. Kɛkɛ nɛ e pɛtɛ nyumu ɔ he nɛ e tsa lɛ, nɛ e wo lɛ blɔ kɛ ho.
5 Nɛ e de mɛ ke: “Nyɛ ti mɛnɔ nɛ ke e binyumu aloo e na ku ya nɔ vu mi ngɛ He Jɔɔmi ligbi nɔ ɔ, e kɛ oya yemi ya be lɛ jee?”
6 Nɛ a nyɛ we nɛ a ha lɛ heto.
7 Lɔ ɔ se ɔ, benɛ e to he hɛ kaa nihi nɛ a fɔ mɛ nine kɛ ba a ngɛ nikɔtɔmahi a sihi he hlae kɛ ha a he ɔ, e kɛ nɔ́ he tomi nɔ́ ko tsu ní. E de mɛ ke:
8 “Ke nɔ ko fɔ mo nine kɛ ya yo kpeemi okplɔɔ ngmɛmi ko sisi ɔ, mo ko ya hi si ngɛ nikɔtɔmahi a sihi he ɔ. Eko ɔ, a fɔ nɔ ko hu nine nɛ lɛɛ e hɛ mi ngɛ nyami pe mo.
9 Kɛkɛ ɔ, nɔ nɛ e fɔ nyɛ ni enyɔ ɔmɛ tsuo nine ɔ maa ba nɛ e ma ba de mo ke, ‘Tee si nɛ nɔ nɛ ɔ nɛ e ba hi si.’ Ke e ba jã a, o kɛ zo nɛ ma ya hi si ngɛ he nɛ e ba si pe kulaa a.
10 Se ke a fɔ mo nine ɔ, yaa nɛ o ya hi si ngɛ he nɛ e ba si pe kulaa a konɛ ke nɔ nɛ e fɔ mo nine ɔ ba a, e ba de mo ke: ‘Huɛ, kuɔɔ kɛ ya hiɔwe ɔ.’ Ke e ba jã a, o hɛ mi maa ba nyami ngɛ nihi nɛ a fɔ o kɛ mɛ nine ɔmɛ a hɛ mi.
11 Ejakaa nɔ fɛɛ nɔ nɛ e woɔ e he nɔ ɔ, a maa ba lɛ si, nɛ nɔ fɛɛ nɔ nɛ e baa e he si ɔ, a ma wo e nɔ.”
12 Lɔ ɔ se ɔ, e de nyumu ɔ nɛ e fɔ lɛ nine ɔ ke: “Ke o ngmɛ okplɔɔ aloo o tsɛ nihi gbɔkuɛ ní yemi ɔ, ko tsɛ o huɛmɛ, aloo o nyɛmimɛ, aloo o weku li, aloo niatsɛmɛ nɛ a ngɛ nyɛ kpɔ ɔ mi ɔ. Ke o pee jã a, eko ɔ, mɛ hu a maa fɔ mo nine, kɛkɛ ɔ, e ngɛ kaa nɔ́ nɛ a to mo nane mi.
13 Se ke o ngmɛ okplɔɔ ɔ, fɔ ohiatsɛmɛ, libɔɔhi, glɔtsɛmɛ, kɛ hɛ yuyuili nine;
14 nɛ o bua maa jɔ, ejakaa a be nɔ́ ko nɛ a kɛ maa to mo nane mi. Nɛ ngɛ dali a si tlemi ɔ mi ɔ, a maa to mo nane mi.”
15 Benɛ nihi nɛ a fɔ mɛ nine ɔmɛ a ti nɔ kake nu ní nɛ ɔmɛ ɔ, e de ke: “Nɔ nɛ e yeɔ ní* ngɛ Mawu Matsɛ Yemi ɔ mi ɔ ngɛ bua jɔmi.”
16 Yesu de lɛ ke: “Nyumu ko ngɛ gbɔkuɛ okplɔɔ ngua ko ngmɛe, nɛ e fɔ nihi fuu nine.
17 Benɛ gbɔkuɛ ní ɔ yemi be su ɔ, e tsɔ e nyɔguɛ ɔ kaa e ya de nihi nɛ e fɔ mɛ nine ɔ ke, ‘Nyɛɛ ba, ejakaa i gbe nɔ́ fɛɛ nɔ́ nya.’
18 Se mɛ tsuo a ngɔ níhi kɛ bɔni a nya jemi. Kekleekle nɔ ɔ de ke, ‘I ya he zugba ko nɛ e he hia nɛ ma ya nɛ ma ya hyɛ; i kpa mo pɛɛ, i be nyɛe nɛ ma ba.’
19 Nɔ kpa hu de ke, ‘I ya he na blablɛ enuɔ nɛ i yaa nɛ ma ya hyɛ mɛ; i kpa mo pɛɛ, i be nyɛe nɛ ma ba.’
20 Nɔ kpa ko hu de ke, ‘Piɔ pɛ nɛ i ya kpee yo, nɛ enɛ ɔ he ɔ, i be nyɛe nɛ ma ba.’
21 Lɔ ɔ he ɔ, nyɔguɛ ɔ ba nɛ e ba bɔ e nyɔmtsɛ ɔ ní nɛ ɔmɛ. Kɛkɛ nɛ nyɔmtsɛ ɔ ngɛ we ɔ mi ɔ mi mi fu nɛ e de e nyɔguɛ ɔ ke, ‘Yaa ma a mi blɔ ngua amɛ kɛ blɔ tsɔwitsɔwi ɔmɛ a nɔ esɔesɔ, nɛ o ya ngɔ ohiatsɛmɛ, libɔɔhi, hɛ yuyuili, kɛ glɔtsɛmɛ kɛ ba.’
22 Pee se ɔ, nyɔguɛ ɔ de ke, ‘Nyɔmtsɛ, a tsu o fami ɔ he ní, se loloolo ɔ, blɔ ngɛ.’
23 Lɔ ɔ he ɔ, nyɔmtsɛ ɔ de nyɔguɛ ɔ ke, ‘Jee kpo kɛ ya gbɛjegbɛ ɔmɛ kɛ blɔ ɔmɛ a nɔ, nɛ o ya nyɛ a nɔ nɛ a ba, konɛ ye we ɔ mi nɛ hyi.
24 I ngɛ nyɛ dee ke, jamɛ a nimli ɔmɛ nɛ i fɔ mɛ nine ɔ, ye gbɔkuɛ niye ní ɔ be a ti nɔ ko nɔ ko nya sae.’”
25 Jehanɛ ɔ, asafo kuu nguahi piɛɛ e he kɛ ngɛ blɔ hiae, nɛ e plɛ e he nɛ e de mɛ ke:
26 “Ke nɔ ko ba ye ngɔ nɛ e nyɛ́* e tsɛ, kɛ e nyɛ, kɛ e yo, kɛ e bimɛ, kɛ e nyɛmimɛ nyumuhi, kɛ e nyɛmimɛ yihi, ee, kɛ lɛ nitsɛ e wami* po ɔ, e be nyɛe maa pee ye kaselɔ.
27 Nɔ fɛɛ nɔ nɛ e wo we e sɛumi tso* kɛ nyɛɛ we ye se ɔ, e be nyɛe maa pee ye kaselɔ.
28 Kaa nɔ hyɛmi nɔ́ ɔ, nyɛ ti mɛnɔ lɛ ke e ngɛ hlae maa ma mɔ ɔ, kekleekle ɔ, e be si hie nɛ e maa bu nya nɛ e maa hyɛ kaa e ngɛ ní bɔ nɛ sa nɛ maa su nya gbemi lo?
29 Ke e pee we jã a, eko ɔ, e maa to sisi, se e be nyɛe maa gbe nya, nɛ nihi tsuo nɛ a maa na a ma bɔni e he fɛu yemi,
30 nɛ a maa hi dee ke: ‘Nyumu nɛ ɔ je tsu mami sisi, se e nyɛ we nɛ e gbe nya.’
31 Aloo matsɛ te nɛ lɛ ke e ngɛ ta buli 10,000 nɛ e kɛ matsɛ kpa nɛ lɛɛ e ngɛ ta buli 20,000 yaa hwu ta a, nɛ e be si hie nɛ e ma bi ga womi kaa e ma nyɛ lɛ lo?
32 Ngɛ anɔkuale mi ɔ, ke e na kaa e be lɛ nyɛe ɔ, lɛɛ be mi nɛ nɔ ɔ ngɛ tsitsaa a, e maa tsɔ e nane mi dali konɛ a ya nɛ a ya nu e nane.
33 Jã kɛ̃ nɛ nyɛ ná nɔ mi mami kaa ke nyɛ ti nɔ ko ngmɛɛ we níhi tsuo nɛ e ngɛ ɔmɛ a he* ɔ, e be nyɛe maa pee ye kaselɔ.
34 Atsinyɛ jemi ko be he kaa ngo hi. Se ke ngo nya nyu gbo ɔ, mɛni a kɛ ma ha nɛ e doo ekohu?
35 A be nyɛe maa ngɔ kɛ pee zu aloo kuku zu. Nihi tsɛ̃ɔ ngɔ pueɔ he. Ha nɔ nɛ e ngɛ tue nɛ e kɛ maa bu tue ɔ, nɛ e bu tue.”
Sisi Ningmahi
^ Aloo “edema ngɛ e he,” hiɔ ko nɛ haa nɛ nɔ hyiɔ.
^ Hela, “yeɔ niye ní.”
^ Aloo “sume mi pi.”
^ Aloo “susuma.”
^ Hyɛ Munyu Komɛ A Sisi Tsɔɔmi.
^ Hela, “kɛ níhi tsuo nɛ e ngɛ ɔ yi sɛ.”
