Luka Sane Kpakpa a 4:1-44
4 Kɛkɛ nɛ mumi klɔuklɔu ɔ hyi Yesu tɔ nɛ mumi ɔ ngɔ lɛ kɛ je Yɔdan Pa a nya kɛ ho nga a nɔ ya
2 ligbi 40, nɛ Abosiami ya ngɛ lɛ kae. Jamɛ a be ɔ mi ɔ, e yi nɔ́ ko nɔ́ ko, enɛ ɔ he ɔ, benɛ jamɛ a ligbi ɔmɛ ba nyagbe ɔ, hwɔ ye lɛ.
3 Lɔ ɔ he ɔ, Abosiami de lɛ ke: “Ke Mawu bi ji mo ɔ, de tɛ nɛ ɔ konɛ e plɛ pee abolo.”
4 Se Yesu de lɛ ke: “A ngma ke, ‘Pi abolo pɛ nɛ baa nɔmlɔ wami yi.’”
5 Enɛ ɔ he ɔ, e ngɔ lɛ kɛ ya he ko nɛ ya hiɔwe, nɛ e ngɔ matsɛ yemi ɔmɛ tsuo nɛ a ngɛ zugba a nɔ hehi nɛ nimli ngɛ ɔ kɛ tsɔɔ lɛ si kake too.
6 Lɔ ɔ se ɔ, Abosiami de lɛ ke: “Ma ngɔ he wami nɛ ɔ tsuo kɛ a hɛ mi nyami ɔ kɛ ha mo, ejakaa a ngɔ kɛ wo ye dɛ, nɛ nɔ fɛɛ nɔ nɛ i suɔ ɔ, i kɛ haa lɛ.
7 Enɛ ɔ he ɔ, ke o kpla si ngɛ ye hɛ mi nɛ o ja mi si kake ɔ, lɛ tsuo maa pee o nɔ.”
8 Yesu he nɔ nɛ e de lɛ ke: “A ngma ke, ‘Yehowa* o Mawu ɔ ji nɔ nɛ e sa kaa o ja, nɛ lɛ pɛ nɛ e sa kaa o sɔmɔ ngɛ blɔ klɔuu nɔ.’”
9 Lɔ ɔ se ɔ, e ngɔ lɛ kɛ ya Yerusalɛm nɛ e kɛ lɛ ya da sɔlemi tsu ɔ yi mi* nɛ e de lɛ ke: “Ke Mawu bi ji mo ɔ, mo tsɔ kɛ je hiɛ ɔ kɛ ya fia si,
10 ejakaa a ngma ke, ‘O he ɔ, e ma fã e bɔfo ɔmɛ nɛ a ma ba bu o he,’
11 nɛ ‘A maa hɛɛ mo ngɛ a dɛ mi, konɛ o nane nɛ ko si tɛ ko.’”
12 Yesu he nɔ nɛ e de lɛ ke: “A de ke: ‘E sɛ nɛ o ka Yehowa,* o Mawu ɔ.’”
13 Lɔ ɔ he ɔ, benɛ Abosiami ka lɛ ngɛ blɔ nɛ ɔmɛ tsuo a nɔ ta a, e si lɛ kɛ ya si be kpa nɛ sa.
14 Jehanɛ ɔ, mumi ɔ wo Yesu he wami nɛ e kpale e se kɛ ya Galilea. Nɛ e he sane kpakpa gbɛ fĩa mahi tsuo nɛ a ngɛ lejɛ ɔ ní ɔmɛ a mi ɔ.
15 Jehanɛ se hu ɔ, e bɔni ní tsɔɔmi ngɛ a kpe he ɔmɛ, nɛ nihi tsuo wo e hɛ mi nyami.
16 Lɔ ɔ se ɔ, e ya Nazarɛt, he nɛ a lɛ lɛ ngɛ ɔ, nɛ kaa bɔ nɛ e pɔɔ peemi ngɛ He Jɔɔmi ligbi ɔ nɔ ɔ, e ya kpe he ɔ, nɛ e te si kɛ da si konɛ e kane ní.
17 Enɛ ɔ he ɔ, a ngɔ gbalɔ Yesaya womi kpo ɔ kɛ ha lɛ, nɛ e bli womi kpo ɔ mi nɛ e na he nɛ a ngma ngɛ ke:
18 “Yehowa* mumi ɔ ngɛ ye nɔ, ejakaa e pɔ mi nu kaa ma ba jaje sane kpakpa a kɛ tsɔɔ ohiatsɛmɛ. E tsɔ mi kaa ma ba jaje kɛ tsɔɔ nyɔguɛhi kaa a maa ye a he, nɛ́ ma jaje kɛ tsɔɔ hɛ yuyuili kaa a maa hyɛ nɔ́, nɛ e tsɔ mi kaa ma ba kpɔ̃ nihi nɛ a ngɛ mɛ yi mi wae ɔ,
19 nɛ́ ma fiɛɛ jeha nɛ sa Yehowa* hɛ mi ɔ.”
20 Kɛkɛ nɛ e koklo womi kpo ɔ, nɛ e ngɔ kɛ ha sɔmɔlɔ ɔ, nɛ e hi si; kɛkɛ nɛ ni ɔmɛ tsuo nɛ a ngɛ kpe he ɔ muɔɔ a hɛ ngmɛ ngɔ pue e nɔ.
21 Jehanɛ ɔ, e bɔni munyu tumi nɛ e de ke: “Mwɔnɛ ɔ, ngmami nɛ ɔ nɛ nyɛ nu ɔ ba mi.”
22 Nɛ ni ɔmɛ tsuo bɔni e he munyu kpakpa tumi, nɛ dloomi munyuhi nɛ ngɛ e nya mi jee ɔ ha nɛ a nya kpɛ a he, nɛ a ngɛ bie ke: “Anɛ pi Yosɛf binyumu ɔ ji nɛ ɔ lo?”
23 Kɛkɛ nɛ e de mɛ ke: “Atsinyɛ jemi ko be he kaa nyɛ ma de ke munyu nɛ ɔ kɔɔ ye he, ‘Tsopatsɛ, mo tsa mo nitsɛ o he. Moo pee níhi nɛ wa nu kaa o pee ngɛ Kapenaum ɔ ngɛ mo nitsɛ o ma a mi ngɛ hiɛ ɔ hulɔ.’”
24 Enɛ ɔ he ɔ, e de ke: “Ngɛ anɔkuale mi ɔ, i ngɛ nyɛ dee ke, a bui gbalɔ ngɛ lɛ nitsɛ e ma mi.
25 Kaa nɔ hyɛmi nɔ́ ɔ, i ngɛ nyɛ dee ngɛ anɔkuale mi ke: Ngɛ Eliya be ɔ mi benɛ a nga hiɔwe nya nɛ hwɔ ngua a ba zugba a nɔ tsuo ɔ, yalɔyihi* fuu ngɛ Israel.
26 Se a tsɔ we Eliya kɛ yɛ yalɔyi* nɛ ɔmɛ a ti nɔ ko nɔ ko ngɔ kaa ja yalɔyo* ɔ nɛ e hi Zarefat ngɛ Sidon zugba a nɔ ɔ pɛ ngɔ.
27 Jehanɛ se hu ɔ, ngɛ gbalɔ Elisha be ɔ mi ɔ, kpititsɛmɛ fuu hi Israel; se a ha we nɛ a ti nɔ ko nɔ ko he nɛ tsɔ* kaa ja Naaman, Siria no ɔ pɛ.”
28 Nihi tsuo nɛ a ngɛ kpe he ɔ nɛ a nu munyu nɛ ɔmɛ ɔ a mi mi fu,
29 nɛ a te si nɛ a tsitsɛɛ lɛ kɛ je ma a mi nɛ a kɛ lɛ ho yoku ɔ nɛ a ma a maa si ngɛ nɔ ɔ kɔ̃ ɔ nya ya, konɛ a ya tsitsɛɛ lɛ kɛ fɔ kɔ̃ ɔ mi nɛ e yi ya ma si.
30 Se e gblee a kpɛti, nɛ e je kɛ ho.
31 Lɔ ɔ se ɔ, e kple kɛ ho Galilea ma nɛ ji Kapenaum ɔ mi ya. Nɛ e ya tsɔɔ mɛ ní ngɛ He Jɔɔmi ligbi ɔ nɔ,
32 nɛ a nya kpɛ a he ngɛ bɔ nɛ e plɛ kɛ tsɔɔ ní ha a he, ejakaa e tu munyu kaa nɔ ko nɛ e hɛɛ blɔ nya.
33 Jehanɛ ɔ, nyumu ko ngɛ kpe he ɔ nɛ mumi ko ngɛ e mi, e ji daimonio mumi nɛ he tsɔ we, nɛ e kɛ gbi nɛ nya wa kpa ngmlaa ke:
34 “Ah! Yesu Nazarɛt no, mɛni sane waa kɛ mo ngɛ? Anɛ o ba konɛ o ba kpata wa hɛ mi lo? I le nɔ tutuutu nɛ o ji. Mo ji Mawu we Nɔ Klɔuklɔu ɔ nɛ.”
35 Se Yesu kã e hɛ mi ke: “Pee kɔ̃, nɛ o je kpo ngɛ e mi.” Daimonio ɔ sake nyumu ɔ ngɔ fia si ngɛ a kpɛti, nɛ lɔ ɔ se ɔ, e je e mi, nɛ e yi lɛ awi.
36 Enɛ ɔ ha nɛ ni ɔmɛ tsuo a nya kpɛ a he nɛ a bɔni a sibi bimi ke: “Mɛni munyu po ji nɛ ɔ? Ejakaa e ngɔɔ he blɔ kɛ he wami nɛ e ngɛ ɔ kɛ fãa mumihi nɛ a he tsɔ we, nɛ a jeɔ kpo!”
37 Enɛ ɔ he ɔ, e he sane ya nɔ nɛ e ngɛ gbɛe kɛ ngɛ fĩae ngɛ he fɛɛ he ngɛ ma nɛ bɔle si ngɛ lejɛ ɔ mi.
38 Benɛ e je kpe he ɔ, e ya sɛ Simon we ɔ mi. Jamɛ a be ɔ mi ɔ, asla ku ko bu Simon nganyɛ ɔ si, nɛ a kpa Yesu pɛɛ kaa e ye bua lɛ.
39 Enɛ ɔ he ɔ, e ya da si ngɛ e kasa nya, nɛ e nga asla a yi, nɛ asla a po ngɛ e nɔ. Amlɔ nɔuu ɔ, e te si nɛ e bɔni mɛ sɔmɔmi.
40 Se benɛ pu ɔ yaa si nɔmi ɔ, nihi tsuo nɛ a ngɛ nihi nɛ hiɔ slɔɔtoslɔɔtohi ngɛ a he ɔ ngɔ a hiɔtsɛmɛ ɔmɛ kɛ ba e ngɔ. E ngɔ e nine kɛ pue a nɔ kakaaka nɛ e tsa mɛ.
41 Daimoniohi hu je nihi fuu a mi, nɛ a ngɛ ngmlaa kpae nɛ a ngɛ dee ke: “Mo ji Mawu Bi ɔ nɛ.” Se e kã a hɛ mi, nɛ e ngmɛ́ mɛ blɔ nɛ a tu munyu, ejakaa a le kaa lɛ ji Kristo ɔ nɛ.
42 Benɛ je na a, e je kɛ ho he ko banee ya. Se asafo kuu ɔmɛ bɔni lɛ hlami wawɛɛ, nɛ a ba he nɛ e ngɛ ɔ, nɛ a bɔ mɔde kaa a maa tsi e nya konɛ e ko je a he.
43 Se e de mɛ ke: “E sa nɛ ma ya jaje Mawu Matsɛ Yemi ɔ he sane kpakpa a ngɛ ma kpahi hu a mi, ejakaa lɔ ɔ he nɛ a tsɔ mi kɛ ba ngɛ.”
44 Enɛ ɔ he ɔ, e ya nɔ nɛ e fiɛɛ ngɛ Yudea kpe he ɔmɛ.
Sisi Ningmahi
^ Hyɛ Munyu Komɛ A Sisi Tsɔɔmi.
^ Aloo “he nɛ ya hiɔwe pe kulaa a.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “ahoyihi.”
^ Aloo “ahoyi.”
^ Aloo “ahoyo.”
^ Aloo, “tsa we a ti nɔ ko nɔ ko.”
