Luka Sane Kpakpa a 6:1-49
-
Yesu, “He Jɔɔmi Ligbi ɔ Nyɔmtsɛ” (1-5)
-
A tsa nyumu ko nɛ e nine gbo (6-11)
-
Bɔfo 12 ɔmɛ (12-16)
-
Yesu tsɔɔ ní nɛ e tsa nihi (17-19)
-
Bua jɔmihi kɛ musuhi (20-26)
-
He nyɛli nɛ a maa suɔ mɛ (27-36)
-
Nyɛɛ jɔɔ kojomi (37-42)
-
E yiblii nɛ a kɛ maa le lɛ (43-45)
-
Tsu nɛ a ma saminya; tsu nɛ e sisi tomi ɔ he wɛ (46-49)
6 Jehanɛ ɔ, ngɛ he jɔɔmi ligbi ko nɔ ɔ, e ya gu ngma ngmɔ komɛ a mi, nɛ e kaseli ɔmɛ ngɛ ngma a kue nɛ a ngɛ posae ngɛ a dɛ mi nɛ a ngɛ kpee.
2 Enɛ ɔ ha nɛ Farisi bi komɛ bi mɛ ke: “Mɛni he je nɛ nyɛ ngɛ nɔ́ nɛ mlaa ngmɛ́ blɔ kaa a peeɔ ngɛ He Jɔɔmi Ligbi ɔ nɔ ɔ pee ɔ?”
3 Se Yesu ha mɛ heto ke: “Anɛ nyɛ kane we nɔ́ nɛ David pee benɛ hwɔ ngɛ e kɛ nyumuhi nɛ a piɛɛ e he ɔ yee ɔ gblee lo?
4 Anɛ nyɛ kane we kaa e ya sɛ Mawu we ɔ nɛ e nine su abolo nɛ a ngɔɔ kɛ maa Mawu hɛ mi ɔ nɔ nɛ e ye, nɛ e ha nyumuhi nɛ a piɛɛ e he ɔ hu eko nɛ́ jinɛ mlaa ngmɛ́ blɔ kaa nɔ kpa ko yeɔ, kaa ja osɔfo ɔmɛ pɛ ɔ lo?”
5 Kɛkɛ nɛ e de mɛ ke: “Nɔmlɔ Bi ɔ ji He Jɔɔmi Ligbi ɔ Nyɔmtsɛ.”
6 Ngɛ he jɔɔmi ligbi kpa ko hu nɔ ɔ, e ya sɛ kpe he ɔ nɛ e ya bɔni ní tsɔɔmi. Nɛ nyumu ko ngɛ lejɛ ɔ nɛ e hiɔ nine gbo.
7 Womi ngmali ɔmɛ kɛ Farisi bi ɔmɛ ngɛ Yesu hyɛe totooto kaa e ma tsa nɔ ko ngɛ He Jɔɔmi Ligbi ɔ nɔ lo, konɛ a na nɔ́ ko nɛ a da nɔ kɛ po e nya.
8 Se e le nɔ́ nɛ a ngɛ susue ɔ, lɔ ɔ he ɔ, e de nyumu ɔ nɛ e nine gbo ɔ ke: “Tee si nɛ o da si ngɛ kpɛti ɔ.” Nɛ e te si nɛ e da si.
9 Kɛkɛ nɛ Yesu bi mɛ ke: “Ma bi nyɛ nɔ́ ko, Ngɛ He Jɔɔmi Ligbi ɔ nɔ ɔ, anɛ mlaa ngmɛɛ blɔ kaa a pee nɔ́ kpakpa aloo a ye nɔ awi, kaa a he nɔ* ko yi wami aloo a gbe nɔ?”
10 Benɛ e hyɛ mɛ kɛ bɔle si kɛ kpe ɔ, e de nyumu ɔ ke: “Kpa o nine ɔ mi.” E pee jã, nɛ he wami kpale ba e nine ɔ mi ekohu.
11 Se a ná abofu nɛ sisi numi be he, nɛ a bɔni nɔ́ nɛ a maa pee Yesu ɔ he susumi.
12 Ngɛ jamɛ a be ɔ mi ɔ, e ya yoku ɔ nɔ konɛ e ya sɔle, nɛ e sɔle kɛ ha Mawu nyɔ ɔ mi tsuo.
13 Nɛ benɛ je na a, e tsɛ e kaseli ɔmɛ kɛ ba e ngɔ, nɛ e hla a kpɛti nihi 12, nɛ e tsɛɛ mɛ ke bɔfohi hulɔ. Mɛ ji:
14 Simon, nɔ nɛ e tsɛɛ lɛ ke Petro hulɔ ɔ, kɛ e nyɛminyumu Andrea, Yakobo, Yohane, Filipo, Batolomeo,
15 Mateo, Toma, Alfeo bi Yakobo, Simon, nɛ a tsɛɛ lɛ ke “kãtsɛ ɔ,”
16 Yakobo bi Yudas, kɛ Yudas Iskariɔt, nɔ nɛ e ba plɛ nɔ se blɔ tsɔɔlɔ ɔ.
17 Nɛ e kɛ mɛ kple si kɛ ba he ko nɛ zugba a fɔɔ si tɛtlɛɛ ngɛ ɔ, nɛ e kaseli babauu kɛ nimli babauu nitsɛ nɛ a je Yudea kɛ Yerusalɛm kɛ Tiro kɛ Sidon wo nya ma amɛ a mi ɔ ba lejɛ ɔ konɛ a ba bu lɛ tue nɛ e tsa a hiɔ ɔmɛ ha mɛ.
18 Nihi nɛ mumihi nɛ a he tsɔ we ngɛ mɛ haoe ɔ po, e tsa mɛ.
19 Nɛ asafo kuu ɔ tsuo ngɛ mɔde bɔe kaa a maa ta e he, ejakaa he wami ngɛ e mi jee kɛ ngɛ mɛ tsuo tsae.
20 Nɛ e wo e yi nɔ, nɛ e hyɛ e kaseli ɔmɛ nɛ e bɔni demi ke:
“Nyɛ ohiatsɛmɛ, nyɛ ngɛ bua jɔmi, ejakaa nyɛ nɔ́ ji Mawu Matsɛ Yemi ɔ nɛ.
21 “Nyɛ nihi nɛ hwɔ ngɛ nyɛ yee amlɔ nɛ ɔ, nyɛ ngɛ bua jɔmi, ejakaa nyɛ maa tɔ.
“Nyɛ nihi nɛ nyɛ ngɛ ya foe amlɔ nɛ ɔ, nyɛ ngɛ bua jɔmi, ejakaa nyɛ maa muɔ.
22 “Be fɛɛ be nɛ nihi maa nyɛ nyɛ, nɛ a ma kua nyɛ, nɛ a ma pue nyɛ hɛ mi si, nɛ a ma puɛ nyɛ biɛ* kaa nimli yayamihi ji nyɛ ngɛ nɔmlɔ Bi ɔ he je ɔ, nyɛ bua nɛ jɔ.
23 Jamɛ a ligbi ɔ, nyɛ nya nɛ nyɛ bua nɛ jɔ wawɛɛ, ejakaa hyɛ! nyɛ hiɔwo kle ngɛ hiɔwe. Jã nɔuu kɛ̃ nɛ a nɛmɛ ɔmɛ pee gbali ɔmɛ.
24 “Nyɛ niatsɛmɛ, musu tloo nyɛ, ejakaa nyɛ ngɛ nyɛ bua womi ɔ tsuo náe momo.
25 “Nyɛ nihi nɛ nyɛ tɔ amlɔ nɛ ɔ, musu tloo nyɛ, ejakaa hwɔ ma ba ye nyɛ.
“Musu tloo nyɛ, nyɛ nihi nɛ nyɛ ngɛ muɔe amlɔ nɛ ɔ, ejakaa nyɛ ma ba ye kɔmɔ nɛ nyɛ ma fo ya.
26 “Be fɛɛ be nɛ nihi tsuo maa tu nyɛ he munyu kpakpa a, musu tloo nyɛ, ejakaa jã nɔuu kɛ̃ nɛ a nɛmɛ ɔmɛ pee lakpa gbali ɔmɛ.
27 “Se nyɛ nihi nɛ nyɛ ngɛ mi tue bue ɔ, i ngɛ nyɛ dee ke: Nyɛɛ ya nɔ nɛ nyɛɛ suɔ nyɛ he nyɛli nɛ nyɛɛ pee nihi nɛ a ngɛ nyɛ nyɛe ɔ kpakpa,
28 nɛ nyɛɛ jɔɔ nihi nɛ a ngɛ nyɛ gbiɛe ɔ, nɛ nyɛɛ sɔle kɛ ha ni nɛmɛ nɛ a ngɛ nyɛ jɛe ɔ.
29 Nɔ nɛ e ma gba o tue kake mi ma a, plɛ kake ɔ hu ngɔ ha lɛ; nɛ nɔ nɛ e ma kpɔ̃ tade nɛ o woɔ ngɛ o tade ɔ nɔ ɔ ngɛ o dɛ ɔ, ha nɛ e ngɔ tade nɛ o wo ngɛ lɔ ɔ sisi ɔ hulɔ.
30 Nɔ fɛɛ nɔ nɛ e maa ba mo nɔ́ ko ɔ, ha lɛ, nɛ nɔ nɛ e ma kpɔ̃ o níhi ngɛ o dɛ ɔ, ko de lɛ ke e kpale ngɔ kɛ ha mo.
31 “Jehanɛ hu ɔ, kaa bɔ nɛ nyɛ suɔ kaa nihi nɛ a pee ngɔ ha nyɛ ɔ, nyɛ hu nyɛɛ pee ngɔ ha mɛ jã nɔuu.
32 “Ke nyɛ suɔ nihi nɛ a suɔ nyɛ ɔ, mɛni nyɛ ma ná ngɛ lɔ ɔ mi? Ejakaa yayami peeli ɔmɛ po suɔ nihi nɛ a suɔ mɛ ɔ.
33 Nɛ ke nyɛ peeɔ nihi nɛ a peeɔ nyɛ kpakpa a pɛ kpakpa a, mɛni nyɛ ma ná ngɛ lɔ ɔ mi? Yayami peeli ɔmɛ po peeɔ jã nɔuu.
34 Jehanɛ se hu ɔ, ke nyɛ ngɔɔ níhi kɛ paa nihi nɛ nyɛ hyɛɛ blɔ kaa a ma ba to nyɛ nane mi ɔ, mɛni nyɛ ma ná ngɛ lɔ ɔ mi? Ejakaa yayami peeli hu ngɔɔ níhi kɛ paa yayami peeli konɛ a kpale ná babauu.
35 Mohu ɔ, nyɛɛ ya nɔ nɛ nyɛɛ suɔ nyɛ he nyɛli, nɛ nyɛɛ pee mɛ kpakpa, nɛ nyɛɛ ngɔ níhi kɛ pa mɛ nɛ́ nyɛ ko hyɛ blɔ kaa a ba ha nyɛ nɔ́ ko; nɛ nyɛ hiɔwo maa kle, nɛ nyɛ maa pee Hiɔwe Lokoo No ɔ bimɛ, ejakaa e mi mi jɔ kɛ ha nihi nɛ a li sina kɛ yiwutsotsɛmɛ.
36 Nyɛɛ ya nɔ nɛ nyɛɛ na nihi mɔbɔ kaa bɔ nɛ nyɛ Tsɛ ɔ naa nɔ mɔbɔ ɔ.
37 “Jehanɛ se hu ɔ, nyɛɛ jɔɔ nihi kojomi, nɛ a be nyɛ kojoe kɔkɔɔkɔ; nyɛɛ jɔɔ nihi fɔ bumi, nɛ a be nyɛ fɔ bue kɔkɔɔkɔ. Nyɛɛ ya nɔ nɛ nyɛɛ ngɔ kɛ pa,* nɛ a maa ngɔ kɛ pa nyɛ.*
38 Nyɛɛ ya nɔ nɛ nyɛ ha, nɛ nihi ma ha nyɛ. A maa ngɔ nɔ́ nɛ a susu saminya, nɛ́ a nyɛ nɔ, nɛ a mimiɛɛ lɛ, nɛ e hyi kɛ be nɔ ɔ kɛ pue nyɛ tɛ nɔ. Ejakaa susumi nɔ́ nɛ nyɛɛ kɛ ngɛ susue ɔ, lɔ ɔ nɔuu nɛ a kɛ ma susu ha nyɛ kɛ to nane mi.”
39 Lɔ ɔ se ɔ, e kɛ nɔ́ he tomi nɔ́ ko tsu ní, nɛ e de mɛ ke: “Hɛ yuyuilɔ be nyɛe maa tsɔɔ hɛ yuyuilɔ blɔ, aloo e ma nyɛ? Anɛ mɛ ni enyɔ ɔmɛ tsuo a ya be muɔ mi nɔe lo?
40 Kaselɔ pa we e tsɔɔlɔ, se nɔ fɛɛ nɔ nɛ a tsɔɔ lɛ ní saminya a maa pee kaa e tsɔɔlɔ ɔ.
41 Ke jã a, lɛɛ mɛni he je mɔ nɛ o hyɛɛ nga nyafii nɛ ngɛ o nyɛmi hɛ ngmɛ nɔ ɔ, se plai nɛ ngɛ mo nitsɛ o hɛ ngmɛ nɔ ɔ lɛɛ o nɛ ɔ?
42 Kɛ o ma plɛ kɛ de o nyɛmi ke, ‘Awetsɛ, ha nɛ ma je nga nyafii ɔ nɛ ngɛ o hɛ ngmɛ nɔ ɔ ha mo,’ be mi nɛ plai nɛ ngɛ mo nitsɛ o hɛ ngmɛ nɔ ɔ lɛɛ o nɛ ɔ? Osatotsɛ! Kekleekle ɔ, mo je plai nɛ ngɛ mo nitsɛ o hɛ ngmɛ nɔ ɔ, kɛkɛ ɔ, o maa hyɛ nɔ́ saminya kɛ je nga nyafii ɔ nɛ ngɛ o nyɛmi ɔ hɛ ngmɛ nɔ ɔ.
43 “Ejakaa tso nɛ hi ko be nɛ e woɔ yiblii sasɛ, nɛ jã kɛ̃ nɛ tso yaya* ko be nɛ e woɔ yiblii nɛ hi.
44 Ejakaa tso fɛɛ tso ɔ, e yiblii nɛ a kɛ leɔ e mi tso. Kaa nɔ hyɛmi nɔ́ ɔ, nihi bua we fig nya ngɛ miohi a mi, nɛ jã kɛ̃ nɛ nihi pui wai yiblii ngɛ mio tso nɔ.
45 Nɔmlɔ kpakpa jeɔ ní kpakpahi ngɛ juetli kpakpahi nɛ e bua nya ngɛ e tsui mi ɔ mi kɛ haa, se nɔmlɔ yayami lɛɛ, e jeɔ ní yayahi ngɛ juetli yayahi nɛ e bua nya a mi kɛ haa; ejakaa nɔ́ nɛ hyi e tsui ɔ tɔ ɔ, lɔ ɔ nɛ e nya deɔ.
46 “Lɛɛ mɛni he je mɔ nɛ nyɛ tsɛɛ mi ‘Nyɔmtsɛ! Nyɔmtsɛ!’ se níhi nɛ i deɔ nyɛ ɔ lɛɛ nyɛ pee we ɔ?
47 Nɔ fɛɛ nɔ nɛ e baa ye ngɔ nɛ e ba nuɔ ye munyu ɔmɛ, nɛ e yeɔ nɔ ɔ, ma tsɔɔ nyɛ bɔ nɛ e ngɛ ha:
48 E ngɛ kaa nyumu ko nɛ benɛ e maa ma tsu ɔ, e tsua si nɛ e mi kuɔ, nɛ e to tsu ɔ sisi ngɛ tɛ sa nɔ. Enɛ ɔ he ɔ, benɛ nyu ba nɛ pa hia ba ná jamɛ a tsu ɔ, e nyɛ we nɛ e mimiɛɛ tsu ɔ, ejakaa a ma lɛ saminya.
49 Se nɔ fɛɛ nɔ nɛ e nuɔ nɛ e yi nɔ ɔ, e ngɛ kaa nyumu ko nɛ e ma tsu ngɛ zugba hɛ mi nɛ e tui sisi. Pa hia ba ná tsu ɔ, nɛ amlɔ nɔuu nɛ e hule kɛ pue si butuu, nɛ tsu ɔ gbɛ kulaa.”
Sisi Ningmahi
^ Aloo “susuma.”
^ Aloo “maa wo nyɛ biɛ.”
^ Aloo “hi he ngmɛɛe.”
^ Aloo “ngmɛɛ nyɛ he.”
^ Hela, “sasɛ.”
