Mateo Sane Kpakpa a 26:1-75
-
Osɔfo ɔmɛ so konɛ a gbe Yesu (1-5)
-
A plɛ nu kɛ e he via ngɔ pue Yesu nɔ (6-13)
-
Nyagbe He Tsɔmi ɔ kɛ e se blɔ tsɔɔmi (14-25)
-
Nyɔmtsɛ ɔ Gbɔkuɛ Niye Ní ɔ sisi tomi (26-30)
-
A gba kɛ fɔ si kaa Petro ma kua Yesu (31-35)
-
Yesu sɔle ngɛ Getsemane (36-46)
-
A nu Yesu (47-56)
-
A kojo lɛ ngɛ Sanhedri bi ɔmɛ a hɛ mi (57-68)
-
Petro kua Yesu (69-75)
26 Benɛ Yesu tu munyu nɛ ɔmɛ tsuo ta a, e de e kaseli ɔmɛ ke:
2 “Nyɛ le kaa e piɛ ligbi enyɔ nɛ a maa ye He Tsɔmi ɔ, nɛ a maa ngɔ nɔmlɔ Bi ɔ kɛ wo nihi a dɛ mi nɛ a maa gbe lɛ ngɛ tso nɔ.”
3 Jamɛ a be ɔ mi ɔ, osɔfo nikɔtɔma amɛ kɛ ma nikɔtɔma amɛ ya kpe ngɛ osɔfo nɔkɔtɔma pe kulaa nɛ a tsɛɛ lɛ ke Kayafa a kpo ɔ nɔ,
4 nɛ a so konɛ a nu Yesu ngɛ ga blɔ nɔ nɛ a gbe lɛ.
5 Se a ngɛ dee ke: “E sɛ nɛ waa pee nɔ́ nɛ ɔ ngɛ gbijlɔ yemi ɔ mi, bɔ nɛ pee nɛ basabasa peemi nɛ ko ba ni ɔmɛ a kpɛti.”
6 Benɛ Yesu ngɛ Betania ngɛ Simon kpititsɛ ɔ we ɔ mi ɔ,
7 yo ko ngɔ alabastro tɔ kɛ e mi nu kɛ e he via nɛ e he jua wa kɛ ba Yesu ngɔ, nɛ e bɔni plɛmi kɛ ngɛ e yi mi puee benɛ e ngɛ ní ɔ yee ɔ.
8 Benɛ kaseli ɔmɛ na nɔ́ nɛ ɔ, a mi mi fu nɛ a bi ke: “Mɛni nɔ́ puɛmi po ji nɛ ɔ?
9 Ejakaa a ko nyɛ jua nɔ́ nɛ ɔ nɛ a ko ná sika fuu nɛ a ko ngɔ kɛ ha ohiatsɛmɛ.”
10 Akɛnɛ Yesu le nɔ́ nɛ ɔ he je ɔ, e de mɛ ke: “Mɛni he je nɛ nyɛ ngɛ yo ɔ nya gbae ɔ? Nɔ́ nɛ e pee ha mi ɔ hi.
11 Ejakaa nyɛɛ kɛ ohiatsɛmɛ ɔmɛ ngɛ daa, se imi lɛɛ nyɛɛ kɛ mi be si hie daa.
12 Benɛ e plɛ nu kɛ e he via nɛ ɔ ngɔ pue ye nɔmlɔ tso ɔ nɔ ɔ, e pee jã konɛ e kɛ dla mi kɛ ha pumi.
13 I ngɛ nyɛ dee ngɛ anɔkuale mi ke, ngɛ je ɔ mi tsuo ɔ, he fɛɛ he nɛ a maa fiɛɛ sane kpakpa nɛ ɔ ngɛ ɔ, a maa sɛɛ nɔ́ nɛ yo nɛ ɔ pee ɔ hu kɛ kai lɛ.”
14 Kɛkɛ nɛ Ni Nyɔngma Kɛ Enyɔ ɔmɛ a kpɛti nɔ kake nɛ a tsɛɛ lɛ ke Yudas Iskariɔt ɔ pue nɔ kɛ ho osɔfo nikɔtɔma amɛ a ngɔ ya
15 nɛ e ya bi mɛ ke: “Mɛni nyɛ ma ha mi konɛ ma je lɛ ngɔ wo nyɛ dɛ mi?” A kane sika hiɔ 30 ngɔ ha lɛ.
16 Lɔ ɔ he ɔ, kɛ je jamɛ a be ɔ mi kɛ yaa a, e ya nɔ nɛ e ngɛ be nɛ sa hlae konɛ e kɛ maa tsɔɔ e se blɔ.
17 Ngɛ Abolo Nɛ Masa Be Mi gbijlɔ ɔ we kekleekle ligbi ɔ nɔ ɔ, kaseli ɔmɛ ba Yesu ngɔ nɛ a ba bi lɛ ke: “Jije o suɔ nɛ wa ya dla ha mo konɛ o ya ye He Tsɔmi ɔ ngɛ?”
18 E de mɛ ke: “Nyɛɛ ya ma a mi ngɛ Asimasi ngɔ nɛ nyɛ ya de lɛ ke, ‘Tsɔɔlɔ ɔ ke: “Be nɛ a to kɛ ha mi ɔ su ta; i kɛ ye kaseli ɔmɛ maa ye He Tsɔmi ɔ ngɛ o we ɔ mi.”’”
19 Lɔ ɔ he ɔ, kaseli ɔmɛ pee kaa bɔ nɛ Yesu de mɛ ɔ, nɛ a ya dla níhi kɛ ha He Tsɔmi ɔ.
20 Benɛ e su gbɔkuɛ ɔ, e kɛ kaseli 12 ɔmɛ ya hi si ngɛ okplɔɔ ɔ he.
21 Benɛ a ngɛ ní ɔ yee ɔ, e de ke: “I ngɛ nyɛ dee ngɛ anɔkuale mi ke, nyɛ ti nɔ kake maa tsɔɔ ye se blɔ.”
22 Akɛnɛ nɔ́ nɛ ɔ hao mɛ wawɛɛ he je ɔ, a ti nɔ fɛɛ nɔ bɔni lɛ bimi ke: “Nyɔmtsɛ, imi lo?”
23 E he nɔ ke: “Nɔ nɛ i kɛ lɛ wa ngɛ wa nine jee ngɛ kã a mi ɔ, lɛ nɛ e maa tsɔɔ ye se blɔ ɔ nɛ.
24 Ngɛ anɔkuale mi ɔ, nɔmlɔ Bi ɔ yaa kaa bɔ nɛ a ngma ngɛ e he ɔ, se musu tloo nɔ nɛ a maa gu e nɔ kɛ tsɔɔ nɔmlɔ Bi ɔ se blɔ ɔ! Afani nɛ a fɔ we jamɛ a nɔmlɔ ɔ po.”
25 Yudas, nɔ nɛ e maa tsɔɔ e se blɔ ɔ bi lɛ ke: “Rabi, imi lo?” Yesu de lɛ ke: “Jã nɛ mo nitsɛ o de ɔ nɛ.”
26 Benɛ a ngɛ ní ɔ yee ɔ, Yesu kɛ̃ abolo, nɛ benɛ e jɔɔ nɔ ta a, e ku mi, nɛ benɛ e kɛ ngɛ kaseli ɔmɛ hae ɔ, e de ke: “Nyɛ hee, nɛ nyɛɛ ye. Enɛ ɔ daa si kɛ ha ye nɔmlɔ tso ɔ.”
27 Nɛ benɛ e wo kplu ɔ nɔ ɔ, e na Mawu si, nɛ e ngɔ kɛ ha mɛ, nɛ e de ke: “Nyɛ tsuo nyɛɛ nu ngɛ nya,
28 ejakaa enɛ ɔ daa si kɛ ha ‘somi ɔ muɔ ɔ,’ nɛ ji ye muɔ nɛ a ma plɛ ngɔ pue si ngɛ nihi babauu a he kɛ ha yayami pami ɔ.
29 Se i ngɛ nyɛ dee ke: I be wai nɛ ɔ eko nue hu gblegbleegble kɛ yaa si jamɛ a ligbi ɔ nɛ i kɛ nyɛ maa nu lɛ ehe ngɛ ye Tsɛ ɔ Matsɛ Yemi ɔ mi ɔ.”
30 Nyagbe ɔ, benɛ a la yi jemi lahi ta a, a je kpo kɛ ho Oliv Yoku ɔ nɔ ya.
31 Jehanɛ ɔ, Yesu de mɛ ke: “Nyɔ nɛ ɔ mi ɔ, nyɛ tsuo nyɛ nane maa tɔ̃tɔ̃ ngɛ ye he, ejakaa a ngma ke: ‘Ma fia to nɔ hyɛlɔ ɔ nɔ́, nɛ jijɔ ɔmɛ maa gbɛ kɛ fĩa.’
32 Se ke a tle mi si se ɔ, ma sɛ nyɛ hlami kɛ ya Galilea.”
33 Se Petro he nɔ nɛ e de lɛ ke: “Ke ni kpa amɛ tsuo a nane maa tɔ̃tɔ̃ ngɛ o he po ɔ, imi lɛɛ ye nane be tɔ̃tɔ̃e gblegbleegble!”
34 Yesu de lɛ ke: “Ngɛ anɔkuale mi ɔ, i ngɛ mo dee ke, nyɔ nɛ ɔ mi ɔ, loko kungwɔ ku ma kpa nɔ́ ɔ, o ma kua mi si etɛ.”
35 Petro de lɛ ke: “Ke e sa kaa i kɛ mo nɛ gbo tete po, i be mo kuae gblegbleegble.” Kaseli kpa amɛ hu de jã nɔuu.
36 Enɛ ɔ se ɔ, Yesu kɛ kaseli ɔmɛ ba he ko nɛ a tsɛɛ ke Getsemane ɔ, nɛ e de mɛ ke: “Nyɛɛ hi si ngɛ hiɛ ɔ konɛ ma ya lejɛ ɔ nɛ ma ya sɔle.”
37 Nɛ e ngɔ Petro kɛ Zebedeo binyumu enyɔ ɔmɛ kɛ piɛɛ e he, nɛ aywilɛho bɔni lɛ numi, nɛ e bɔni haomi wawɛɛ nitsɛ.
38 Kɛkɛ nɛ e de mɛ ke: “Aywilɛho nɛ nya wa nu mi,* nɛ e miɔ nɛ e maa gbe mi. Nyɛɛ hi hiɛ ɔ nɛ nyɛɛ ya nɔ nɛ nyɛɛ kɛ mi nɛ hwɔɔ.”
39 Nɛ benɛ e ya e hɛ mi bɔɔ ɔ, e ya bu si, nɛ e sɔle ke: “Ye Tsaatsɛ, ke e maa hi ɔ, ha nɛ kplu nɛ ɔ nɛ be ye he kɛ ho. Se kɛ̃ ɔ, pi bɔ nɛ i suɔ, mohu ɔ, bɔ nɛ moo o suɔ.”
40 E kpale kɛ ba kaseli ɔmɛ a ngɔ nɛ e ba na mɛ nɛ a ngɛ mahe hwɔe, nɛ e bi Petro ke: “Anɛ nyɛ be nyɛe nɛ nyɛɛ kɛ mi maa ya nɔ maa hwɔɔ ngmlɛfia kake pɛ po lo?
41 Nyɛɛ ya nɔ nɛ nyɛɛ hwɔɔ nɛ nyɛɛ hi sɔlee daa konɛ nyɛ ko sɛ ka mi. Ngɛ anɔkuale mi ɔ, mumi ɔ suɔ wawɛɛ, se he lo ɔ gbɔjɔ.”
42 E pue nɔ kɛ ho ekohu si enyɔne, nɛ e ya sɔle ke: “Ye Tsaatsɛ, ke nɔ́ nɛ ɔ be nyɛe maa be ye he kɛ ho kaa ja i nu ɔ, lɛɛ ha nɛ nɔ́ nɛ o suɔ ɔ nɛ e ba mi.”
43 Nɛ e kpale kɛ ba ekohu nɛ e ba na mɛ nɛ a ngɛ mahe hwɔe, ejakaa a hɛ ngmɛhi jiɔ ngɛ a yi he.
44 Enɛ ɔ he ɔ, e si mɛ nɛ e kpale kɛ ho nɛ e ya sɔle si etɛne, nɛ e kpale tu jamɛ a munyu ɔ nɔuu.
45 Lɔ ɔ se ɔ, e kpale kɛ ba kaseli ɔmɛ a ngɔ nɛ e ba de mɛ ke: “Ngɛ be kaa kikɛ nɛ ɔ mi ɔ, nyɛ ngɛ mahe hwɔe nɛ nyɛ ngɛ nyɛ he jɔɔe! Hyɛ! Ngmlɛfia a su ta nɛ́ a ma je nɔmlɔ Bi ɔ ngɔ wo yayami peeli a dɛ mi.
46 Nyɛɛ te si, nyɛ ha nɛ waa ho. Hyɛ! Ye se blɔ tsɔɔlɔ ɔ su hiɛ ɔ ta.”
47 Benɛ e ngɛ munyu ɔ tue nɛ e nya mɛ si lolo ɔ, hyɛ! Yudas, Ni Nyɔngma Kɛ Enyɔ ɔmɛ a kpɛti nɔ kake ɔ ba, nɛ asafo kuu ngua ko piɛɛ e he. Ni ɔmɛ hɛɛ klaatehi, kɛ tso kpotihi. Osɔfo nikɔtɔma amɛ kɛ nikɔtɔma amɛ lɛ a tsɔ mɛ.
48 E se blɔ tsɔɔlɔ ɔ ha mɛ okadi ko. E de mɛ ke: “Nɔ nɛ ma fĩɔ e nya he ɔ, lɛ ji nɔ ɔ nɛ; nyɛɛ nu lɛ.”
49 Nɛ e nyɛɛ tɛ̃ɛ kɛ ya su Yesu he nɛ e de ke: “Rabi, he manye!” nɛ e fĩɔ e nya he.
50 Se Yesu bi lɛ ke: “Awetsɛ, mɛni he je nɛ o ba hiɛ ɔ?” Kɛkɛ nɛ a ba a hɛ mi nɛ a ba nu Yesu nɛ a hɛɛ e mi.
51 Se hyɛ! nihi nɛ a kɛ Yesu ngɛ ɔmɛ a kpɛti nɔ kake kpã e nine mi nɛ e hia e klaate, nɛ e ja osɔfo nɔkɔtɔma pe kulaa a nyɔguɛ ɔ, nɛ e po e tue kɛ fɔ si.
52 Kɛkɛ nɛ Yesu de lɛ ke: “Kpale o klaate ɔ ngɔ to e to he, ejakaa nihi tsuo nɛ a hiaa klaate ɔ, a ma gbo ngɛ klaate nya.
53 Aloo o susu kaa i be nyɛe nɛ ma kpa ye Tsɛ ɔ pɛɛ nɛ e ha mi hiɔwe bɔfohi asafo 12 ngɛ be nɛ ɔ mi lo?
54 Ke e ba jã a, kɛ Ngmami ɔ nɛ de ke e sa kaa e ba mi kaa kikɛ ɔ ma plɛ kɛ ba mi kɛɛ?”
55 Jamɛ a ngmlɛfia a mi ɔ, Yesu de asafo kuu ɔmɛ ke: “Anɛ nyɛɛ kɛ klaatehi kɛ tso kpotihi ba konɛ nyɛ ba nu mi kaa bɔ nɛ a nuɔ julɔ ɔ lo? Daa ligbi ɔ, i hiɔ si ngɛ sɔlemi we ɔ nɛ i tsɔɔ ní, se nyɛ nui mi.
56 Se ní nɛ ɔmɛ tsuo ba mi bɔ nɛ pee nɛ níhi nɛ gbali ɔmɛ ngma* a nɛ ba mi.” Kɛkɛ nɛ kaseli ɔmɛ tsuo kua lɛ, nɛ a tu fo.
57 Nihi nɛ a nu Yesu ɔ ngɔ lɛ kɛ ya Kayafa nɛ ji osɔfo nɔkɔtɔma pe kulaa a ngɔ ngɛ he nɛ womi ngmali ɔmɛ kɛ nikɔtɔma amɛ kpe ngɛ ɔ.
58 Se Petro ya nɔ nɛ e nyɛɛ e se hluu kɛ ya su osɔfo nɔkɔtɔma pe kulaa a kpo ɔ nɔ, se blɔ saii ngɛ e kɛ lɛ a kpɛti. Nɛ benɛ e sɛ we ɔ mi ɔ, e ya hi si ngɛ tsɔli nɛ a ngɛ we ɔ mi ɔmɛ a kpɛti, konɛ e hyɛ nɔ́ nɛ maa je mi kɛ ba.
59 Jamɛ a be ɔ mi ɔ, osɔfo nikɔtɔma amɛ kɛ Sanhedri bi ɔmɛ tsuo ngɛ lakpa odase ko hlae kɛ si Yesu konɛ a gbe lɛ.
60 Se a nɛ eko, e ngɛ mi kaa lakpa odase yeli fuu ba mohu lɛɛ. Pee se ɔ, ni enyɔ ba
61 nɛ a ba de ke: “Nyumu nɛ ɔ de ke, ‘Ma nyɛ ma ku Mawu sɔlemi we ɔ ngɔ pue si, nɛ ma ngɔ ligbi etɛ kɛ ma.’”
62 Kɛkɛ nɛ osɔfo nɔkɔtɔma pe kulaa a te si kɛ da si, nɛ e bi lɛ ke: “Anɛ o be nya jee lo? Odase nɛ nyumu nɛ ɔmɛ ngɛ yee kɛ ngɛ mo sie ɔ, o be he nɔ́ ko dee lo?”
63 Se Yesu pui e nya mi. Enɛ ɔ he ɔ, osɔfo nɔkɔtɔma pe kulaa a de lɛ ke: “I ngɛ mo dee ke, kã Mawu hɛ kalɔ ɔ kita kaa o maa tu anɔkuale nɛ o ma de wɔ ke mo ji Kristo ɔ, Mawu Bi ɔ!”
64 Yesu de lɛ ke: “Jã nɛ mo nitsɛ o de ɔ nɛ. Se i ngɛ nyɛ dee ke: Kɛ je piɔ kɛ yaa a, nyɛ maa na nɔmlɔ Bi ɔ nɛ e hii si ngɛ Hewamitsɛ ɔ hiɔ nɔ nɛ e ma ngɛ hiɔwe bɔku ɔmɛ a mi.”
65 Kɛkɛ nɛ osɔfo nɔkɔtɔma pe kulaa a hia tadehi nɛ e wo ngɛ e tade ɔ nɔ ɔ, nɛ e de ke: “E bɔ musu! Anɛ odase yeli kpahi a he pa hia wɔ lo? Hyɛ! Amlɔ nɛ ɔ lɛɛ nyɛ nu musu bɔmi ɔ.
66 Mɛni nyɛ ngɛ dee?” A he nɔ ke: “E sa gbenɔ.”
67 Kɛkɛ nɛ a su lada pue e hɛ mi, nɛ a fiaa lɛ kɔ̃. Ni kpahi hu gba e hɛ mi ma,
68 nɛ a de ke: “Kristo, moo gba kɛ tsɔɔ wɔ. Mɛnɔ fia mo nɔ́ ɔ?”
69 Be nɛ ɔ mi tsuo ɔ, Petro hii si ngɛ kpo ɔ nɔ, nɛ mawayo ko ba e ngɔ nɛ e ba de lɛ ke: “Mo hu o ji Yesu nɛ e je Galilea a huɛ!”
70 Se e kplɛɛ we nɔ ngɛ mɛ tsuo a hɛ mi, nɛ e de ke: “I li nɔ́ nɛ o ngɛ dee ɔ he nɔ́ ko.”
71 Benɛ e je kpo kɛ ho we kɛ e nya agbo ɔ mi ya a, yoyo ko hu to e he hɛ, nɛ e de nihi nɛ a ngɛ lejɛ ɔ ke: “Nyumu nɛ ɔ, Yesu nɛ e je Nazarɛt ɔ huɛ.”
72 E kua ekohu kɛ kita kami ke: “I li nyumu ɔ!”
73 Ngɛ be bɔɔ se ɔ, nihi nɛ a daa si ngɛ lejɛ ɔ ba Petro ngɔ nɛ a ba de lɛ ke: “Niinɛ, o ji a kpɛti nɔ kake, ejakaa ngɛ anɔkuale mi ɔ, o munyu tumi po jeɔ mo si.”
74 Jehanɛ ɔ lɛɛ, e bɔni gbiɛmi nɛ e bɔni kita kami ke: “I li nyumu ɔ!” Nɛ amlɔ nɔuu nɛ kungwɔ ku ko kpa nɔ́.
75 Kɛkɛ nɛ Petro kai nɔ́ nɛ Yesu de lɛ ɔ. E de lɛ ke: “Loko kungwɔ ku ma kpa nɔ́ ɔ, o ma kua mi si etɛ.” Nɛ e je kpo kɛ ya we ɔ se nɛ e ya fo ya yuuyuuyuu.
