Anɛ e yeɔ ha mo kaa o maa le slɔɔto nɛ ngɛ anɔkuale kɛ lakpa a kpɛti lo? Mwɔnɛ ɔ, e ngɛ kaa nɔ́ nɛ nihi daa bɔ nɛ a nuɔ he ha kɛ nɔ́ nɛ mɛɛ a susuɔ ɔ nɔ kɛ heɔ munyu yeɔ mohu pe nɛ a maa da anɔkuale nɛ ngɛ sane ko mi kɛ odase nɛ ngɛ he ɔ nɔ kɛ he ye. Mwɔnɛ ɔ, ngɛ je ɔ mi tsuo ɔ nihi fuu susuɔ kaa anɔkuale ko be.

 Susumi nɛ ɔ, pi nɔ́ ehe. Maa pee jeha 2,000 nɛ be ɔ, Roma Amlaalo nɛ ji Pontio Pilato nɛ e yi mi ngɛ lɛ enyɔɔnyɔ pee ɔ bi Yesu ke: “Mɛni ji anɔkuale?” (Yohane 18:38) E ngɛ mi kaa Pilato mlɛ we nɛ Yesu nɛ ha e sane bimi ɔ heto mohu lɛɛ, se e sane bimi ɔ he hia. Baiblo ɔ ma nyɛ maa ye bua mo nɛ o le munyu nɛ ji anɔkuale kɛ munyu nɛ ji lakpa ngɛ je nɛ nihi li nɔ́ nɛ ji anɔkuale kɛ nɔ́ nɛ ji lakpa a mi.

Anɛ anɔkuale ngɛ lo?

 Ee. Baiblo ɔ ngɔɔ munyungu nɛ ji “anɔkuale” ɔ kɛ tsuɔ ní kɛ daa si ha nɔ́ ko nɛ odase loo nɔ mi mami ngɛ he, nɛ́ e da. Baiblo ɔ tsɔɔ wɔ kaa, Yehowa a Mawu ngɔ ji he nɛ anɔkuale nitsɛnitsɛ je, nɛ e tsɛɛ lɛ ke “Mawu anɔkualetsɛ.” (La 31:5) Anɔkuale munyu nɛ ngɛ Baiblo ɔ mi ɔ je Mawu ngɔ, nɛ Baiblo ɔ kɛ anɔkuale nɛ ɔ to kane he ejakaa e ma nyɛ maa tsɔɔ wɔ blɔ ngɛ je nɛ nihi li nɔ́ nɛ ji anɔkuale kɛ lakpa a mi.​—La 43:3; Yohane 17:17.

Mɛni blɔ nɔ o maa gu kɛ na anɔkuale ɔ?

 Mawu sume nɛ waa kplɛɛ anɔkuale ɔ nɛ ngɛ Baiblo ɔ mi ɔ nɔ kɛkɛ be mi nɛ wa susuu we he. Mohu ɔ, e suɔ nɛ waa ngɔ nyɛmi nɛ wa ngɛ nɛ waa kɛ susuɔ níhi a he ɔ kɛ tsu ní mohu pe nɛ wa maa ngɔ wa hɛ kɛ fɔ̃ bɔ nɛ wa nuɔ nɔ́ he ha a nɔ. (Roma Bi 12:1) E suɔ nɛ waa le lɛ nɛ waa suɔ lɛ kɛ wa “juɛmi tsuo,” nɛ e suɔ kaa wɔ nitsɛmɛ wa ná nɔ mi mami kaa nɔ́ nɛ wa kaseɔ ngɛ Baiblo ɔ mi ɔ ji anɔkuale.​—Mateo 22:37, 38; Ní Tsumi 17:11.

Jije lakpa yemi je kɛ ba?

 Baiblo ɔ tsɔɔ kaa Mawu he nyɛlɔ nɛ ji Satan Abosiami nɛ Baiblo ɔ tsɛɛ lɛ ke “lakpa a e tsɛ” ɔ ngɔ nɛ lakpa yemi je. (Yohane 8:44) E ye Mawu he lakpa kɛ tsɔɔ Adam kɛ Hawa. (1 Mose 3:1-6, 13, 17-19; 5:5) Kɛ je jamɛ a be ɔ mi kɛ ma nɛ ɔ, Satan ya nɔ nɛ e ngɛ lakpa gbɛe kɛ ngɛ fĩae, nɛ e ngɛ anɔkuale nɛ kɔ Mawu he ɔ nɔ laae.​—Kpo Jemi 12:9.

Mɛni he je nɛ lakpa yemi pɔ he jã a?

 Ngɛ wa be nɛ ɔ nɛ Baiblo ɔ tsɛɛ ke “nyagbe ligbi” ɔmɛ a mi ɔ, Satan ngɛ nihi a nɔ he wami náe nɛ e ngɛ nihi sisie pe be ko nɛ be ɔ. Nihi yeɔ nihi lakpa konɛ a kɛ sisi mɛ nɛ́ a kɛ ná a he se. (2 Timoteo 3:1, 13) Lakpa munyuhi hu pɔ he ngɛ jamihi fuu a mi mwɔnɛ ɔ. Kaa bɔ nɛ Baiblo ɔ gba kɛ fɔ si kɛ kɔ wa be nɛ ɔ he ɔ, nihi “ma bua tsɔɔli a nya kɛ bɔle mɛ nitsɛmɛ a he ngɛ mɛ nitsɛmɛ a we akɔnɔhi a nya, konɛ a ta a tue mi kɛ ha mɛ,” nɛ a maa hla kaa “a be anɔkuale ɔ tue bue hu.”​—2 Timoteo 4:3, 4.

Mɛni he je nɛ anɔkuale he hia a?

 Loko nihi ma nyɛ ma he a sibi ye ɔ, ja a tuɔ a sibi anɔkuale. Ke huɛmɛ he we a sibi yi ɔ, lɔ ɔ haa nɛ a huɛ bɔmi ɔ puɛɔ, nɛ jã kɛ̃ nɛ ke kuu ko mi bi hu he we a sibi yi ɔ, lɔ ɔ ha we nɛ níhi yaa nɔ saminya ngɛ kuu ɔ mi. Baiblo ɔ tsɔɔ kaa Mawu suɔ nɛ waa ngɔ wa jami ɔ kɛ da anɔkuale nɔ. E de ke: “Nihi nɛ a ngɛ [Mawu] jae ɔ, e sa nɛ a kɛ mumi kɛ anɔkuale nɛ ja lɛ.” (Yohane 4:24) Ke o suɔ nɛ o le blɔ nɔ nɛ Baiblo ɔ maa gu kɛ ye bua mo konɛ o nyɛ nɛ o yɔse lakpa jami nɛ o yu o he kɛ je he ɔ, moo kane munyu nɛ ji “Lakpa Munyuhi Nɛ Ha Nɛ Nihi Susuɔ Kaa Mawu Be Suɔmi” ɔ.

Mɛni he je nɛ Mawu suɔ kaa ma le anɔkuale ɔ?

 Mawu suɔ nɛ o hi si kɛ ya neneene, enɛ ɔ he ɔ, e suɔ nɛ o kase anɔkuale ɔ konɛ o nyɛ nɛ o hi si kɛ ya neneene hwɔɔ se. (1 Timoteo 2:4) Ke o kase Mawu dami mlaa amɛ nɛ kɔɔ nɔ́ nɛ da kɛ nɔ́ nɛ dɛ he, nɛ o hi si ngɛ nya a, huɛ bɔmi kpakpa maa hi o kɛ lɛ nyɛ kpɛti. (La 15:1, 2) Mawu tsɔ Yesu kɛ ba zugba a nɔ konɛ e ba ye bua nihi nɛ a le anɔkuale ɔ. Mawu suɔ nɛ waa bu Yesu tsɔɔmi ɔmɛ tue.​—Mateo 17:5; Yohane 18:37.

Anɛ Mawu ma je lakpa yemi kɛ je ligbi ko lo?

 Ee. Mawu sume kaa waa ye nihi lakpa nɛ́ wa kɛ ná a he se. E wo si kaa e ma kpata nihi nɛ a fia a pɛɛ si kaa a maa ye lakpa a a hɛ mi. (La 5:6) Ke Mawu pee jã a, lɔ ɔ hu ma ha nɛ e si womi nɛ ji: ‘Nɔ nɛ tuɔ anɔkuale lɛɛ e maa hi si kɛ ya daa’ a maa ba mi.​—Abɛ 12:19.